Египедһээ гаралга 15 - Библи

Моисейн илалтын дуун

¹ Моисей болон Израиль угсаатан Эзэндэ магтаал дуу дуулаба: – Эзэндэ магтаал дуулаял, Тэрэ агуу үндэр! Сэрэгшые моритойнь далай руу шэдэбэл!

² Хүсэн түгэлдэр Эзэн минии Бурхан, Алдар соломни, абарални бологшо Ашата Бурхамни! Элинсэгэйм, эсэгым Бурхан болоо. Эгүүридэ Тэрэнэй соло дуудахалби!

³ Дайн байлдаанда хатуу Эзэн! Тэрэнэй нэрэ – Эзэн!

⁴ Фараоной дайшалхы тэргэнүүдые, сэрэгыень далайда шэнгээгээ, шэлдэг сэрэгшэдыень Хулһата далай соо һалган хосороогоо.

⁵ Гүн уһан тэдэниие залгяа: шулуун мэтэ тэдэ далайн оёор руу шэнгээ.

⁶ Эзэн! Гартнай шанга, хүсэтэй! Эзэн! Гартнай дайсаниие нэрбээ!

⁷ Алдар солынтнай жабхалан эсэргүүсэгшэдэй һүр һүлдые һүнөөгөө. Урдаһаатнай бодогшод уур хилэнгэйтнай галда хагдандал шатажа һалаа.

⁸ Үлеэхэдэтнай, уһа долгин хүбхыбэ, хана мэтэ хажуу тээшээ эбхэрэн зогсобо, Хулһата далайн уһанай эрьюулгэ хуурай газарай хайрта адли болобо.

⁹ «Хүсэһүүб даа наанаһаашни намнажа, хайшаа намһаа зугадабаш, – гэһэн харата дайсанай бодол тэнюун, – ойронь хүрэжэ гамгүй хюдахадаа, олзодо одоол садахамни хаяа, эритэ мэсынгээ үзүүртэ оруулжа, эльгэ сэдьхэлээ ханаха сагни ерээл».

¹⁰ Үлеэхэдэтнай, уһан долгин дайсаниие хушаа, шэдэһэн туулган мэтэ уһанда тэдэ шэнгээ.

¹¹ Эзэнтэй жэшэхээр бурхад үгыл! Хутагтанарай дунда Тан шэнги хүсэ шадалтай хэншье олдохогүй! Алдар солоороо һүр дарагша, эди шэдиин Эзэн!

¹² Гараа дэлгэхэдэтнай – газар дайсадые үрэбхеэ!

¹³ Абарагша угсаатанаа үршөөлдэ хүртөөн, арюун нангин газартаа абаашаха гэжэ дахуулбаш.

¹⁴ Арадууд бүгэдөөрөө дуулан, айжа һүрдэжэ байнал! Пилиштын зон һалганан байна,

¹⁵ Эдоомой түшэмэлнүүд шэшэрэлдээ, Моһаабай удамаршад айдаһаа хүрэнхэй, Ханаһаан ороной зон ухаагаа алдатараа һүрдэнхэй.

¹⁶ Айжа һүрдэжэ байг тэдэ! Танай хүсэтэ гар доро шулуун шэнги шэмээгүй болог! Эзэн, энэ Өөрын болгоһон арадтнай алад гаража ябанал!

¹⁷ Нангин хададаа тэдэниие нютагжуулхат, Өөрын һууха байшан тэндэ баряат, тахил үргэлэй һүмэ бодхоот!

¹⁸ Эзэнэй хаан түрэ хэтын хэтэдэ үргэмжэлэгдэхэ!

¹⁹ Фараоной морин сэрэгэй далайда ороходо, Эзэн урдаһаань уһа долги салгидуулан эбхэрүүлээ. Харин Израилиин зон далайн оёороор хуурай газарай хайр дээгүүр ябаһандал гараа!

Мириамай илалтын дуун

²⁰ Аһарооной эгэшэ, мэдэлшэ Мириам хэсэ сохижо захалба. Бүхы эхэнэрнүүд хойноһоонь ябажа, хэсэ сохин, хатар дэлгэбэ.

²¹ Мириам мэдэлшэ дуугаа дуулаба: – Эзэндэ магтаал дуулаял! Һүр жабхаланта хүсэеэ Тэрэ харуулба! Сэрэгшые моритойнь далай руу шэдэбэ!

Сүл губида тэнэн ябалга

²² Хулһата далайһаа Моисей Израиль угсаатаниие Шүүр губи тээшэ дахуулан ябаба. Шүүр губида гурбан үдэрэй туршада хаанашье уһа оложо ядаба.

²³ Мараа гэжэ газарта уһан олдоходоо, уужа болохоор бэшэ гашуун байба.

²⁴ Зон гэмэрэлдэжэ эхилбэ, «юу ууха зонбибди?» гэжэ Моисейһээ асууба.

²⁵ Моисей Эзэндэ зальбарба, Эзэн модо тэрээндэ харуулба. Моисейн модонһоо мүшэр хухалжа уһа руу хаяхадань, уһаниинь уухаар амтатай болобо. Тэрэ газарта Бурхан хуули тогтоол тэдээндэ үгөө агша бэлэй, тэрэл газарта туршаха туршалгаар шалгаа агша бэлэй.

²⁶ Эзэн айладхаба: – Танай Бурхан болохо Эзэнэй үгэ дуулажа, Тэрээндэ таатай юумэ үйлэдэжэ, хэлэһэн зарлигынь соносожо, буулгаһан хуулииень тогтоожо байбалтнай, египет угсаатанда хүргэһэн үбшэн тахал таанадта хэзээдэшье хүргэхэгүйб. Би эмшэлэгшэ Эзэн гээшэб!

²⁷ Израиль угсаатан Элиим гэжэ газарта ерэбэ. Тэндэнь арбан хоёр аршаан булаг ба хурмын далан модон бии бэлэй. Аршаанай дэргэдэ тогтобо.