Египедһээ гаралга 14 - Библи

Далайе гаталалга

¹ Эзэн Моисейдэ зарлигтаба:

² – Гэдэргээ хотиржо, Мигдоол болон далайн хоорондо, Бааһал-Цэпооной хажууда, Пи-Һахироодой дэргэдэ тогтог гэжэ Израилиин зондо хэлэл даа.

³ Тэдэ замһаа хадууран төөрибэ, сүл губи тэдээндэ дабагдашагүй һаалта болобо гэжэ фараон эндүүрэн һанаг.

⁴ Үсэдтөө диилдэжэ, хойноһоотнай мүрдэн намнаха гэжэ Минии һанаһан үйлөөр тэрэ болохо, одоол тиихэдэ фараониие сэрэгтэйнь даража, түгэс илалта туйлаха ёһотойб! Эзэнэй ёһото хэн байһые Египедэй зон мэдэжэ абаг! Эзэнэй зарлигаарнь лэ Израиль угсаатан бүтээбэ.

⁵ Израиль угсаатан ябаа гэжэ Египедэй хаанда элидхэбэ. Фараон түшэмэлнүүдтэеэ гэнтэ бодолоо хубилгаба. – Юу хэбэ гээшэбибди? – гэжэ тэдэ дуугаралдаба. – Ажалыемнай хэжэ байһан ажалшадаа табиха ёһогүй байгаалди.

⁶ Фараон сэрэг зоноо, дайшалхы тэргэнүүдээ түргэн суглуулагты гэжэ захирба.

⁷ Зургаан зуун дайшалхы эрхим тэргэ бэлдэжэ, моридые хүллэбэ. Тэргэ бүхэндэ дүй дүршэлтэй сэрэгшэдые табиба.

⁸ Үсэд нэтэрүү фараон Израиль угсаатаниие нэхэжэ ерэхэ гэһэн Эзэнэй һанаһан үйлөөр тиигээд лэ болобол даа. Харин Израиль угсаатан Бурханай хамгаалалта доро ябаа.

⁹ Египедэй сэрэг хойноһоонь ай-сүй болобо. Фараоной морин сэрэг, дайшалхы тэргэнүүдынь далайн эрьедэ Бааһал-Цэпоонһоо дүтэхэнэ Пи-Һахироот гэжэ газарта тогтоһон израильшуудые хүсэжэ ерэбэ.

¹⁰ Фараон дүтэлжэ ябаба. Нэхэжэ ерэһэн Египедэй сэрэг хараад, Израиль угсаатан һүрдэхын ехээр һүрдэжэ, Эзэнһээ абарал эрибэ.

¹¹ – Египедтэ яһымнай хаяха газар олдохогүй һэн гү?! – гэжэ тэдэ Моисейдэ хашхаралдаба. – Ши маниие хосороохо гэжэ сүл губида асарба гүш? Яаха гэжэ Египедһээ ябуулаабши?

¹² Египедтэ шамда хэлээ бэшэ һаалди: «Орхи маанадые, египетшүүдэй барлагшье байгуужабди!» Сүл губида һүнэһөө хатаанхаар Египедэй барлаг байһамнай дээрэл!

¹³ – Бү айгты! – гэжэ Моисей арад зондо хэлэбэ. – Хаража байгаарайгты, Эзэн таанадые абарха. Мүнөө египет сэрэгшэдые хаража байнат – харин саашадаа тэдэниие үзэхэшьегүйт!

¹⁴ Танай түлөө Эзэн дайлалданал, зүрхөө дарыт.

¹⁵ Эзэн Моисейдэ айладаба: – Юундэ Намһаа абарал эрихэ болобош? Израиль угсаатанда урагшаа ябахыень зонхилыш!

¹⁶ Харин өөрөө дулдыгаа далай тээшэ дэлгэн дэехэш – далай хажуу тээшээ эбхэрэн зайлажа, хуурай газар бии болохо. Израиль угсаатан далайн оёороор хуурай газарта ябаһан шэнги гарахал.

¹⁷ Уланхатаһан египет сэрэгэй хойноһоотнай хушууран орохые баадхаһан үйлэ хэхэб – одоол тэндэ фараоной сэрэг суур, тэдэнэй дайшалхы тэргэнүүд болон морин сэрэгые һүнөөжэ, илалта туйлахалби!

¹⁸ Фараониие дайшалхы тэргэнүүдтэйнь, морин сэрэгтэйнь хамта түгэс дарахадамни, Эзэн хэн гээшэб гэжэ египет угсаатан одоол ойлгохо!

¹⁹ Израиль угсаатанай урда ябаһан Бурханай Эльгээмэл жагсаалай һүүлдэ ерэжэ зогсобо. Урдань ябааша үүлэн бахана һүүлдэнь ерэжэ зогсобо.

²⁰ Египедэй болон Израилиин жагсаалнуудые тэрэ илган холодуулба. Үдэртөө бүрэнхы үүлэн байһан аад, һүни болоходо гэрэлтэжэ байба. Тэрэ һүни хоёр жагсаал бэе бэедээ дүтэлбэгүй.

²¹ Харин Моисей гараа далай дээгүүр дэлгэн дэебэ. Бүхэли һүниндөө Эзэн зүүн тээһээ шангаар үлеэһэн һалхи тууба, далайн долгин салгидан эбхэрбэ, далайн оёор үзэгдэбэ.

²² Израиль угсаатан далайн оёороор хуурай газарта ябаһан шэнги ябаба. Баруун гар тээнь эгсэ уһан хана байба, зүүн гартань мүн лэ уһан хана байба.

²³ Египедэй сэрэг – морин сэрэг, дайшалхы тэргэнүүд бүгэдэ – израильшуудые далайн оёороор намнажа, хушууран оробо.

²⁴ Зүгөөр үүр сайжа байхада, Эзэн үүлэн ба гал бахана сооһоо египедэй сэрэг суур тээшэ хүндэ харасаа шэглүүлбэ, египедэй сэрэг тиихэдэнь һандаран һүрөө дарагдаба.

²⁵ Дайшалхы тэргэнүүдэйнь мөөрнүүд тэргэһээ мултаран гаража, египет сэрэг тэдэниие арай-шамай шэрэжэ ябабад. «Израиль угсаатанһаа зугадая! – гэжэ египет сэрэгшэд гэмэр-гутар гэлдэбэ. – Эзэн тэдээндэ туһална: Тэрэ Өөрөө Египедтэй дайлалдана ха даа».

²⁶ Эзэн Моисейдэ зарлиг болобо: – Далай дээгүүр гараа дэлгэн дэехэдэш, эбхэрэн ошоһон уһа долгин һөөргөө тэхэрихэ, египедэй сэрэг, дайшалхы тэргэнүүд, морин сэрэгынь уһанда шэнгэхэ!

²⁷ Моисей гараа далай дээгүүр дэлгэбэ, үглөөгүүрнь уһа долгин тэхэрин ерэбэ. Уһанай урдаһаа гүйлдэжэ ябаһан египет сэрэгые тиигэжэ Эзэн далайн гүн соо шэнгүүлбэ.

²⁸ Израильшуудые намнажа ябаһан фараоной хамаг сэрэгшэдые моридтойнь, тэргэнүүдтэйнь уһа долгин үрэбхибэ. Египедэй нэгэшье хүн амиды үлэбэгүй.

²⁹ Харин Израиль угсаатан далайн оёороор хуурай газарта ябаһан шэнги гараба; баруун гар тээнь уһан хана тогтоод байба, зүүн гар тээнь – мүн лэ уһан хана.

³⁰ Иигэжэ тэрэ үдэр Эзэн Израиль угсаатаниие Египет зонһоо абарһан байна. Израиль угсаатан далайн эрьедэ египет сэрэгшэдэй үхэһэн бэенүүдые хараа һэн.

³¹ Эзэнэй агууехэ гарай Египедэй ойро хүрэһэниие нюдөөрөө хараба. Эзэнэй урда Израилиин зон һүрдэн һүгэдэбэ. Эзэндэ, Тэрэнэй богоол Моисейдэ этигэхын ехээр этигэбэ.