Египедһээ гаралга 11 - Библи

Арбадахи хэһээлтые уридшалан айладхана

¹ Эзэн Моисейдэ айладаба: – Үшөө нэгэ гай тодхор фараондо болон Египедэй газарта табихам гээшэ, тэрэнэй һүүлээр одоошье таанадые табиха. Табихаһаа байтагай эндэһээ түргөөр намнаха гэжэ оролдохо.

² Хүн бүхэн танилһаа, эхэнэр бүхэн хүршэ эхэнэрһээ алта мүнгэн шэмэг зүүдхэл, һиилүүр эрижэ абаг гэжэ хэлэ.

³ Израиль угсаатанда энэрхыгээр хандахыень тэндэхи зоной сэдьхэл Эзэн хубилгаба. Тиигээдшье Моисей египет зондо – ноёд түшэмэлнүүдэй, юрын зоной дунда – нэрэтэй, хүндэтэй байгаа юм.

⁴ Моисей фараондо хэлэбэ: – Эзэн иигэжэ айладаба: һүниин тэн багаар Египет орон соогуур һэтэ гарахадам,

⁵ Египедэй гэр бүлын ехэ хүбүүд – шэрээ дээрэ һууһан фараоной ууган хүбүүн, тээрмээр талха татажа байһан богоол эхэнэрэй анха түрэһэн нарай хүбүүн адли илгаагүй бүгэдөөрөө, мүн мал амитанай хамаг түрүүшын түлынь ами алдаха.

⁶ Бүхы Египедтэ уй ехэ орилоон, урдань үзэгдөөгүй ехэ уйдхар болохо.

⁷ Харин израильшуудта, тэдэнэй малда нохойш хусахагүй. Египет болон Израиль хоёрой хоорондо ямар илгаа Эзэн хэнэб гэжэ харахат.

⁸ – Түшэмэлнүүдшни намда ерэхэ, – гэжэ Моисей фараондо хэлэбэ. – Ябаха руугаа ябыш даа, арад зоншни баһал ябаг гэжэ гуйха. Тиихэдэнь орон нютагһааш гарахабди. Моисей фараонһоо уур сухалаар дүүрэн гараба.

⁹ – Фараон үгыеш дуулаха дурагүй байна, Египет орондо Минии үйлэдэһэн гайхамшаг үзэгдэлнүүд үшөөл олон болохын тула энэ хэрэгтэй, – гэжэ Эзэн Моисейдэ айладаба.

¹⁰ Моисей Аһароон хоёр эдэ үзэгдэлнүүдые фараоной урда харуулаа бэлэй. Харин Эзэн фараониие үсэд болгожо, Израилиин зониие тэрэ табиха дурагүй зандаа байба.