Египедһээ гаралга 10 - Библи

Наймадахи хэһээлтэ: таршаанууд

¹ Эзэн Моисейдэ айладаба: – Фараондо ошо. Минии дүлгэ тэмдэгүүдые фараондо ба албатан зондонь үзүүлхэ зорилгоор тэрэниие эсэргүүсүүлээб.

² Египедые ямар хэһээлтээр Минии хэһээһэн тухай, гайхамшаг үзэгдэлнүүдые хайшан гэжэ Минии үзүүлһэн тухай хүбүүдтээ ба аша гушанартаа хөөрөөрэйгты! Эзэн хэн гээшэб гэжэ мэдэхынтнай тула эсэргүүсүүлээб!

³ Моисей Аһароон хоёр фараондо ерээд хэлэбэд: – Эзэн, еврейнүүдэй Бурхан, иигэжэ асуужа байна: Минии урда номгорхошни хэзээ юм бэ? Намда зорюулһан үргэл тахил бүтээхыень Минии арадые табииш.

⁴ Табяагүй һаашни, үглөөдэр газар нютагташ таршаа шааруул тараахам.

⁵ Газар харахаар бэшэ болотор тоогүй олон таршаа дүүрэхэ, мүндэрһөө бүтэн үлэһэн ургамал хуу эдижэ һалгаха, хүдөө ургажа байһан модо бургааһа хиргаха!

⁶ Шинии ордондо, ноёд түшэмэлнүүдэйш, арад албатанайш гэр байшангуудта дүүрэн таршаа бии болохо. Энэ орон нютагта һууһан сагтаа үбгэ эсэгэнэршни тиимэ юумэ үзөөгүй байха. Иигэжэ хэлээд, Моисей гэрһээ гараба.

⁷ Фараондо түшэмэлнүүдынь хандажа хэлэбэ: – Энэ хүнһөө боложо бидэ удаан зобохомнай гээшэ гү? Өөрынгөө Эзэн Бурханда үргэл хэхыень тэдэниие табиит, Египет хосоржо байна гэжэ харанагүй аалта?

⁸ Моисей Аһароон хоёрые фараондо һөөргэнь дуудажа асарба. – Ошожо, Эзэн Бурхандаа мүргэлөө хэгты. Хэнтнай ошохо болоноб? – гэжэ фараон тэдэнһээ асууба.

⁹ – Үбгэд хүгшэдтэеэ, нарай нялхатаяа, үхи басагад, хүбүүдтэеэ булта, хамаг үхэр малаа, сар хонидоо абажа ошохо ёһотойбди, юуб гэхэдэ, энэмнай Эзэнэй тогтооһон һайндэр бшуу, – гэжэ Моисей хэлэбэ.

¹⁰ – Эхэнэр, хүүгэдтэйтнай хамта би таанадые табихагүйб. Эзэншье таанадта туһалжа шадахагүй. Юундэ хүүгэдээ абаашаха гэбэт? Муу бодол сэдьхээ гээшэ хат.

¹¹ Үгы даа, гансал эрэшүүл ошожо, Эзэндэ хэхэ гэһэн үргэлөө бүтээг – тиигэжэл гуйгаа бэшэ һэн гүт? – гэжэ фараон хэлэбэ. Моисей Аһароон хоёрые тиигээд үлдэжэ гаргаба.

¹² Эзэн Моисейдэ айладаба: – Египедэй газар тээшэ гараа дэлгэн дэел даа, таршаа шумуул дахяад добтолжо, бүхы ногооень, мүндэртэ сохюулаагүй бүхы ургамалыень дууһан һалгаг.

¹³ Моисей Египедэй газар руу дулдытай гараа дэлгэн дэебэ, Эзэн зүүн тээһээ шанга һалхи буулгаба. Бүхэли үдэртөө, бүхэли һүниндөө һалхин үлеэбэ, үглөөгүүр тээшэ үй түмэн таршаа шумуул асарба.

¹⁴ Египедэй бүхы газар дайдада таршаа шумуул добтолон оробо. Урдань хэзээдэшье үзэгдөөгүй, саашадаашье хэзээшье үзэгдэхэгүй олон таршаа шумуул газар дайдые бүрхөөбэ.

¹⁵ Газарай нюруу огто харагдахаяа болибо. Таршаа шумуул дайдын бүхы ногоо, бүхы модо жэмэс эдижэ һалгааба. Египет орондо ногоо набша гэхэ юумэн үгы болобо.

¹⁶ Фараон яаралтай Моисей Аһароон хоёрые ерүүлээд хэлэбэ: – Эзэн Бурханайтнай урда, танай урда би гэмтэйб.

¹⁷ Үшөө дахин үршөөгыт, Эзэн Бурхандаа зальбарыт, энэ үхэлтэ үйлэ намһаа холодуулаг лэ.

¹⁸ Моисей фараонһоо гаража, Эзэндэ зальбарба.

¹⁹ Эзэнэй баруун зүгһөө шанга һалхи табихадань, таршаа шумуул Хулһата далай тээшэ хиидэжэ һалаба. Египедэй газарта нэгэшье таршаа шумуул үлэбэгүй.

²⁰ Зүгөөр Эзэн фараониие дахяад үсэрүүлбэ, Израилиин үри һадаһадые тэрэ энэшье удаа табибагүй.

Юһэдэхи хэһээлтэ: шэб харанхы

²¹ – Тэнгэри өөдэ гараа дэлгэн дэехэдэш, Египедэй газарта тэмтэржэ ябамаар шэб харанхы болохо, – гэжэ Эзэн Моисейдэ айладаба.

²² Моисей дулдытай гараа тэнгэри өөдэ дэлгэн дэебэ, Египедэй бүхы газарта гурбан үдэрэй туршада нюдэ алдама харанхы байба.

²³ Хэн гэшэгүй хэнииеш хараха аргагүй байба, һууһан газарһаа хэншье бодобогүй. Харин Израилиин зоной һуудаг нютагта гэгээтэй байгаа бэлэй.

²⁴ Фараон Моисейе дуудажа асаруулаад: – Ошогты, Эзэнээ тахигты, хүүгэдтнай тантай ябаг. Харин малтнай үлэг. Томо жэжэ илгаагүй, – гэжэ хэлэбэ.

²⁵ Моисей тархяа һэжэрбэ: – Эзэн Бурхандамнай түгэс шатаалта үргэл үргэхэ, зооглон үргэхэ малгүйгөөр юундэ ошохо зонбибди?

²⁶ Бүхы манай мал, нэгэньшье үлэнгүй, бидэнтэй хамта ошохо, тэндэ ямар мал Эзэн Бурхандаа үргэхэеэ шэлэхэбди. Тэндэ хүрөөгүйдөө Бурханда ямар мал үргэхэеэ мэдэнэгүйлди.

²⁷ Эзэн фараоной үсэдыень хүдэлгэбэ, тэрэ дахяад табибагүй.

²⁸ – Яба саашаа, дахин намда бү ерэ. Хэрбээ ерэбэл, һүнэһөө хатаахаш, – гэжэ Моисейдэ фараон хэлэбэ.

²⁹ – Хэлэһээршнил болуужаг, бидэ хоёр бэшэ уулзахагүйбди, – гэжэ Моисей хэлэбэ.