Египедһээ гаралга 1 - Библи

Израильшууд Египедтэ

¹ Яковтай Египет орондо ерэһэн Израиль угсаатан гэбэл,

² Рэүбээн, Симеон, Левий ба Иуда,

³ Иссахаар, Зэбүлүүн ба Бэньямиин,

⁴ Даан ба Напталии, Гаад ба Ашээр болоно.

⁵ Яковай үри һадаһанай тоо (Египет урид ерэһэн Иосифтой хамта) дала хүрэһэн байгаа.

⁶ Иосиф болон аха дүүнэрынь, тэдэнэй үеын зон наһа бараа һааб даа.

⁷ Израильшуудай тоо улам олошоржо, олон болоходоо шадалтай боложо, тэндэхи орон нютагые дүүргэбэ.

Фараон израильшуудые дарлана

⁸ Египедтэ Иосифые мэдэхэгүй шэнэ фараон Египедэй хаан шэрээдэ һууба.

⁹ Тэрэ нэгэтэ албатандаа иигэжэ хэлэбэ: – Харыт, энэ Израилиин үри һадаһад ямар олон болоо гээшэб, иигээд манһаа булюу хүсэтэй болохонь лэ.

¹⁰ Ямар нэгэ аргаар эдэ зониие түрэхэ үдэхыень хизаарлаха хэрэгтэй байна. Дайн дажар эхилэг даа, эдэшни дайсадтай хэлсэжэ буһалгаалхадаа, эритэ мэсэеэ барижа, манай урдаһаа шэглүүлхэдээ болохо. Эсэстээ орон нютагһаамнай гаража ошоходоо магадгүй.

¹¹ Израилиин зондо хүшэр ажал хүүлэжэ, шадалаа баратарынь зараха зорилгоор хинагша харуулшадые табиба. Хоол хүнэһэ тусхай нөөсэлдэг Питоом, Раамсээс гэжэ хотонуудые израильшуудые хүсөөр баалажа барюулба.

¹² Израиль угсаатаниие хүндэ ажалда туляаха бүринь тэдэ улам олошоржо, дэлгэржэ байба. Египедэй зон тэдээнһээ ехэ айдаг болобо.

¹³ Тэдэ израильшуудые борьбо дээрээ бохииторнь ажал хүүлэхэ гэжэ гам хайрагүйгөөр баадхадаг болобо.

¹⁴ Израильшуудай хэхэ ажалынь гэхэдэ, шабар худхаад, хэбүүдтэ хэжэ, хирпиисэ хэхэ ажал бэлэй. Гадна таряалан дээрэ бүхы ажалынь хэдэг һэн. Барагдашагүй хүшэр ажалда сүхэрһэн зоной гасалан зоболон тухай хэлэлтэшьегүй.

¹⁵ Фараон еврейнүүдэй дундаһаа Шипраа ба Пуһаа гэжэ хүйһэ хүндэдэг хоёр хүгшэдые дуудажа асаруулаад:

¹⁶ – Еврей эхэнэрнүүдэй хүүгэдэй хүйһэ хүндэхэдөө, хаража байгты – хүбүүн гараа һаань, алагты, басаган түрөө һаа, хамаагүй амиды байг, – гэжэ захирба.

¹⁷ Теэд хүйһэ хүндэдэг хүгшэд Бурханһаа айжа, Египедэй фараоной хэлэһые дүүргэдэггүй, нялхануудта гар хүрэдэггүй байба.

¹⁸ Фараон тэдэниие дуудажа: – Юундэ хүүгэдые амиды орхихо болобот? – гэжэ асууба.

¹⁹ Хүйһэ хүндэдэг хүгшэд: – Еврей һамгад египет һамгадһаа ондоо байнал, бэень шэрхи гү, хүйһэ хүндэхэеэ ерэхэдэмнай, түрэжэрхинхэй байнал, – гэһэн харюу үгэбэ.

²⁰ Энээнэйнь түлөө Бурхан хүйһэ хүндэдэг хүгшэдтэ һайе хээ һэн. Израилиин арад түмэн олошоржол, шанга боложол байба.

²¹ Хүйһэ хүндэдэг хүгшэдэй Бурханһаа түбэгшөөдэг байһан ушарһаа Тэрэ гэр бүлэнүүдыень үнэржүүлэн бэхижүүлээ агша.

²² Фараон бүхы албатан арадтаа иимэ захирал буулгаба: – Һая түрэһэн хүбүүдыень уһа гол руу хаягты, басагадай түрэбэл, амиды үлөөгты.