Эфесэйхиндэ 3 - Библи

Павел бусад арадуудай дунда ажаллана

¹ Тиимэл шалтагаанаар би, Павел, еврей бэшэ таанадай түлөө Иисүүс Христоосһоо боложо хаалтада һуунаб.

² Бурхан Өөрынгөө үршөөл хайраар танай аша туһада энэ ажал хэхыемни намда даалгаа гэжэ таанад сохом мэдэнэ ёһотойт.

³ Бурхан нюусаяа намда нээжэ үгөө. Энээн тухай би түрүүн тобшохоноор бэшэһэн байгааб.

⁴ Тэрэ бэшэгыемни уншаад, Христоос тухай нюусые яажа ойлгожо байһыемни таанад мэдэжэ абахат.

⁵ Энэ нюусые урданай хүнүүдтэ нээдэггүй байгаа, харин мүнөө Бурхан Арюун Һүлдөөрөө дамжуулан гэгээн элшэнэртээ ба лүндэншэдтэ тэрэ нюусаа нээгээ.

⁶ Тэрэнь бусад арадууд Һайн Мэдээсэлэй ашаар баһал Бурханай үршөөлдэ хүртэхэ, тэдэнэр баһал нэгэ бэеын эрхэтэн болохо, Бурханай Иисүүс Христоосоор дамжуулһан найдуулга баһа тэдэндэ үгтэхэ гэһэн удхатай юм.

⁷ Бурханай хүсэ шадалай нүлөөгөөр намда үгтэһэн тусгай үршөөлөөр би Һайн Мэдээсэлэй зарасань болооб.

^8-10 Ой ухаандаа оруулхын аргагүй ехэ Христоосой баялиг тухай Һайн Мэдээсэлые бусад арадуудта номнохые, Бурханай нюусын яажа бэелхэ тухай бүхы хүнүүдтэ харуулхые Бурханай хүнүүдэй эгээл багань байһан намда Бурхан хайрлаа. Үнгэрһэн сагуудта хамаг юумые Бүтээгшэ Бурхан нюусаяа хадагалжа байгаа. Тиин мүнөөнэй үе сагта Тэрэ Өөрынгөө оюун ухааниие һүзэглэгшэдэй бүлгэмөөр дамжуулан тэнгэриин захирагшадта, огторгойн хүсэнүүдтэ элдэб янза хэбээрнь харуулаа.

¹¹ Замбуулин дэлхэйе бүтээхэһээ урда түлэблэжэ байһан юумэеэ Бурхан манай Эзэн Иисүүс Христоосой ашаар бэелүүлээ.

¹² Христоостой нэгэдэһэн, Тэрээндэ этигэжэ һүзэглэжэ байһанаараа бидэ зоригтойгоор, найдамжатайгаар Бурханда ойртожо байнабди.

¹³ Тиимэһээ минии тулижа, зобожо байһанда урмаа бү хухарагты гэжэ би таанадые гуйнаб. Минии зоболон танай аша туһада юм.

Христоосой дуран

¹⁴ Эсэгэдээ би үбдэгөө бохиилгон мүргэнэб.

¹⁵ Тэнгэри дээрэшье, газар дэлхэйдэшье байһан бүхы изагуур угсаатан Эсэгэһээ эхитэй.

¹⁶ Досоогоо хүсэ шадалтай болохынтнай тула Һүлдөөрөө дамжуулан алдарайнгаа баялигһаа таанадтай хубаалсахыень би Бурханиие гуйнаб.

¹⁷ Танай һүзэгэй ашаар зүрхэ сэдьхэлдэтнай Христоос һууришаһай, инаг дуран танай үндэһэ, һуури болоһой гэжэ би баһал зальбарнаб.

¹⁸ Тиигэбэл таанад Бурханай хүнүүдээр хамта Христоосой хайра дуранай хизааргүй ехэ үргэн, ута байһые, аргагүй үндэр, гүнзэгы байһые тухайлха аргатай болохот.

¹⁹ Тэрэ гүйсэд мэдэрхын аргагүй байһан хайра дурые таанад мэдэрдэг болохот. Тиигээд таанад алишье талаһаа Бурхандал адли эрхим түгэс болоһойт гэжэ би зальбарнаб.

²⁰ Досоомнай хүсэ шадалаа ажаллуулжа, бидэнэй гуйжа хүсэхэ гү, али һанажа бодохоһоо үлүү юумые бүтээхэ аргатай Бурхан алдаршаһай.

²¹ Бурхан һүзэглэгшэдэй бүлгэмөөр болон Иисүүс Христоосоор дамжан хэтын хэтэдэ, үеһөө үедэ алдар солотой байг лэ! Болтогой!