Дуунай дуун 5 - Библи

¹ Минии хубита, дүүхэймни! Сэсэрлигтээ би орооб. Һайхан үнэртэй дабирхай суглуулжа, зүгын үүрһээ балынь һорожо, үзэмэй дараһан архи шэмэжэ, һү уунам. Манай хайрата амарагууд! Хайрын зоогһоо амасагты! Хайрын архиһаа уугты! Ханажа садатараа эдеэлэгты!

Иерусалим хотын басагад: Дүрбэдэхи дуун Басаган:

² Нойрсожо байгаашье һаа, зүрхэмни һэргэг. Шагнана гүт, тэрэ! Хайратамни газаа ерэшоод, хаалга тоншожо байна. Инагни! Дүүхэймни, амарагни! Хөөрхэн сагаан тагтаамни! Өө мөөгүй амарагни! Үүдэ хаалгаа тайлыш! Һүниин шүүдэрһөө толгоймни нороо, үһэмни нойтон.

Хүбүүн: Басаган:

³ Үмдэдэг хубсаһаа тайланхайлби. Дахин яажа үмдэхэбиб? Хүлөө би угаанхайлби. Дахин яажа шоройдохобиб?

⁴ Хайратамни тиихэдэ хаалга тайлахаяа нүхөөр гараа һарбайгаад оруулба. Амарагайнгаа ойртоһые мэдэрээд, сэдьхэлни дэгдээ, хүсэл бадараа.

⁵ Инаг тэрэнээ оруулжа асархаяа яаран бодожо, хаалга руу ошоходом, үүдэнэй барюулда үнэртэ тоһон гарһаамни дуһалан байгаал даа.

⁶ Амараг тэрээндээ үүдээ нээбэб. Харин тэрэм эрьелдээд ябашоол. Ай, тэрэнэй ябаһые харахадаа, амяа табиха туйлдаа хүрөөб! Дуудахадам, харюусанагүй. Бэдэрхэдэм, олдоногүй.

⁷ Хотын гудамжаар эрьен ябадаг һүниин харуулшад намтай дайралдаад, хүхэржэ нязартар намайе сохёод, хубсаһымни тоножо абаа.

⁸ Иерусалим хотын басагад! Таанадые тарнидан гуйнаб! Амарагаймни хэрбээ олдобол, хайра дуранай түймэртэ шатан, хосоржо байһыем дамжуулыт.

Иерусалим хотын басагад:

⁹ Эмэгтэйшүүлэй дундаһаа эгээл һайхамнай! Шинии амараг юугээрээ бусад эрэшүүлһээ дээрэ юм? Шинии инаг юугээрээ бусад эрэшүүлһээ дээрэ болоод, маанадые гуйжа, тангариг эринэш?

Басаган:

¹⁰ Минии инаг үзэсхэлэн түгэс, эрүүл шиираг, хасар улаан, түмэн эрын дундаһаашье онсо!

¹¹ Тунамал алтан мэтэ туяарһан шарайтай, үһэниинь буржагар, хирээгэй үдэн мэтэ хилэн хара.

¹² Һүндэ умбан шунгаад, харзын дэргэдэ һуугааша сагаан тагтаа мэтэ нюдэдынь.

¹³ Хасарынь үнэрдэбэл, һайхан үнэртэй сэсэрлиг мэтэ. Урал аманиинь гэбэл, аятай хангалтай тоһо дуһааһан сараана сэсэг мэтэ.

¹⁴ Хоёр гарынь гэбэл, молор эрдэниин шэгэдхээтэй шэжэр алтан бахана мэтэ. Үбсүү бэень гэбэл, биндарьяа шулуу һуулгаһан заанай яһан һиилэбэри мэтэ.

¹⁵ Хоёр хүлынь гэбэл, сэбэр алтан һууритай гантиг шулуун бахана мэтэ. Минии амараг үндэр гоё хуша модотой Ливаанай уула мэтэ һүрөөтэй һайхан.

¹⁶ Үгэ хүүрынь илдамхан. Тэрэ шэгээрээ аятайхан. Иерусалим хотын басагад! Хайрата амарагни иимэл даа, хамагай һайхан андал даа!