Дуунай дуун 4 - Библи

¹ Инагни, ши үзэсхэлэн гоёш! Яахын арагагүй уран гоёш! Гивлүүрэй саана хоёр нюдэдшни сагаан тагтаа мэтэ энхэрэн нюугданхай. Хөөбэр үһэнэйш намилзан хүдэлхэнь Галаад хадаһаа уруудан ябааша ямаан һүрэгэй зэрэлгээн мэтэл.

² Дун сагаан шүдэдшни һаяхан нооһоо хиргуулаад, голһоо гараһан хонид мэтэ. Хундан сагаан тэрэ хонид бултадаа эхир хурьгатай, нэгэньшье һубайраагүй.

³ Уян гоё уралшни улаан тууза мэтэ үнгэ тодо. Булай хөөрхэн аманшни дура буляама һайхан. Унжаһан гивлүүрэй саанаһаа улаа бутарма хоёр хасаршни таһалан хубааһан анар жэмэс мэтэ харахада үзэсхэлэн гоё.

⁴ Хүзүүншни Давид хаанай мянгаад бамбайтай самхаг мэтэ, хэрэм мэтэ һүрөөтэй. Дээрэнь хүсэтэй эрэшүүлэй мянган бамбай үлгөөтэй.

⁵ Хоёр хөөрхэн хүхэншни сараана сэсэгэй дунда бэлшэдэг һалашагүй эхир инзагад мэтэ хөөрхэн.

⁶ Үүрые угтаһан һалхинай һэбшээлжэ, һүниин һүүдэрэй һүнэн зайлатар гүгэлэй һайхан үнэртэй уула өөдэ гарахамни.

⁷ Үзэмжэ түгэс хайратамни! Өө мөөгүй амарагни!

⁸ Һайхан ганса хубитамни! Хаанашье ябабал, намтай бай. Ливаанай уулада гараашье һаа, намтай хамта бусажа ерэ! Аманаа һарьдагһаа, Сэниирэй оройһоо, Хэрмоон уулын үндэр орьёлһоо, арсалан, барасай үүрэй дундаһаа намтай хамта бусажа ерэ!

⁹ Минии хубита, дүүхэймни! Харасаа нам руу нэгэл шэдээд, сэдьхэл зүрхымни эзэлээш. Эрдэни зүүдхэлээ ялас гүүлээд, эрьежэ харахадаал, эзэмдээш.

¹⁰ Минии хубита, дүүхэймни! Инаг шиниимни энхэрэлые үзэмэй дараһан архитай сасуулшагүй. Амараг шиниингээ түрхиһэн тоһые анхилма үнэртэй юунтэй зэргэсүүлхэбиб?

¹¹ Инагни, булай хөөрхэн уралшни балай амтаар намайе баяжуулжа, сагаан эдеэн, зүгын бал хэлэн дороһоош урдажа байна. Ливаан ороной сэнгэлиг ой үмдэдэг хубсаһаарш анхилжа байна.

¹² Минии хубита, дүүхэймни! Хаалтатай үүдэтэй сэсэрлиг мэтэ, хаажа таглаһан булаг мэтэ хайратамни сэбэр арюунши.

¹³ Шинии бэе сэсэрлиг мэтэ, анар мододтой, эрхим жэмэстэй, анхилма үнэртэй хинна, ая гангатай.

¹⁴ Ая гангаһаа гадна гүргэм сэсэг, зэгсэ, анхилма корица, үнэр һайтай, үнэтэ дабирхайтай ургамал модод, үнэтэ дабирхайтай һөөгүүд ургана.

¹⁵ Үзэсхэлэн тэрэ сэсэрлигтэ орьёлно тунгалаг булаг. Амидаралаар тэдхэгшэ горхон Ливаан уулаһаа урдана.

Басаган:

¹⁶ Хойто зүгэй һалхин, хүдэлыш! Урда зүгэй һалхин, үлеэгыш! Сэсэрлиг руум үлеэжэ эхилэ! Һайхан үнэрыень тараажа эхилэ! Инагни, мүнөө намдаа ерээрэй! Минии сэсэрлигтэ ороорой! Тансаг жэмэс бүриһээмни таһалан абажа амасаарай!