Дуунай дуун 3 - Библи

¹ Сэдьхэл зүрхэнэй амарагаа би һүниин туршада орондоо хүлеэжэ, хөөрэн дэгдэжэ, хүсэлөөр тэгүүлбэшье, инаг тэрэмни ерэбэгүй.

² Халуун оронһоо бодон харайжа, харанхы хотын гудамжа, талмайгаар харууһалан хэсэжэ амарагаа бэдэрээб. Харин би олобогүйб.

³ Һүниин харуултай уулзаад, би «Сэдьхэлэйм амарагые хараа гүт?» гээб.

⁴ Тэдэнһээ холодомсоороо удахагүй би амин хайратаяа олобоб. Тэрээндээ би таһа аһалдажа, түрэһэн гэрэйнгээ богоһоор алхуулжа, түрүүлһэн хонгор эжымни хэбэлдээ намайе олоһон тэрэ таһалгада оруултараа таһа тэбэреэд байгааб.

⁵ Иерусалим хотын басагад! Тала хээрын һогоон, бугые һануулан, таанадые тарнидан гуйнаб: Бэе бэеэ таалажа байхадамнай, маанадые бү үргөөгыт!

Гурбадахи дуун Басаган:

⁶ Сүл губиһаа хэн ерээб? Ямар эмэгтэй тэндэһээ ерэбэб? Сан табижа, утаа бааюулан, гүгэлэй үнэр анхилуулнам.

⁷ Харана гүт, тэрэниие! Соломоон хааниие жууза тэргэдэнь заларуулан, үргөөд наашань асаржа ябана. Жаран һайн хүсэтэй эрэ, Израиль нютагай эрэлхэг баатар аршалан ябана, харыт таанар!

⁸ Һэлмэ зүүһэн тэрэ эрэшүүл дайн дажарта һурамгай. Эритэ һэлмээ ташаадаа зүүбэл, хара һүниһөөшье далдирхагүй.

⁹ Ливаан нютагай эрхим модоор Соломоон хаан өөртөө гэжэ жууза хүүлээ бэлэйл.

¹⁰ Жуузын дүрбэн баханые гадар талаһаань мүнгөөр хушанхай. Орой дээбэринь алтаар бүриһэн, һандалинь үдхэн улаан үнгэтэй бүдөөр һайханаар бүрин бүтээгдээ. Иерусалим хотын басагад угалза шэрэн гоёоходоо, сэдьхэлэйнгээ дурые элирхэйлээ.

¹¹ Сион уулын басагад! Гэр байраһаа гараад ерыт! Хуримай титим толгойдоо табиһан Соломоон хааниие харагты! Түрэһэн эхэнь тэрэ титим түрынь үдэр үмдэхүүлээ бэлэй. Соломоон хаан тэрэ үдэр сэдьхэлэй баяр эдлээ бэлэй.