Дуунай дуун 2 - Библи

¹ Бардамай нэгэн би бэшэб. Харин би Шарооной талын сарнай, уулын зэрлиг сараана мүн!

Хүбүүн:

² Амарагни! Хээрын үүргэнэ үбһэн дунда сараана сэсэгэй үзэмжэтэйдэл адли олон түмэн басагадай дундаһаа онсо һайханиинь ши мүн!

Басаган:

³ Инагни! Уулын һаглагар мододой дунда алим модоной үзэмжэтэйдэл адли олон түмэн хүбүүдэй дундаһаа онсо һайханиинь ши мүн. Алим модоной һүүдэртэ һуугаад, үрэ жэмэсынь таһалан эдихэдэ амта шэмтэнь угаа һайхан.

⁴ Амараг тэрэмни гарһаам хүтэлэн, найрай танхимда намайе оруулаад, «дуран» гэһэн үгэтэй тугые далбаа болгон мандуулаа бэлэй.

⁵ Алим бэ, намда үзэм эдюулыт, алим хазуулжа тэнхээ оруулыт! Хүсэл шадални хүлгүй болоол.

⁶ Инагни, зүүн гараараа намайе хүзүүдэн, баруун гараараа эльбэн таалажа, сэдьхэлым доһолгон, хүсэлым нэмээнэш.

⁷ Иерусалим хотын басагад! Тала хээрын һогоон, бугые һануулан, таанадые тарнидан гуйнаб: Бэе бэеэ таалажа байхадамнай, маанадые бү үргөөгыт!

Хоёрдохи дуун Басаган:

⁸ Инагаймни дууе шагныт! Харыт, тэрэмни ерэжэ ябана! Дабаа гүбээ, уула нюрууе дабажа гаталһаар гүйжэ ябана!

⁹ Хангайн буга, талын зээрэн мэтэ хайратамни ши ямар һайхамши. Харыт, тэрэмни ханын хажууда зогсон, сонхоор хаража, сараалжын саанаһаа шагаан,

¹⁰ дуранайнгаа үгэ хэлэхэ гэжэ байна: Амараг гансамни! Гараад ерыш, инагни!

¹¹ Харана гүш, одоо үбэл үнгэршөө. Хүйтэн бороо шэбэрхээ болёо.

¹² Хүдөө талада сэсэг дэлгэржэ, хээрын шубууд дуулан жэргэжэ, сагаан тагтаа бусажа ерээд, бүгэдын гургаха саг болоо.

¹³ Инжир модоной жэмэс болбосоржо, уһан үзэмэй сэсэгшье нахилзажа, һайхан үнэрөөр анхилан байна. Хамагһаа һайхан хайратамни, бодоод ерыш мүнөө! Бултанһаа энхэргэн амарагни, гараад ерыш намдаа!

¹⁴ Хадын хабшалда хоргодон нюугдаһан сагаан тагтаа мэтэ энхэргэн минии, нюураа харуулжа, дуугаа соносхуулыш! Дуу хоолойшни ямар уянгатайб, дүрэ шарайшни ямар һайхан бэ!

Иерусалим хотын басагад:

¹⁵ Уһан үзэмэй сэсэрлигтэмнай модон бүхэн сэсэглэнхэй. Үнэгэнэй гүлгэд модо һүйдхөөнэ. Энээнэйнь урда баряад үгыт!

Басаган:

^16-17 Хайрата тэрэмни гансал минии. Харин би гансал тэрээнэйб. Үүрые угтаһан һалхинай һэбшээлтэр, һүниин һүүдэрэй һүнэн зайлатар талын сараана сэсэгэй дундуур хонин һүрэгөө тэрэмни бэлшээнэ. Хайратамни, ши бусажа ерэ. Буга, гүрөөһэн мэтэ дабхар-дабхар хадын хашалангые дабажа гаталһаар намдаа ерэ.