Аввакуум 2 - Библи

Эзэнэй хоёрдохи харюу

¹ Би манаанай үндэр самхаг руу абиран гаража, Эзэнэй намда харюусахые хүлеэн, гомдолоо юун гэжэ ойлгуулхаяа бодон зогсобоб.

² Эзэн намда иимэ харюу үгэбэ: – Үзэгдэлые бэшээд аба. Уншагшын бэлэхэнээр уншахын тула шулуун хабтаһанууд дээрэ элихэнээр бэшэ.

³ Тогтоогдоһон саг тушаа үзэгдэл юм. Теэд тэрэнэй удаараашье һаань, хүлеэгөөрэй, заабол бэелдэхэ. Тэрэ болюулагдахагүй, заабол ерэхэ.

⁴ Зай, бардам зантай хэн нэгэниие Би тоохогүйб. Үнэн сэдьхэлтэн этигэл һүзэгэйнгөөл ашаар амидарха.

⁵ Ехэрхэг зантай хүн эһээгдэжэ байгааша үзэмэй дараһан архидал оройдоошье тогтохогүй. Тэрэ үхэлэй орон мэтэ эдихэ дура хүсэлөө бүри ехэ болгожо, үхэлдэл адли садахагүй, бүхы арадуудые даран дарлан байха һанаатай.

Дарлагшадта заналтанууд

⁶ Дарлагша арадуудынь бултадаа тэрээн тушаа ябаган зугаа, наадалһан дуу дуулаха: «Өөрын бэшэ зөөреэр өөрыгөө баяжуулдаг хүн удаанай гү? Үри зээли арадууд дээрэ тохожо, тэрэ бэеэ зобооно!»

⁷ Шинии дарлалта доро байгаашад гэнтэ урдаһааш бодожо, шамайе һэжэржэ эхилхэл. Дээрмэшэд добтолжо, ши тэдэнэй хүнэһэн болохолши.

⁸ Олон арадуудые дээрмэшэлһэнэйш түлөө бусад бүхы арад түмэн урдаһааш тулан, хүнэй шуһа урасхуулһан, орон нютагыень, хото һууринуудыень, ажаһуугшадыень хооһоруулан һүйдхүүлһэнэйш түлөө шамайе хэһээн дээрмэшэлхэ.

⁹ Өөрын гэр байрада хуули бусаар эд зөөри суглуулааша, гэнэ усалһаа болгоомжолон, үндэр газарта гэр уурхайгаа түхеэрээшэ хэн нэгэн абарагдахагүй!

¹⁰ Олон арадуудые усадхажа, нүгэл үйлэдөөш. Иигэжэ гэр бүлэдөө ши гай тодхор татабаш.

¹¹ Нээрэһээ хана хэрэмһээ шулуунууд хашхаржа, модон байшангай хүндэлэбшэнүүд иимэ зондо иигэжэ харюусаха:

¹² «Шуһа урасхуулан хото баригша, хүсэрхэлөөр һуури табигша абарагдахагүй!»

¹³ Зай, арад үндэһэтэнэй бүхы шадалаа эршэдэн ажаллаһаниинь гал дүлэндэ хосорхо, дэмы һалаха гэжэ Түмэн Сэрэгтэ Эзэн тогтоогоо бэшэ аал?

¹⁴ Юуб гэбэл, уһан далайе дүүргэдэгтэл, газар дэлхэй хадаа Эзэнэй алдар тухай мэдэсээр дүүрэнхэй байха.

¹⁵ Дүтын хүндэ муу муухай юумэ хүсэн, унда барижа, тэрэниие доромжолхо, баһахаяа һогтоогшо ши абарагдахагүйш!

¹⁶ Алдар солын орондо ши эшэмхэй муу байдал амжахаш. Мүнөө ши уужа-һогтожо, өөрыгөө эшхэбтэр байдалда оруулхаш. Эзэн эшхэбтэр байдалай ундатай аяга шамда бариха!

¹⁷ Ливаанай ой модо хайра гамгүй усадхааш. Ан амитадые, улад зониие хюдааш, орон нютагуудые хооһоруулааш, һандаргааш. Энээнэй түлөө ши зэмээ амасахаш.

Вавилооной хүсэгүй онгонууд

¹⁸ Шүтээниие хүнэй һиилэн бүтээһэн хойно тэрэнэй ашаг туһа юун байхаб даа. Энээниие бүтээгшэ хүн гар бүтээлдээ этигэн найдаал ааб даа, теэд худал хуурмагые заадаг, дуугаржа шадахагүй хэмэл хүрэгүүдһээ ямар туһа байхаб?

¹⁹ Модоной тайрадаһанда хандан «һэри!» гэжэ, дүлии шулуунда «бодо!» гэжэ хэлэдэг хүн абарагдахагүй. Тэдэ яагаад багша боложо шадахаб? Харыт, тэрэ алта мүнгөөр шэмэглэгдэнхэй, теэд ямаршье амисхал тэрээндэ байхагүй.

²⁰ Эзэн нангин Һүмэ соогоо оршоно. Бүхы дэлхэй Тэрэнэй урда дуугүй байхань болтогой!