Аввакуум 1 - Библи

¹ Энэ хадаа лүндэншэ Аввакуумда Эзэнэй үзүүлһэн үзэгдэл.

Лүндэншын түрүүшын гомдол

² Эзэн, би хэды болотор туһаламжа эрин дуудажа, Та хэды болотор соносонгүй байха юмта? Би хүсэрхэлгэ тухай Танда хэды болотор орилон байбашье, Та абархагүй юмта?

³ Юундэ Та намда гэм бурууе үзүүлжэ, юундэ бузар муухайе харуулнат? Хэрзэгы ааша болон хүсэрхэл урдамни үзэгдэнэ, хуули хазагайруулха, добтолон орохо ябадал бүри олошорон байнал.

⁴ Тиимэһээл хуули сахигданагүй, үнэн шударга зарга шүүбэри гэжэ үгы. Юуб гэбэл, муу муухай зон зүб үнэн зониие диилэн байна, иигэжэл үнэн шударга зарга шүүбэри гажана.

Эзэнэй харюу

⁵ Эзэн иигэжэ арад түмэндөө айладхаа: «Арадуудай дундуур харагты, анхаралтай үзэгты, гайхагты! Таанадта дуулгаашье һаа, танай үнэншэхөөр бэшэ Агууехэ үйлэ хэрэг эдэ үдэрнүүдтэ Би бүтээхэмни.

⁶ Өөрын бэшэ газар уһа эзэмдэхэеэ дэлхэйн энгээр ябааша Вавилооной хэрзэгы, дошхон арадые Би бодхоохоб.

⁷ Тэрэ ехэ һүрдэмөөр, аймшагтай. Тэдэ өөрөө өөһэдтөө хуули ёһо, засаг журам зохёодог.

⁸ Хүлэгүүдынь ирбэсһээ хурдан, үдэшэ гарадаг үлэн шоноһоошье түргэн. Мори унаһан сэрэгынь алас холоһоо гүйдэлөөрөө ерэжэ байна, олзо руугаа шуумайгша бүргэд мэтэ ниидэн ерэнэ.

⁹ Тэдэ бии хүсөөрөө урагшаа шармайн, дээрмэшэлхэеэ ерэнэ. Баряанда абааша зониинь элһэн мэтэ тоо томшогүй.

¹⁰ Хаашуулые тэдэ доромжолно, захирагшадые наадална. Бүхэлэлтэ бүхэниие тэдэ шооложо, шулуу обоолон, тэрэниие эзэлнэ.

¹¹ Һалхин мэтэ тэдэ үнгэржэ, хүсэ шадалдаа найданхай, гансал хүсые бурхан мэтээр шүтэнхэй ябана».

Лүндэншын хоёрдохи гомдол

¹² Эзэмни, Та эртэ урда сагһаа хойшо Бурхан бэлэйт. Та минии нангин болон мүнхэ Бурхан мүн. Эзэмни, Хамгаалагшамни, Та маанадые хэһээхыень тэдэниие асараат.

¹³ Муу муухай юумэ, харшалалта хаража байдаггүйт. Теэд мүнөө юундэ муу муухай зониие хаража, үнэн шударга хүниие гэмтэй хүнэй диилэжэ байхадань абяа аниргүй байнабта?

¹⁴ Загаһанда гү, али хүтэлхэ удамаршагүй мүлхидэг амитандал адляар юундэ зондо ханданабта?

¹⁵ Дайсан тэдэниие дэгээгээр гоходон татажа, губшуураар шүүрдэн барижа, баярлан-хүхин байнал.

¹⁶ Тэрэ губшууртаа мүргэжэ, үргэл үргэжэ байна, юуб гэхэдэ, губшуурынь тэрэниие эрхим хоолоор хангана шуу.

¹⁷ Тэрэ хайра гамгүйгөөр губшуураа татажал, арадуудые хюдажал байха юм аал?!