Авдии 1 - Библи

Бурханай Эдоомые шүүн хэһээлгэ

¹ Эзэн Бурханай Эдоом тухай иигэжэ айладхаһые лүндэншэ Авдии үзэгдэл соогоо иигэжэ дуулаһан-хараһан байна: Бидэ Эзэнһээ иимэ мэдээ дуулаабди – үндэһэ яһатадта Эзэн элшэн эльгээнхэй, «Бодогты! Эдоомой урдаһаа байлдаа үүдхэе!», – гэжэ соносхоо.

² Үзөөрэй, Эдоом, Би шамайе арадуудай дунда тоогдохоор бэшэ ахир бага болгохоб. Шамайе булта шоо үзэхэ.

³ Бардам заншни шамда һаад, тушаан болоо. Хабсагайн хабшуул нүхэндэ хорожо, хадын үндэртэ байра байдал түхеэрээд, «Намайе хэншье газарта буулгажа шадахагүй» гэжэ бодонош.

⁴ Бүргэд шэнги үндэртэ, одо мүшэдэй дунда уурхайгаа түхеэрээшье һааш, тэндэһээш Би шамайе доошонь унагаахаб! – гэжэ Эзэн Бурхан айладана.

⁵ Һүниндөө хулгай хэгшэд, дээрмэшэд шамда орожо ерэбэл, хэрэгтэйл юумэеэ дураараа шамһаа абан ошохо бэшэ гү? Уһан жэмэс суглуулагшад шамда ерэбэл, нэгэ хэдышье жэмэс түүнгүй үлөөхэ бэшэ гү? Харин дайсадшни шамайе дууһан аршаад ошохол!

⁶ Эсаавай зөөри нэгжэгдээ, нюуса дарасань буляагдаа!

⁷ Шамтай холбоотой хамаг зон хилэ руу шамайе шахажа, эбтэй нүхэдшни мэхэлжэ, хүсөөрөө шамайе диилэхэ. Шамда хүндэлүүлдэг зон урьха шамда табиха, Тэрээниие ши ойлгохошгүйш!

⁸ Эзэн айладажа байна: «Тэрэ үдэр Би мэргэдые Эдоомдо, ухаатаниие Эсаавай уулада усадхахаб.

⁹ Тэмаанай эрэлхэгүүд зоригоо алдаха, Эсаавай хадада хамаг зон хюдагдаха.

¹⁰ Ши Яков дүүгээ харшалһанай түлөө муу сууда гарахаш, хэтэ мүнхэдөө хосорхош.

¹¹ Хариин сэрэгшэдэй баялигыень тоножо, хариин зоной хаалгаарнь орожо, Иерусалим тухай жээрэб хаяжа байхадань, хажуу тээһээ хабаагүй хаража зогсоходоо, ши тэдэнэй нэгэн болоо гээшэш!

¹² Өөрын дүүгэй золгүй тэрэ үдэр бардамлаха бэшэ, Иудын зоной һүйдхэлтэ үдэр баясаха бэшэ, тэдэнэй зоболонгой үдэр энеэжэ байха бэшэ байгааш.

¹³ Минии арад түмэнэй гай гамшагай үдэр тэрэнэй хаалгаарнь орожо, зоболонгыень хоролхон хараха, хогшол зөөридэнь гар хүрэхэ,

¹⁴ тэрьелэгшэдые харгын уулзуурта отожо алаха, үлэгшэдыень тэрэ зоболонто үдэр дайсанай гарта барижа үгэхэ ёһогүй һэнши».

Эзэнэй үдэр

¹⁵ Ушарынь хадаа Эзэнэй үдэр бүхы үндэһэ яһатанда ойртожо байна: «Шинии үйлэдэһэн үйлэ шам дээрэ үйлэдэгдэхэ. Шинии хэһэн хэрэг тархи дээрэш бууха.

¹⁶ Минии арюун хадада шуһа адхаһантайш адли бусад арадууд шинии шуһа адхахал. Тэдэ уужа залгяад, урдань оршожо байгаагүй мэтэ үгы болохол.

¹⁷ Гэбэшье Сион уулада зондо абарал ерэжэ, тэрэ уула арюун болохо. Яковай удам өөрын зөөри эзэмшэхэ.

¹⁸ Удаань Яковай удам гал боложо, Иосифой удам дүлэн болохо, Эсаавай удам һолоомо шэнгеэр соробхилхо. Эсаавай уг удамһаа нэгэшье хүнэй амиды үлэхэгүй болотор тэдэниие галда шатааха», – гэжэ Эзэн айладаа.

¹⁹ Урда зүгэй зон Эсаавай уулануудые эзэмшэхэ, далайн нюрууда ажаһуудаг зон Пилиштые эзэмдэхэ. Тэдэ Эпрааимай ба Самариин газар нютаг эзэмшэхэ. Бэньямиинэй обог Галаадые эзэмшэхэ.

²⁰ Халаахада ажаһуудаг израильшууд Зарэпаат хүрэтэр Ханаһаанай газар эзэлхэ. Иерусалимһаа гаража, Сэпараадта һууха баатай болоһон зон Нээгэбэй хотонуудые эзэмшэн абаха.

²¹ Илагшад Сион уула ерэжэ, Эсаавай уулын зониие шүүбэрилхэ, хан түрэ Эзэнэй болохо.