Амоос 9 - Библи

Үргэлэй шэрээ дээрэ зогсоһон Эзэн Бурхан үзэгдэлдэ харагдаба

¹ Эзэн Бурханиие хараа һэм. Үргэлэй шэрээ дээрэ зогсоод, Тэрэ айладаа: Богоһын доһолтор баханын дээрэһээ сохи! Зоной толгой дээрэ Һүмэ унаг лэ! Амиды үлэгшэдые һэлмээр усадхахаб, хэншье Намһаа зугадан тэрьедэжэ шадахагүй, хэншье амиды үлэхэгүй!

² Үхэлэй орон руу хороошье һаань, тэндэшье тэдэниие олохоб. Огторгой руу дэгдээшье һаань, тэндэшье мүн лэ хүрэхэб.

³ Кармээл уулын орой дээр хороошье һаань, оложо, тэдэниие барихаб. Далайн оёорто Намһаа хоргодоошье һаань, могой эльгэжэ хадхуулхаб.

⁴ Дайсан тэдэниие баряанда абаашаба гэлэй, сэрэг хойноһоонь эльгээхэдэм, һэлмээр тэдэ усадхагдаха, жаргал бэшэ, гай тодхор тэдээндэ ушаруулхаяа харасаа тэдээн руу шэглүүлхэб.

Бурханай һүр жабхалан

⁵ Түмэн Сэрэгтэ Эзэн газарта халта хүрэбэл, тэрэнь гуйбалзаха, ажаһуугшадынь бултадаа гашуудаха. Нил мүрэн мэтэ газар дээшээ хэлбэлзээд, Египедэй Нилдэл адли һөөргөө номгорхо.

⁶ Огторгой руу гэшхүүр байгуулааша, газар дэлхэйдэ Өөрын үргөө бата һуурижуулагша далайн уһа дууһан суглуулжа, газар дайдаар адхан тараагша Нэгэнэй нэрэ – Эзэн!

Израиль бусад арадуудһаа юугээрээ дээрэб?

⁷ Эзэн иигэжэ айладана: Израильшууд, таанар Намда Күүшэй зондол адлит. Египедһээ израильшуудые, Каптоорһоо Пилиштын арадые, Киирһээ араамшуудые асараа һэм.

⁸ Би, Эзэн Бурхан, Өөрын харасаа энэ нүгэлтэ хан түрэ руу шэглүүлбэб! Газарай хүрьһэнһөө энэ хан түрые үгы хэхэб, гэбэшье Яковай гэр бүлэ усадхахагүйб.

⁹ Захиржа, Израилиие бүхы арадуудай дундуур сасахаб, һагшуураар һагшаһандал, нэгэшье шулуу үлөөнгүй һагшахаб.

¹⁰ «Гай тодхор болохогүй, маанадта тэрэ хүрэхэгүй» гэжэ арад түмэнэйм дундаһаа хэлээшэ нүгэлтэд бултадаа һэлмээр сабшагдаха!

Израиль ерээдүй сагта һэргээн бодхоогдохо, һалбаран мандаха

¹¹ Тиихэдэнь Би Давидай унаһан майханиие дахин бодхоохоб, ханын соорхойнуудые бүглэхэб, һандарһые дахин бүрин бүтэн болгохоб, урдандань адляар заһабарилхаб.

¹² Эдоомой үлдөөсэ зонһоо болон бусадһаа газар буляан абажа, арад түмэндөө дамжуулхаб. Бусад угсаатан бултадаа Минии хүнүүд болохоор дуудуулһан гээшэ! Эдэ бүгэдые бултыень үйлэдэдэг Би, Эзэн, айладажа байнам!

¹³ Эзэн айладана: Газар элдүүрилжэ үрдеэгүйдэнь ургаса хуряаха саг ерэхэ, уһан үзэмэй модо тарижа байхада, жэмэс шахаха, үзэмэй дараһан архи үйлэдбэрилхэ саг мүндэлхэ. Үзэмэй дараһан архи хадаһаа урдаха, гүбээнүүд зөөлэн жэмэс болохо! Удахагүй иимэ саг ерэхэ.

¹⁴ Өөрын арад түмэн Израильда урданайнь һалбарал бусаахаб: хооһорһон хотонуудые тэдэ дахин шэнээр барижа, зониие байрлуулха; уһан үзэмэй модо һуулгажа, үзэмэй дараһан архи ууха; сэсэрлиг ургуулжа, жэмэс эдихэл!

¹⁵ Түрэл дайдадань өөһэдыень батаар һуурижуулхаб, тиихэдэм, тэдээндэ үршөөһэн газарһаам хэншье тэдэниие һуга татан гаргажа шадахагүй! Иигэжэ танай Эзэн Бурхан айладана гээшэ.