Амоос 8 - Библи

Эдеэшэһэн жэмэстэй араг үзэгдэл соо харагдаба

¹ Эзэн Бурхан намда иимэ үзэгдэл үзүүлбэ: эдеэшэһэн жэмэс араг соо байна хэбэртэй.

² Тэрэ: – Юу харанаш, Амоос? – гэжэ асууба. – Эдеэшэһэн жэмэс араг соо байна, – гэжэ харюусабаб. – Минии арад түмэн Израилиин хэһээлтэ амасаха сагынь тулаа! Би бэшэ тэдэниие хүлисэхэгүйб, – гэжэ Эзэн намда айладаа бэлэй.

³ Тиигэбэл, ордоной хүхюу дуунууд сурхирса уйлаха абяан боложо хубилха. Хэды олон үхэһэн бэе хаа-хаанагүй хаяатайб! Ааляарыт!

Гай тодхор амасаха, Эзэнэй үгэнүүдые дэмы бэдэрхэ үдэрнүүд ерэнэ

⁴ Ядуу зониие харшалаашад, үгытэйшүүлые усадхаагшад, шагнагты!

⁵ Таанад иигэжэ хэлэнэт: Һарын шэнэ хэзээ үнгэрхэ гээшэб? Хилээмэ худалдаха байгаалди. Амаралтын үдэр хэзээ дууһахаб? Таряа талха худалдаха байгаабди. Хэмжэдэг амһарта бага болгохобди, үнэ сэн дээшэнь бодхоохобди, хэмжүүр шулуу һэлгээд, буруу хэмжэн мэхэлхэбди!

⁶ Ядуу хооһон хүниие мүнгөөр, үгытэй хүниие хоёр паар шаахайгаар худалдан абахабди! Мэхиинэшье худалдажа шадахалди!

⁷ Яковай омогорхолоор Эзэн тангариглаа: хэрэгүүдынь хэтэ мүнхэдөө мартахагүйб!

⁸ Иихэдэнь газар яагаад доһолхогүйб даа?! Бүхы зониинь гашуудан байхал! Эрьеһээ халиһан Нил мүрэн мэтэ газар дээшээ хэлбэлзээд, Египедэй Нилдэл адли һөөргөө номгорхо.

⁹ Тиихэдэнь гэгээн сагаан үдэр нарые хиртүүлхэб, үдэрэй тэгэн дунда харанхые газарта буулгахаб!

¹⁰ Һайндэрнүүдыетнай – гашуудал, дуунуудыетнай хүдөөлүүлгын уйлаан болгохоб. Таар таһардаһанда бүгэдые хубсалуулхаб, хүн бүхэн толгойгоо хюһаха. Ори ганса хүбүүн тухайгаа гашуудаһантай адли ехэ гашуудал болохо, үдэр бүхэн гай гашуудалай үдэр болохо.

¹¹ Удахагүй Би энэ орон нютаг руу үлэсхэлэн хооһые эльгэхэб. Хоол эдихэеэ үлдөөд байһан бэшэ, унда уухаяа ангаад байһан бэшэ, Минии, Эзэнэй, айладхал жүрөөдэһэн байдал болохо! – гэжэ Эзэн Бурхан айладана.

¹² Тиихэдээ зон Эзэнэй үгэ бэдэрэн, өмнө далайһаа өрнө далай руу, умара зүгһөө дорно зүг руу ябаха, түгэншэлхэ, теэд олохогүй.

¹³ Удаань залуу, һайхан хүбүүд, басагадшье ехээр ангаһандаа хүсэгүй болон унаха.

¹⁴ Самариин нүгэлөөр тангариглагша хүн, «Даан, бурханаартнай тангаригланаб», үгышье һаа, «Бэһээр-Шээбэ руу ошоһон харгы замаар тангаригланаб» гэгшэд бүдэрэн унаха, бэшэ бодохогүй.