Амоос 7 - Библи

Таршаа шумуул, гал бороо болон хүнгэн сагаан түмэртэй гурбан үзэгдэл

¹ Эзэн Бурхан намда иимэ үзэгдэл үзүүлбэ: үбһэ сабшалгын удаа, хожом тариһан ургасын эдеэшэхэдэ таршаа шумуулые Тэрэ бии болгоно хэбэртэй.

² Таршаа шумуул дэлхэйн бүхы ургамал эдижэ һалгаахадань, би иигэжэ зальбарааб: «Эзэн Бурхан, үршөөгыт! Яковай үри һадаһан амиды мэндэ үлэхэ гээшэ гү? Тэдэ угаа үсөөн шуу».

³ Эзэн шиидхэбэреэ хубилгажа, «Иимэ юумэн болохогүй!» – гэжэ айладхаа.

⁴ Эзэн Бурхан намда иимэ юумэ үзүүлээ: Тэрэ гал бороо дуудана хэбэртэй. Тэнгис далай дүрэлзэбэ, хубинь шатажа дууһаба.

⁵ Би иигэжэ зальбарбаб: «Эзэн Бурхан, иимэ юумэ бү хыт. Яковай үри һадаһан амиды мэндэ үлэхэ юм аал?!»

⁶ Эзэн шиидхэбэреэ хубилгаба. «Энэшье болохогүй» – гэжэ Эзэн Бурхан айладаа бэлэй.

⁷ Тэрэ намда иимэ үзэгдэл үзүүлбэ: Эзэн Өөрөө хүнгэн сагаан түмэр ханын дэргэдэ байна, гартань хүнгэн сагаан түмэр.

⁸ Эзэн намһаа: – Юу хаража байнаш, Амоос? – гэжэ асууба. – Хүнгэн сагаан түмэр, – гэбэб. – Өөрын арад түмэн Израилиие удахагүй хүнгэн сагаан түмэр мэтэ болгохоб! Би тэдэниие дахин хүлисэхэеэ болёоб.

⁹ Исаагай нангин зүйлнүүд үгырэн-хооһорон байха, Израилиин нангин юумэнүүд һандарал болохо. Еробоһаамай бүлын урдаһаа һэлмэеэ һугалан далайхаб! – гэбэ.

Амоос болон Бэт-Ээлэй санаартан Амацияа

¹⁰ Бэт-Ээлэй санаартан Амацияа Израилиин хаан Еробоһаамда иигэжэ дамжуулба: – Израильшуудай дунда буһалгаа шинии урдаһаа хэхэеэ Амоос бэлдэжэ байна. Орон нютаг тэрэнэй үгэ хүүр шагнаха дурагүй болонхой.

¹¹ «Еробоһаам һэлмээр сабшагдаха, Израиль хариин газар руу баряанда ошохо», – гэжэ Амоос хэлэжэ байна.

¹² Амацияа Амоосдо: – Зүгнэгшэ, энэ дары Иуда руу яба! Тэндэ зүгнэжэ, хоолоо оложо бай!

¹³ Бэт-Ээлдэ лүндэн бэшэ бү таби! Энэ болбол хаанай нангин газар, улас түрын нангин үргөө, – гэбэ.

¹⁴ Амоос Амацияада: – Лүндэншэ бэшэб, лүндэшын угайшье бэшэб. Мал харууһалжа, шикмаа модо ургуулжа байдаг хүмби.

¹⁵ Теэд Эзэн намайе хонидһоомни таһалжа, «арад түмэн Израильдам лүндэн таби» гэжэ захираа.

¹⁶ Мүнөө ши Эзэнэй айладхал шагна! «Израильда лүндэн бү таби, Исаагай гэр бүлэдэ бү тунхагла» гэнэш.

¹⁷ Тиимэһээ Эзэн иимэ айладал дуулгана: «Һамганшни янхан эхэнэр болохо, үхи хүүгэдшни һэлмээр усадхагдаха, газар хэмжэгшэ газарыеш бусадта хубаан тарааха, өөрөө ши нангин бэшэ газарта хосорхош. Израиль баряанда хариин дайда руу туугдаха!»