Амоос 6 - Библи

Бардам зантай, хашалгүй амархан һуугааша Израильда гай тодхор тохёолдохо

¹ Арадай удамаршад, бүхы Израилиин түшэг тулгуубари таанадта, Сион уула дээрэ хашалгүй байгаашадта, Самариин гүбээ дээр амархан һуугаашадта гай тодхор тохёолдохо!

² Калнээ ошоод харыта, агууехэ Хамаат руушье ошыт, Пилиштын Гаат руушье ябаарайт, – эдэ хан түрэнүүдһээ таанад хүсэтэй аалта?!

³ Гай гасалангай үдэр холодуулан, болзорынь хойшо татан байха һанаатайт. Теэд гансал хүсэрхэл мандахые ойртуулнат.

⁴ Заанай яһаар бүтээгдэһэн шэрээнүүд дээр хэбтэн һагад һуужа, зөөлэн үнжэгэн мяхатай хурьга, тарган, тобир тугал зооглон байнат.

⁵ Морин хуурай дууряан доро, Давидһаа муу бэшэ хүгжэмшэд аялга дуу дуулана.

⁶ Иосифой уг удамай һалажа байгаа тухай түр зуурханшье һанаа зобонгүй, тахилай аягаһаа үзэмэй дараһан архи уужа, эрхим гүгэл түрхинхэй һуунат.

⁷ Тиимэһээ таанад эгээл түрүүн туугдахат. Тэндэ хэбтэжэ байха арга таанадта олдохогүй!

⁸ Түмэн Сэрэгтэ Эзэн Бурхан Өөрөөрөө тангариглажа, иигэжэ айладана: Яковай бардам зан Намда жэгшүүритэй, бүхэлэлтэнүүдыень үзэн яданаб. Хотые бүхы ажаһуугшадтайнь хамта дайсадай гарта дамжуулхаб!

⁹ Ямар нэгэн гэртэ арбаханшье зон үлөө һаа, тэдэшье хосорхо.

¹⁰ Түрэлэй хэн нэгэн наһа барагшые хүдөөлүүлхэеэ, шарилынь занданшуулхаа ерэхэ. Нүгшэһэн бэе гэрһээ гаргажа байхадаа Тэрэ иигэжэ асууха: «Үшөө хэн байнаб?» Тэрэнь харюусаха: «Хэншьегүй». Тиихэдэнь тэрэ иигэжэ хэлэхэ: «Ааляар! Эзэниие дурдаагүй һаа, дээрэ».

¹¹ Удахагүй Эзэн ордонгуудта һандарал болохые, гэрнүүдтэ һандархай болохые захирха.

¹² Хабсагайгаар морин соёрхо гү?! Далайн уһа сар хүллэн хахалдаг юм гү?! Тэрээн мэтэ таанад зүб хуулиие хорон, зүб шударгые шаралза болгонот.

¹³ Ло-Дэбаарта баясан бахархажа, «Карнааһим өөһэдөө эзэлэн абажа шадаабди!» гэлдэнэт.

¹⁴ Түмэн Сэрэгтэ Эзэн Бурхан иигэжэ айладана: «Израильшууд, таанадые Лэбоо-Хамаатһаа Арабаагай нюруу хүрэтэр хашан үлдэхэ арадые удахагүй таанад руу ябуулхам!»