Амоос 4 - Библи

¹ Самариин эхэнэрнүүд, таанад тобир тарган үнеэнүүд мэтэт! Таанар ядуу зониие дарлажа, үгытэйшүүлые харшалан даран байнат! Үбгэдтөө «Үзэмэй дараһан архи асар! Уухамнай!» гэжэ хэлэнэт.

² Эзэн Бурхан арюун сэбэр нэрээрээ тангариглаа: Үзөөрэйгты, ээлжээнтнай ерэхэ даа, таанарые дэгээгээр, үхи хүүгэдыетнай хахууляар татан шэрэн абаашаха!

³ Таанар хэрэм ханын сүмэрхэйгөөр гаргуулжа, нэгэ нэгээр шэрэгдэн, Һармоон руу хаягдаха болонот! Энэ болбол Би, Эзэн, тунхаглаа мүн!

Нүгэл үйлэдэгшэд тахил тахижал байг – эдэ тахилнуудынь Эзэндэ таалагдахагүй

⁴ Бэт-Ээл руу ерэжэ, гэм хэгты! Гилгаалда гэм зэмээ олошоруулагты! Үглөө бүри үргэлнүүдээ асаржа, гурбан үдэрэй нэгэ удаа арбанай нэгэ хубиие үргэн байгыт!

⁵ Эһэһэн талхаар талархалай үргэл үргэгты, һайн дуранай үргэлнүүд тухайгаа шангаар хашхаран тунхаглыт. Израилиин улад зон, таанад энээндэ дуратай бэшэ аалта?! гэжэ Эзэн Бурхан айладхажа байна. –

⁶ Энээнэй түлөө Би танай хотонуудаар үлэсхэлэн хооһон байдал тохёолдуулааб, хүдөө нютагуудаартнай шэмхэшье таряан үлөөгүй. Теэд таанар Нам руу эрьеэгүйт! Энэ болбол Би, Эзэн, тунхаглана мүн!

⁷ Үшөө гэбэл, ургаса хуряаха үе саг болотор гурбан һарын үлөөд байхада Би таанарһаа бороо татаад байгааб. Нэгэ хото руу бороо ябуулжа, нүгөө хото руунь бороо ябуулангүй байгааб. Нэгэ газарта бороо орожо байхада, нүгөө газарта бороо оронгүй, хатаа бэлэй.

⁸ Хоёр-гурбан хотонуудай улад зон уһа бэдэрэн, хүршэ хото руу ябаад үзөө, теэд тэндэшье уһан элбэг байгаагүй. Теэд таанар Нам руу эрьеэгүйт. Энэ болбол Би, Эзэн, тунхаглана мүн!

⁹ Би таанарай ургасые хуурай һалхи, үбшэ хабшаар нэрбүүлээб. Сэсэрлигүүдыетнай, уһан үзэмэй сэсэрлигүүдые, чидүүн болон оливын мододыетнай хорхой эдижэ байгаа. Теэд таанар Нам руу эрьеэгүйт! Энэ болбол Би, Эзэн, тунхаглана мүн!

¹⁰ Египедтэ үйлэдэһэндэл адляар Би таанад руу гай гамшиг эльгээгээб. Залуу зонииетнай Би һэлмээр сабшан усадхааб. Дайсад моридыетнай абаашаа. Үхэһэн сэрэгшэдэйтнай һэенүүдһээ үмхэй муухай үнэр танар хотон хүреэнүүдээртнай таража, таанад тэрээгээр амилан байгаат. Теэд таанар Нам руу эрьеэгүйт. Энэ болбол Би, Эзэн, тунхаглана мүн!

¹¹ Содом болон Гоморрые һандаргааһандаа адляар Би таанад руу тон тиимэ һандарал эльгээгээб. Таанар гал дүлэнһөө шүүрэн абагданхай сусал мэтэ байгаат. Теэд таанар Нам руу эрьеэгүйт. Энэ болбол Би, Эзэн, тунхаглана мүн!

¹² Тиимэһээ, Израиль, Би шамда нэгэ юумэ эдюулхэб даа! Тиимэһээ Минии шамда иимээр хандаха байһанда, Израиль, бэлдэн бай, өөрын Бурханиие угтаарай!

Бурханай һүр жабхалан

¹³ Хараарайгты, хада уулые бии болгожо, һалхи бүтээдэг, Өөрын бодол түсэбые зондо мэдүүлдэг, үүрэй туяае харанхы болгожо, дэлхэйн үндэр газарнуудые гэшхэн ябадаг Нэгэн гэбэл, Түмэн Сэрэгтэ Эзэн мүн!