Амоос 2 - Библи

Эзэн Моһаабые шүүбэрилэн хэһээнэ

¹ Эзэн иигэжэ айладхаа: Моһаабай улад зон гэмээ нэмээһээр. Шиидхэһэнээ Би болюулхагүйб. Эдоомой хаанай яһа шатаажа, избёосхо болгоһондонь,

² Моһааб руу гал эльгэхэб, Кэриһоодой хэрэмүүд галда дүрэхэ! Байлдаанай шаг шууяан дунда, бүреэгэй дуутай хамта Моһааб хосорхо!

³ Энэ орон нютагай удамаршые хюдахаб, тэрээнтэй хамта бүхы түшэмэлынь усадхахаб!

Эзэн Иудын уладые шүүбэрилэн хэһээнэ

⁴ Эзэн иигэжэ айладхаа: Иудын улад зон гэмээ нэмээһээр. Шиидхэһэнээ Би болюулхагүйб. Һургаалыем буруушаажа, хуули ёһонуудыем сахяагүйнь түлөө, эсэгэнэрэйнь дагадаг онгонуудай замһаань тэдэниие хадууруулһанай түлөө

⁵ Иуда руу гал эльгэхэб, Иерусалимай хэрэмүүд галда дүрэхэ!

Эзэн Израилиие шүүбэрилэн хэһээнэ

⁶ Эзэн иигэжэ айладхаа: Израилиин улад зон гэмээ нэмээһээр. Шиидхэһэнээ Би болюулхагүйб! Гэмгүй хүниие мүнгөөр, үгырһэн нэгэниие нэгэ паар шаахайгаар худалдажа байгаал!

⁷ Үгытэй хооһон зониие газарай хумхаа тооһон руу шэдэнэ, туһагүй ядуу зониие харгы замһаань хадууруулна. Нангин нэрыем бузарлан, эсэгэ хүбүүн хоёр нэгэ залуу эхэнэртэй унтана.

⁸ Үри шэриинь түлөө бариса боложо абтаһан хубсаһан дээрэ үргэлэй шэрээгэй дэргэдэ хэбтэжэ, бурхадайнгаа гэртэ тэдэ торгуулагдаһан нэгэнэй үзэмэй дараһан архи уужа байнал!

⁹ Харин Би тэдэнэй түлөө эмоор угсаатаниие усадхаа бэлэйб. Хуша модон мэтэ тэдэнэр үндэршье һаань, сарса модон мэтэ хүсэтэй байгаашье һаань, Би тэдэниие оройһоонь эхилээд, үндэһэн хүрэтэрынь усадхааб.

¹⁰ Египедэй орон нютагһаа таанадые Би гаргаа бэлэйб, дүшэн жэлэй туршада сүл губяар хүтэлэн ябааб. Эмоор зоной газар уһые таанадай эзэмшэлгэдэ дамжуулхын тула.

¹¹ Таанарай зарим хүбүүдые лүндэншэд, зарим залуушуулыетнай өөрыгөө Эзэндэ зорюуланхай болгооб. Тиимэ бэшэ аал, израильшууд?! Энэ болбол Би, Эзэн, айладхана мүн!

¹² Харин таанар өөрыгөө Эзэндэ зорюуланхай зондо үзэмэй дараһан архи уулгажа, «Лүндэн бү табигты» гэжэ лүндэншэдтэ захиран, амыень таглан байгаат.

¹³ Хараарайт, таряанай боолтоор дүүрэн ашаатай тэргэ мэтэ болгон, таанарые дарахаб, хүдэлжэ шадахаяа болихот.

¹⁴ Эгээл хурдан хүнэй хурдань мөхөжэ, эгээл хүсэтэй хүнэй хүсэнь буураха, эрэлхэг зоригтойшье амияа абаржа шадахагүй.

¹⁵ Һурша ном татаха хүншье байрадаа тогтожо шадахагүй, хүл хурданшье тэрьедэжэ үрдихэгүй, моритой хүншье амияа абаржа шадахагүйл.

¹⁶ Сэрэгшэдэй дундаһаа эгээл зоригтойньшье тэрэ үдэр нюсэгэн тэрьедэхэ юм. Энэ болбол Би, Эзэн, айладхана мүн!