4 Хаан түрэнүүд 8 - Библи

Шүнээмэй эхэнэртэ газарынь бусаагдаба

¹ Элишаа үхэһэн хүбүүень амидыруулагша эхэнэртэ хандажа: – Ши өөрынгөө гэр бүлэтэй хамта аян замда түхеэрэ, ажамидарха нютаг хаана нэгэ тээ бэдэржэ оло. Юуб гэхэдэ, Эзэн долоон жэл соо энэ хизаарта үлэн хооһон байдал заяагаа, – гэжэ хэлэбэ.

² Тэрэ эхэнэр Бурханай хүнэй хэлэһэн үгые дуулажа, гэр бүлэеэ абаад, пилиштүүдэй орон нютагта байха газар оложо, тэндэ долоон жэлдэ ажаһууба.

³ Долоон жэлэй үнгэрхэдэ, тэрэ эхэнэр нютагаа бусажа, өөрынгөө гэр ба хубита газараа бусаажа абаха туһа эрихэеэ хаанда ошобо.

⁴ Тиихэдэ хаан Бурханай хүнэй зараса Гэһаазида хандажа: – Элишаагай хэһэн агууехэ хэрэг тухай намда хөөрэжэ үгэ, – гэжэ гуйба.

⁵ Үхэһэн хүбүүе Элишаагай амидыруулһан тухай хаанда Гэһаазиин хөөрэжэ байхада, өөрынгөө гэр ба хубита газарые бусаалгаха гэжэ тэрэ эхэнэр тэдээндэ ерэбэ.

⁶ Хаан тэрэ эхэнэрһээ һураба. Тэрэ эхэнэр хаанда бүхыгөө хөөрөөд, ерэһэн хэрэгээ хэлэбэ. Тиихэдэнь хаан тэрэ эхэнэртэ туһалхыень заһаагаа абхуулһан харуулшандаа хандажа: – Энэ эхэнэртэ урдань байһан бүхы зөөриие, энэ эхэнэрэй ябаһан сагһаа хойшо энэ үдэр хүрэтэр таряанайнь газарта ургаһан бүхы ургасыень бусаажа үгэхые хинан ажагла, – гэжэ захирба.

Араамай хаан болохош гэжэ Хазаһээлдэ Элишаа дуулгана

⁷ Араамай хаан Бэн-Һадаадай үбшэлжэ байхада, Элишаа Дамааск ерэбэ. – Бурханай хүн эндэ ерээ, – гэжэ түшэмэлнүүдынь хаанда дуулгаба.

⁸ Бэн-Һадаад хаан Хазаһээлдэ хандажа: – Бэлэг абаад, Бурханай хүндэ ошо. Энэ үбшэнһөө эдэгэхэ үгыемни тэрэ хүн Эзэнһээ һураг, – гэжэ хэлэбэ.

⁹ Хазаһээл бэлэгүүдые бэлдээд, Бурханай хүниие золгохоёо гэрһээ гараба. Тэрэ Дамааскын бүхы һайн зүйлнүүдые дүшэн тэмээндэ тээгээд, аян замда ябажа, удангүй Элишаада ерээд хэлэбэ: – Хүбүүншни байһан мэтээр шамайе хүндэлдэг Араамай хаан Бэн-Һадаад намайе шамда эльгээхэдээ: «Энэ үбшэнһөө эдэгэхэ гүб?» – гэжэ һураба.

¹⁰ Элишаа тэрээндэ хандажа: – Яба, тэрээндэ иигэжэ хэлэ: «Та заабол эдэгэхэт. Теэд таниие үхэхэ гэжэ Эзэн намда дуулгаа», – гэжэ хэлэбэ.

¹¹ Элишаа үни удаан шэг шарайгаа барылгаад, харасаяа тогтообо. Тиигээд Бурханай хүн уйлашаба.

¹² Хазаһээл тэрээндэ хандажа: – Та юундэ уйланат? – гэжэ һураба. – Юундэб гэхэдэ, би мэдэнэб, – гэжэ Элишаа харюусажа эхилбэ. – Ши израильшуудта ехэ уйдхар асарха байнаш. Ши тэдэнэй хэрэмүүдые үнэһэн тоборог болготор галдахаш, ши тэдэнэй эдиршүүлтэй элдээрээ тэмсэхэш, балшар багашуулыень хэсэг болотор сабшахаш, жэрмэһэн эхэнэрнүүдэйнь гэдэһые гаргахаш.

¹³ Хазаһээл тэрээндэ: – Иимэ муухай хэрэг үйлэдэхэ аалби? Би танай зараса, амин хайрата нохой ха юмбиб… – Эзэн минии зүүдэндэ бии болоо, – гэжэ Элишаа хэлэжэ эхилбэ. – «Шамайе Араамай хаан болгохо» гэжэ Тэрэ намда хэлээ.

¹⁴ Хазаһээл Элишааһаа гараад, өөрынгөө эзэндэ бусаба. – Элишаа шамда юун гэжэ хэлээб? – гэжэ Бэн-Һадаад һураба. Хазаһээл харюудань хэлэбэ: – «Таниие заабол эдэгэхэ» гэжэ хэлээ.

¹⁵ Үглөөдэрынь Хазаһээл ороной хушалта абажа, тэрэнээ уһанда хэбэ. Тиигээд Хазаһээл тэрэ норгоһон хушалтаяа Бэн-Һадаадай нюур дээрэ хаяба. Бэн-Һадаад амияа бүтэжэ үхэбэ. Хазаһээл тэрэнэй орондо хаан болобо.

Иудын хаан – Иораам

¹⁶ Израилиин хаан Ахаабай хүбүүн Ёраамай табан жэлдэ хаан байхада, тиихэдэ Ёшапаадай Иудын хан түрые захиржа байхада, Ёшапаадай хүбүүн Иораам Иудын хаан болобо.

¹⁷ Тэрэ гушан хоёр наһатайдаа хаан боложо, найман жэлэй туршада Иерусалимда хаан шэрээдэ һуугаа.

¹⁸ Иораам Ахаабай гэр бүлын ябадалаар, Израилиин хаашуулай замаар ябаба. Тэрэнэй һамган Ахаабай басаган байгаа. Тиимэһээ тэрэ муу жэшээ халан абажа, Эзэнэй урда нүгэлтэ хэрэгүүдые хэдэг байба.

¹⁹ Харин Эзэн Өөрын зараса Давидһаа боложо иудынхидые хосороохогүйб гэһэн шиидхэбэри гаргаа һэн. Ушар юуб гэхэдэ, үеын үедэ уг удамынь хааншалан байха гэжэ Эзэн Давидые найдуулһан байгаа.

²⁰ Иораамай хааншалха үедэ Эдоомой арад зон буһалгаалжа, амяарлан, өөрын хааниие һунгаба.

²¹ Иораам тэдээндэ харюу үгэжэ, өөрынгөө дайшалхы морин тэргэнүүдтэеэ хамта добтолгондо орохоёо Цаһиирта дүтэлбэ. Тэдэниие Эдоомой сэрэг бүһэлбэ, гэбэшье тэдэ һүниин туршада эдоомуудай сэрэгүүдэй хүреэниие бүһэлэн хүреэлөөд, тэдэниие, тэдэнэй дайшалхы тэргэнүүдэй дарганарые хюдан даража шадаа һэн. Гэбэшье Иудын сэрэгүүд өөһэдынгөө орон нютаг тээшэ тэрьедэн зугадаба.

²² Тиигээд лэ эдоомууд иудынхидһаа таһараад, мүнөө болотор мэдэлдэнь ороогүй юм. Тиихэдэ Либнаа Иудаһаа амяараа болоо һэн.

²³ Иораамай бусад хэрэг ябадалнууд тухай «Иудын хаашуулай түүхын ном» соо бэшээтэй юм.

²⁴ Иораам үхэбэ. Тэрэниие Давидай хотодо элинсэг хулинсагайнь бунханда хүдөөлүүлбэ. Тэрэнэй орондо, тэрэнэй хүбүүн Ахазияа хан шэрээень эзэлбэ.

Иудын хаан – Ахазияа

²⁵ Израилиин хаан Ахаабай хүбүүн Ёраамай арбан хоёр жэлдэ хан түрэеэ барижа байхада, Иораамай хүбүүн Ахазияа Иудын хаан болобо.

²⁶ Ахазияа хорин хоёртойдоо хан шэрээдэ һуужа, нэгэ жэлэй туршада Иерусалимда засаглаба. Тэрэнэй эхэ Атаалияа Израилиин Омрии хаанай басаган һэн.

²⁷ Ахазияа Ахаабай хүрьгэн байһан тула Ахаабай гэр бүлэдэл адляар хэрэгүүдые эрхилжэ, Эзэнэй урда нүгэл үйлэдэбэ.

²⁸ Ахазияа Ахаабай хүбүүн Ёраамтай хамта Араамай хаан Хазаһээлтэй дайлалдахаяа Галаадай Рамоодто байлдаанда ошобо. Араамшууд тэндэ Ёраамые шархатуулба.

²⁹ Хаан Ёраам Рамоодто Араамай хаан Хазаһээлтэй дайлалдахадаа араамшуудта шархатуулһан шархаяа эмшэлхэеэ Езрээл бусаба. Иудын хаан Иораамай хүбүүн Ахазияа шархатаһан Ахаабай хүбүүн Ёраамые эрьежэ, баһал Езрээл ерэбэ.