4 Хаан түрэнүүд 22 - Библи

¹ Ёшияа найма наһатайдаа хаан боложо, гушан нэгэн жэлэй туршада Иерусалимда хааншалаа. Тэрэнэй эхэ Боцкаат нютагай Адаяагай басаган Едидаа гэжэ нэрэтэй байгаа.

² Тэрэ Эзэндэ таарамжатай үйлэ хэрэгүүдые хэжэ, зүүн баруун тээшээ хадуурангүйгөөр, өөрынгөө үбгэ эсэгэ Давидай жэшээ даган, зүб замаарнь ябаа.

³ Ёшияа өөрынгөө хан түрые арбан наймадахи жэлээ засаглажа байхадаа, Мэшуллаамай аша, Ацаалияагай хүбүүн Шапаанда иимэ захиралтатайгаар бэшээшэеэ Эзэнэй һүмэдэ эльгээбэ:

⁴ – Ахамад санаартан Хилкияада ошо. Арад зонһоо үүдэ харууһалагша хүнүүдэй Эзэнэй һүмын һанда суглуулжа оруулһан бүхы мүнгэ хайлуулха захиралта тэрээндэ үгэ.

⁵ Хайлуулһан тэрэ мүнгэеэ Эзэнэй һүмын заһабарилгын ажал хинагша зондо дамжуулаг. Тэдэнэр тэрэ мүнгэн Эзэнэй һүмэ заһабарилжа байгааша хүдэлмэришэдтэ түлэг:

⁶ модошо дархашуулда, барилгашадта, шулууша дархашуулда хэһэн ажалайнь түлөө түлэг, мүн баһа һүмын заһабарилганда хэрэгтэй болоһон модо ба хабтагайлжа хайһан шулуунуудые худалдажа абахыень тэрэ мүнгэнһөө үгэг.

⁷ Эдэ мүнгэ дамжуулан үгэһэн хүнүүдһээ тоосоо хэхэ эрилтэ абаһанай хэрэггүй. Тэдэнэр этигэл найдалтайгаар ажаллаг.

Һургаалай ном Эзэнэй Һүмэ соо олдоно

⁸ Ахамад санаарта Хилкияа Шапаан бэшээшэдэ хандажа: – Би Эзэнэй һүмэ соо Хуулиин ном олооб, – гээд, хуйламал бэшэг Шапаанда үгэбэ. Бэшээшэ тэрэ хуйламал бэшэг уншаба.

⁹ Шапаан бэшээшэ хэһэн ажалаа тоосохоёо хаанда ерэжэ: – Танай барлагууд һүмын һанда ороһон мүнгэ хайлуулаад, Эзэнэй һүмые заһабарилагшадай даргада үгөө, – гээд

¹⁰ үргэлжэлүүлбэ. – Хилкияа санаарта танда энэ хуйламал бэшэг дамжуулхые намда үгөө. Шапаан бэшээшэ тэрэ хуйламал бэшэг хаанда уншажа үгэбэ.

¹¹ Хаан тэрэ ном соохи бэшэлгэ дууһан шагнаад, уйдхар гашуудалгата шаналгаяа мэдүүлжэ, хубсаһаяа хахар-шуур татаба.

¹² Тиигээд хаан Хилкияа санаартанда, Шапаанай хүбүүн Ахикаамда, Михайн хүбүүн Ахбоордо, Шапаан бэшээшэдэ болон хаанай зараса Асайяада хандан захирба:

¹³ – Ошогты, Эзэнһээ нам тухай, арад зон тухай, бүхы иудынхид тухай һурагты. Мүнөө олдогшо ном соохи бэшэлгэ бидэндэ ямар удхатайб? Юуб гэхэдэ, энэ ном соо бэшээтэй бүхы юумэ үбгэ эсэгэнэрнай сахин байгаагүй, Эзэнэй үгэ дуулаагүй, тиимэһээ Эзэн маанадта угаа ехэ уур хилэнсэгтэй байна.

¹⁴ Санаарта Хилкияа, Ахикаам, Ахбоор, Шапаан, Асайяа табан Хулдаа гэдэг лүндэншэ эхэнэртэй хөөрэлдэхэеэ ерэбэ. Хулдаа хадаа һүмын санаартадай хубсаһа хадагалдаг Шаллуумай һамган бэлэй. Шаллуум болбол Тикваагай хүбүүн, Хархаасай аша бэлэй. Хулдаа Иерусалимай хоёрдохи тойрогто ажаһуудаг һэн. Тэдэнэр ерэһэн хэрэгээ тэрэ эхэнэртэ хэлэбэд.

¹⁵ Хулдаа тэдээндэ иигэжэ хэлэбэ: – Таанадые нам руу эльгээгшэ хүндэ иигэжэ дамжуулагты гээд Израилиин Эзэн Бурхан айладхана:

¹⁶ «Удахагүй, тон һаядаа Би энэ хотодо, тэндэхи хүнүүдтэ гай тодхор эльгээхэб. Иудын хаанай уншаһан ном соохи бэшэлгэ бүхыдөө бэелүүлэгдэхэ.

¹⁷ Юундэб гэхэдэ, тэдэ Намайе орхижо, ондоо бурхадта уталгануудые ууюулдаг байгаа. Иигэжэ тэдэнэй хэһэн хэрэгүүд Минии сухал хүргэбэ. Энэ газарта Минии уур хилэн бушаганажа, унтархагүй».

¹⁸ Эзэнһээ асуухаяа таанадые эльгээһэн Иудын хаанда иигэжэ дамжуулагты! Эзэн, Израилиин Бурхан шамда уншажа үгэһэн номой тэдэ үгэнүүд тухай иигэжэ хэлэнэ:

¹⁹ Гэмээ мэдэрһэнэйш түлөө, энэ газар болон ажаһуугшад тушаань хооһоролгондо ба хараалай муу хараалда үгэхэб гэжэ Минии хэлэһэн үгэнүүдые дуулахадаа, даруу номгон болоһонойш түлөө, гашуудан, хубсаһа хунараа удара татаһанайш, Минии урда бархирһанайш түлөө Би шамайе анхарааб гэжэ Эзэн айладхана.

²⁰ Би шамайе үбгэ эсэгэнэртэшни тайбан мордохуулхаб. Ши амгалан тайбанаар өөрынгөө уг удамуудай агы нүхэн хуурсаг соо нойрсохош. Тиихэдээ ши энэ хотодо эльгээһэн Минии гай тодхорые харахагүйш. Энэ харюу хаанда дамжуулагдаба.