4 Хаан түрэнүүд 21 - Библи

¹ Мэнашшээ арбан хоёртойдоо хаан болоод, Иерусалимда табин табан жэл соо хааншалба. Тэрэнэй эхэ Хэпцибаа гэжэ нэрэтэй байгаа.

² Тэрэ Эзэндэ таарамжагүй хэрэгүүдые хэбэ. Эзэнэй израильшуудта үгэһэн газар дээрэхи уул арадууд мэтээр тэрэ жэгшүүритэй муухай ябадалнуудые үйлэдэбэ.

³ Хэзэкияа эсэгынгээ һандаргаһан мүргэлэй обоонуудые дахин һэргээн бодхообо, Баалда зорюулһан үргэлэй шэрээнүүдые барюулба, Израилиин хаан Ахаабые һажаажа Ашэраагай модон сэргэнүүдые бүтээлгэбэ, тэнгэриин наран, һара болон одо мүшэдтэ мүргэдэг, тэдээндэ алба хэдэг болобо.

⁴ Иерусалимда Минии нэрэ алдар оршохо гэжэ Эзэнэй айладхаһан Һүмэ соо тэрэ үргэлэй шэрээнүүдые байгуулба.

⁵ Мэнашшээ Эзэнэй һүмын хоёр хашаа соо тэнгэриин наран, һара болон одо мүшэдтэ үргэл хэхэ үргэлэй шэрээнүүдые барюулба.

⁶ Тэрэ хүбүүгээ галда шатаан үргэһэн байна. Мэдэлшэн, үзэлшэн, эльбэ жэльбэшэн болон тэрэ байгаа, үхэһэн зониие дуудадаг, эльбэ жэльбэ харуулдаг зонтой зүбшэдэг һэн. Эзэндэ таагүй юумэ олоор тэрэ хэжэ, Эзэнэй уур сухал хүдэлгэбэ.

⁷ Израилиин уг изагуурай эзэмшэдэг бүхы хото тосхонуудай дундаһаа шэлэн абаһан энэ Иерусалим хотодо, энэ Һүмэ соо Минии нэрэ алдар хэтэ мүнхэдөө алдаршан байха гэжэ Эзэнэй Давидта, Соломоон хүбүүндэнь айладхаһан эгээл тэрэ Һүмэ соо Мэнашшээ һиилэмэл хэмэл Ашэраагай дүрсэ табиба.

⁸ – Минии захин заабарилһан, Моисейн дамжуулһан Хуули ёһо тэдэнэй жэншэдгүй наринаар сахижа байбал, үбгэ эсэгэнэртэнь үгэһэн энэ орон нютагһаа холуур хариин газарта зайгуултажа байхыень израильшуудые дахин хэзээдэшье баалан хашахагүйб.

⁹ Теэд тэдэнэр Эзэнэй үгые дуулабагүй. Мэнашшээ өөрынгөө арад зониие харгы замһаань хадууруулжа, тэдэнэр израильшуудта газарыень үгэхэ гэжэ Эзэнэй хюдаһан арадуудһаа бүри дороор харатай хэрэгүүдые үйлэдэдэг болоо.

¹⁰ Эзэн Өөрынгөө барлагууд болохо лүндэншэдтэ дамжуулан, иигэжэ хэлэбэ:

¹¹ – Иудын хаан Мэнашшээ онгон бурхануудта шүтэн мүргэлгэдэ абаашаһан эмооршуудай урдахи хаашуулһаа һураггүй олон муу муухай ябадалнуудые үйлэдэжэ,

¹² хэһэн эдэ бүхы үйлэ хэрэгүүдэйнь түлөө, – гэжэ Эзэн, Израилиин Бурхан хэлэнэ. – Удахагүй Би Иерусалимда ба Иуда эсэгын зондо эгээл иимэ гай гашуудал эльгээхэб. Тиихэдэмни тэрээн тухай шагнаһан хүн бүхэн һүрдэн айха.

¹³ Самариие, Ахаабай гэрые хэһээһэндэл тон адляар Би Иерусалимые хэһээхэб. Би амһарта угаажа аршаад, амһарынь доошонь харуулжа табигшадал, Иерусалимые урбалдуулхаб.

¹⁴ Би Өөрынгөө амиды үшөө үлэһэн дуратай арадһаа буруу хаража, тэдэниие дайсадай ба дээрмэшэдэй гарта үгэхэб.

¹⁵ Тэдэнэй үбгэ эсэгэнэрэй Египедһээ гараһан үдэрһөө эхилээд, мүнөө болотор Намда таарамжагүй хэрэг ябуулгануудые хэһэн, хэжэшье байһан эдэ хүнүүд Минии уур сухалые хүргэнэ!

¹⁶ Тэрээнһээ гадуур Мэнашшээ ямаршье гэм зэмэгүй олон хүнүүдые хюдажа, бүхы Иерусалимые улаан шуһаар бүрхөөбэ. Тэрэ Эзэндэ таарамжагүй юумэ хүүлэхэ гэжэ Иуда эсэгын хүнүүдые нүгэлтэ зам руу түлхибэ. Тиихэдэнь энэ зэбүүрхэмэ ааша тэрэнэй нүгэлдэ нэмэри боложо үгэбэ.

¹⁷ Мэнашшээгэй хэһэн нүгэлнүүд ба бусад хэрэг ябуулганууд тухай «Иудын хаашуулай түүхын ном» соо бэшээтэй юм.

¹⁸ Мэнашшээ үбгэ эсэгэнэртэеэ зэргэлжэ, өөрынгөө ордоной – Уззаагай сэсэрлиг соо хүдөөлүүлэгдэбэ. Тэрэнэй һүүлдэ тэрэнэй хүбүүн Аммоон хаан болобо.

Иудын хаан – Аммоон

¹⁹ Аммоон хорин хоёртойдоо хаан боложо, хоёр жэлэй туршада Иерусалимда хааншалаа. Тэрэнэй эхэ Ётбаа нютагай Харууцын басаган Мэшүллээмэт гэжэ нэрэтэй байгаа.

²⁰ Мэнашшээ эсэгэдээл адляар тэрэ Эзэндэ таарамжагүй харата хэрэгүүдые хэжэ байгаа.

²¹ Тиихэдээ тэрэ эсэгэеэ һажаалдажа, али бүхы хэрэгээ бүтээхэдээ, эсэгынгээ замаар, эсэгынгээ шүтэн мүргэжэ байһан онгон бурхануудта алба хэжэ, тэдээндэ шүтэн мүргэдэг байба.

²² Теэд тэрэ Эзэнэй хойноһоо дахангүй, үбгэ эсэгэнэрэйнгээ тахин шүтэжэ ябаһан Эзэниие, өөрынгөө Бурханиие мартаба.

²³ Аммооной дүтын хүнүүд хаанай эсрэг нюуса хэлсээ зохёожо, хамтаран эсэргүүсэжэ, хаанай ордон соо тэрэниие алаба.

²⁴ Арад зон нюуса хэлсээндэ хабаадагшадые бултыень барижа усадхаад, Аммооной хүбүүн Ёшияае хаан шэрээдэ һуулгаба.

²⁵ Аммооной бусад хэрэг ябуулганууд тухай «Иудын хаашуулай түүхын ном» соо бэшээтэй юм.

²⁶ Уззаагай сэсэрлиг соо тэрэниие хүдөөлүүлбэ. Тэрэнэй дараа тэрэнэй Ёшияа хүбүүн хаан болобо.