4 Хаан түрэнүүд 20 - Библи

¹ Энэ үедэ Хэзэкияа хаан ехээр үбдэжэ, наһа бараха туйлдаа хүрөөд байба. Амооцой хүбүүн, лүндэншэ Исай тэрээниие эрьежэ ошоходоо, иигэжэ хэлэбэ: – Үхэжэ байна, һайн болохогүй гээд шам тушаа Эзэн айладхана, тиимэһээ гэрээд үгэнүүдээ хэлэг лэ гэжэ Тэрэ захирна.

² Тиихэдэнь Хэзэкияа хана руу хараад, Эзэндэ зальбарба:

³ – Эзэмни! Танай урда үнэн сэхээр, ямаршье гэм зэмэ хэнгүй ажаһууһыемни, Танда таарамжатай үйлэ хэрэгүүдые бүтээдэг байһыемни һаныт даа, – гээд, һугшаран уйлашаба.

⁴ Исайн хаанай ордонһоо Хотын Дунда үшөө гараагүй ябахада,

⁵ Эзэн тэрээндэ иигэжэ хэлэбэ: – Минии арад зониие зонхилогшо Хэзэкияада бусаад, иигэжэ хэлэ: Би, Эзэн, шинии үбгэ эсэгэ Давидай Бурхан, гуйлтыешни соносооб, нулимсыеш харааб, шамайе Би эдэгээхэб. Ши нүгөөдэр Эзэнэй һүмэдэ оро. Тиигээд шинии наһые Би арбан табан жэлээр утадханаб.

⁶ Шамайе болон энэ Иерусалим хото Ассириин хаанһаа абархаб, Минии барлаг Давидай түлөө, Өөрынгөө түлөө энэ хотые Би хамгаалхаб!

⁷ Исай иигэжэ захирба: – Инжир модоной хатаагдаһан үрэ жэмэс асарагты! Зарасанарынь хатаагдаһан үрэ жэмэс асарба. Тэрэниие хабдажа эдеэрдэһэн газартань табихада, Хэзэкияа эдэгэжэ эхилбэ.

⁸ Эзэн үнэхөөр намайе эдэгээжэ, минии нүгөөдэр Эзэнэй һүмэдэ ошохымни дүлгэ тэмдэг ямар байхаб гэжэ Хэзэкияа Исайһаа асууба.

⁹ Исай тэрээндэ иигэжэ хэлэбэ: – Арбан табсан хэрэлсыһээ доошоо бууһан һүүдэр һөөргөө арбан табсан өөдөө гараха гү? Өөрынгөө хэлэһэн үгые бэелүүлхэ гэһэн Эзэнэй һүлдэ тэмдэг энэ болонол даа.

¹⁰ Хэзэкияа тэрээндэ хандажа: – Һүүдэр арбан табсан хэрэлсыһээ доошоо бууханшье бууха, теэд һөөргөө хэрэлсы өөдэ арбан табсан гарахагүйл! – гэбэ.

¹¹ Тиихэдэнь лүндэншэ Исай Эзэнһээ туһа гуйба. Эзэн Ахаазай ордон гэрэй хэрэлсы уруу бууһан һүүдэр арбан табсангаар һөөргэнь тэхэрюулбэ. Һүүдэрэй хэрэлсын табсануудай дээгүүр доошо дээшээ гаралгаар хэды сагай болоһые тэрэ сагта мэдэдэг байгаа.

Вавилооной элшэнэр

¹² Тэрэ сагта Баладаанай хүбүүн, Вавилооной хаан Мэродаах-Баладаан Хэзэкияае үбшэлөө гэжэ дуулаад, элшэнэрээ тэрээндэ бэлэг-сэлэгтэйгээр ба хандалга бэшэгтэйгээр эльгээбэ.

¹³ Хэзэкияа тэдэнэй үгэ шагнаад, элшэнэртэ өөрынгөө эрдэни зэндэмэниин һан соо байһан алта мүнгөө, хангалтай уталгаа, үнэтэй сэнтэй тоһо, яар-ябта буу зэбсэгүүдээ болон хадагалдаг газарта байһан бүхы юумэнүүдээ тэдээндэ харуулба. Тиихэдэнь тэдэнэртэ харуулагдангүй үлэһэн нэгэшье юумэн Хэзэкияагай ордон ба хан түрэ соо үлэбэгүй.

¹⁴ Лүндэншэ Исай Хэзэкияада ерэжэ асууба: – Эдэ зон хаанаһаа зорижо ерээб? Юун гэжэ хэлэнэб? – Тэдэ алас холын Вавилоон оронһоо ерээ, – гэжэ Хэзэкияа харюусаба.

¹⁵ Ордон соо тэдэ юу үзөөб? – гэжэ лүндэншэн асууба. – Тэдэнэр минии ордон соохи бүхы юумэ үзөө. Эрдэниин сан соо хадагалаатай бүхы юумэнүүдые тэдээндэ харуулааб, – гэжэ Хэзэкияа харюусаба.

¹⁶ Тиихэдэнь Исай Хэзэкияа хаанда иигэжэ хэлэбэ: – Эзэнэй айладхаһан үгэ дуула:

¹⁷ Ордон соо байгаа бүхы юумэн, үбгэ эсэгэнэрэйтнай энэ болотор суглуулһан бүхы зөөри Вавилоон руу абаашагдаха үдэрнүүд заабол ерэхэ. Эндэ юуншье үлэхэгүй.

¹⁸ Шинии үри һадаһад, удамайшни таһардаһанууд, угыешни залгамжалагшад баряанда абтажа, Вавилооной хаанай ордон соо заһаагаа абхуулһан харуулшад болохо.

¹⁹ Хэзэкияа Исайда хандан хэлэбэ: – Мүнөө шинии Эзэнһээ дамжуулан хэлэһэн үгэнүүдшни һайн мэдээсэл байна. «Минии амиды мэндэ байгаа сагта эндэ амгалан тайбан, аюулгүй байдал оршохо» гэжэ Хэзэкияа сэдьхэбэ ха юм.

Хэзэкияагай наһа баралга

²⁰ Хэзэкияагай бусад хэрэг ябуулганууд, тэрэнэй габьяа, тэрэнэй яагаад сөөрэм барюулһан, һужааг малтуулһан, хотодоо уһатай болгоһон тухай «Иудын хаашуулай түүхын ном» соо бэшээтэй юм.

²¹ Хэзэкияа наһа баража, үбгэ эсэгэнэрэйнгээ хажууда хүдөөлүүлэгдэбэ. Орондонь Мэнашшээ хүбүүниинь хаан шэрээ эзэлбэ.