4 Хаан түрэнүүд 2 - Библи

Элияагай тэнгэридэ дэгдэлгэ

¹ Эзэн Элияае хуй һалхяар тэнгэри өөдэ иигэжэ дэгдүүлбэ. Элияа Элишаатай хамта Гилгаалһаа ябагаар гараба.

² Элияа Элишаада иигэжэ хэлэбэ: – Ши эндэ үлэ. Эзэн намайе Бэт-Ээл эльгээнэ. – Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа. Тэдэ хоёр Бэт-Ээл тээшэ ошобо.

³ Бэт-Ээлдэ байһан лүндэншэдэй зүблэлэй гэшүүдэй түлөөлэгшэд тэдэниие угтаад: – Мүнөөдэр Эзэн минии эзэниие абаашахань гэжэ мэдэнэ гүш? – гэжэ Элишаада хэлэбэд. – Мэдэнэб, һанаагаа бү зобогты, – гэжэ Элишаа харюусаба.

⁴ Элияа Элишаада хандажа: – Элишаа эндээ үлэ. Эзэн намайе Ерихоон эльгээнэ, – гэбэ. – Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа. Тэдэ хоёр хамта Ерихоон ерэбэд.

⁵ Ерихоондо байһан лүндэншэдэй зүблэлэй гэшүүдэй түлөөлэгшэд тэдэниие угтаад: – Мүнөөдэр Эзэн шинии эзэниие абаашахань гэжэ мэдэнэ гүш? – гэжэ Элишааһаа һураба. – Мэдэнэб, һанаагаа бү зобогты, – гэбэ Элишаа.

⁶ Элияа Элишаада хандажа: – Ши эндээ үлэ, Эзэн намайе Иордан эльгээнэ, – гэбэ. – Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа. Тэдэ хоёр хамта Иордан ошобо.

⁷ Лүндэншэдэй зүблэлэй гэшүүдэй түлөөлэгшэд тэдэ хоёрые дахан ошолсожо, хараанай газарта үлэбэд.

⁸ Элияа субаяа абажа эбхээд, тэрээгээрээ уһа сохибо. Уһанай хоёр тээшээ боложо харгы гаргахада, тэдэ хоёр хуурай газар дээгүүр мүрэн гаталба.

⁹ Мүрэн гаталамсаараа, Элияа Элишаада хандажа: – Минии шамтай байһан сагта, шамда минии юу хэбэл дээрэб? – гэжэ һураба. – Танай эди шэдитэ бэлиг шадабари намда нэмэжэ, минии бэлигые хоёр дахин ехэ болгог, – гэжэ Элишаа хэлэбэ.

¹⁰ – Хүшэр хүндэ юумэ гуйнаш. Хэрбэеэ тэнгэри өөдэ минии дэгдэхые харабалшни, гуйһан хэрэгшни бүтэхэ. Хэрбэеэ харабагүйлшни, бүтэхэгүй.

¹¹ Тэдэ хоёр хөөрэлдэһөөр, аян замаа үргэлжэлүүлжэ, харгыгаар саашалбад. Гэнтэ дайшалхы гал тэргэ, гал морид бии болоод, хуй һалхин эшхэржэ, Элияае Элишааһаа холодхон, тэнгэри өөдэ абаад ябашаба.

Элишээ Элияагай һүлдые залгамжалба

¹² Элишаа эдэ бүгэдые харамсаараа: – Эсэгэмни, эсэгэмни! Израилиин дайшалхы тэргэ ба тэрэнэй морид! – гэжэ тэрэнэй хойноһоо хашхарба. Элияа тэрэнэй нюдэндэ харагдахаяа болибо. Тиихэдэнь Элишаа өөрынгөө уйдхар гашуудал харуулжа, хабсаһаяа шудара татаад,

¹³ газарта унаһан Элияагай субые абаад, Иорданай эрьедэ ерэбэ.

¹⁴ Элишаа тэрэнэй субаар уһа сохёод: – Элияагай Бурхан, Эзэн хаана гээшэб? – гэжэ асуугаад, тэрээгээрээ үшөө дахин уһа сохин шабхадаба. Уһан хоёр тээшээ хубааран эбхэржэ, тэрээндэ харгы гаргаба. Элишаа хуурай газараар мүрэн гаталба.

¹⁵ Ерихоон мүрэнэй эрьеһээ тээ саанахана зогсожо байһан лүндэншэдэй зүблэлэй гэшүүдэй түлөөлэгшэд энэ үйлэ хэрэг хараад: – Элияагай һүлдэ Элишаада ороо! – гэжэ хашхаралдаад, тэрэнэй урда ерэжэ, доро дохиһоной һүүлдэ

¹⁶ иигэжэ хэлэбэд: – Танай барлагууд болохо маанадай дунда табин хүсэтэй шэрбүүһэтэй эрэшүүл байна. Эдэнэр минии эзэниие бэдэрхэеэ ошог. Магад, Эзэнэй Һүлдэ тэрэниие абаашажа, хадануудай гү, али хүндынүүдэй нэгэндэ хаяа аалам. – Хэнииешье бү эльгээгты, – гэжэ Элишаа хэлэбэ.

¹⁷ Теэд тэдэнэй үни удаан гуйхада: – Зай, эльгээгты, – гэжэ тэрэ зүбшөөбэ. Табин хүнүүд бүлэг бүлэгүүд болгогдожо, гурбан үдэр бэдэрээд олобогүй.

¹⁸ Тэдэ бүлэгүүд Ерихоондо байһан Элишаада бусабад. – Бэдэрхэеэ бү ошогты гэжэ би хэлээ һэмнайб, – гэжэ Элишаа хэлэбэ.

Элишаагай гайхамшагта үзэгдэлнүүд

¹⁹ Тэрэ хотынхид Элишаада хандажа: – Эзэн манай, харагты! Манай хото һайн газарта байна. Теэд эндэ муу уһатай, үрэжэлгүй хүрьһэтэй, – гэжэ хэлэбэд.

²⁰ Элишаа тэдээндэ хандажа: – Намда шэнэ амһарта үгэгты. Тэрээн соогоо дабһа хэгты, – гэжэ хэлэбэ. Тэрэ хотынхид эриһэн бүхы юумыень асаржа тэрээндэ үгэбэд.

²¹ Элишаа булагай эхиндэ ошожо, урасхал руунь дабһаяа сасаад: – Эзэн иигэжэ хэлэнэ: «Би энэ уһа арюудхабаб. Энэ уһанһаа дахин хэзээдэш үхэл тахал ба үрэжэлгүйдэлгэн болохогүй!» – гэжэ хэлэбэ.

²² Элишаагай хэлэһэн үгэ бэелүүлэгдэжэ, мүнөө болотор тэндэхи уһан арюун сэбэр байгша юм.

²³ Элишаа тэндэһээ Бэт-Ээл ошобо. Хотоһоо гүйжэ гараһан үхибүүд харгыгаар ябаһан тэрэниие хараад: – Халзан толгойтой, яба саашаа! Халзан толгойтой, яба саашаа! – гэжэ тэрэниие наада барин, хойноһоонь хашхаралдабад.

²⁴ Тэрэ гэдэргээ эрьелдэжэ, тэдэниие хараад, Эзэнэй нэрээр тэдэниие хараалда хүртөөбэ. Хоёр эмэ баабгай ойһоо гарамсаараа, үхибүүдтэ добтолжо, дүшэн хоёр үхибүүдые таһар удар татаба.

²⁵ Элишаа тэндэһээ Кармээл уулада ошоод, һүүлдэнь Самарида бусаба.