4 Хаан түрэнүүд 17 - Библи

Израилиин хаан – Һошээ

¹ Иудын хаан Ахаазай арбан хоёрдохи жэлээ хан түрэеэ засаглажа байхада, Элаагай хүбүүн Һошээ Израилиин хаан болобо. Тэрэ Самарида хан түрэеэ юһэн жэлдэ засаглаба.

² Тэрэнэй хэһэн хэрэг ябуулганууд Эзэндэ таарамжагүй байба, теэд урдахи Израилиин хаашуулай хэһэн хэрэг ябуулгануудтай адли тиимэ харата дорой бэшэ байба.

³ Ассириин хаан Шалманасаарай дайгаар Һошээдэ добтолон ороходо, Һошээ тэрээнэй мэдэлдэ орожо, алба татабари түлэдэг болобо.

⁴ Һүүлдэнь Ассириин хаан Һошээе урбалта хэжэ, элшэдээ Египедэй Соо хаанда эльгээбэ гэжэ соносхобо. Ушар юуб гэхэдэ, тэрэ жэл бүхэндэ Ассириин хаанда албата татабари түлэхэ аад, тэрэнээ түлөөгүй байба. Тиихэдэнь Ассириин хаан Һошээе баряад, түрмэдэ һуулгаба.

⁵ Ассириин хаан Израилиин бүхы газарые эзэмдээд, Самарида ошожо, гурбан жэлдэ сэрэгээрээ тэрэ хотые хүреэлэн бүһэлбэ.

⁶ Һошээгэй юһэдэхи жэлээ хан шэрээдээ һуухада, Ассириин хаан Самариие эзэмдэн абаба. Тиигээд тэрэ израильшуудые Ассири туужа асараад, Гозаан дээгүүр урдадаг Хабуур голой эрьедэхи Халаада, мүн баһа Мидиин хотонуудта нютагжуулха гэбэ.

Израилиин хосоролтын шалтагаан

⁷ Израильшууд Египедэй хаан, фараоной дарлалта дороһоо абаржа, үбгэ эсэгэнэрыень Египедһээ гаргаһан Эзэнэй, өөрынгөө Бурханай урда зэмэтэй болобо.

⁸ Тэдэнэр Эзэнэй израильшуудта үгэһэн газарнуудай уул зоной ёһо заншалые баримталдаг, мүн баһа Израилиин хаашуулай зарлиг тогтоолнуудые сахидаг болошоһон байба.

⁹ Тиимэһээ тэдэнэр Эзэндэ, өөрынгөө Бурханда үнэн сэхэ бэшэ, харин нүгэлтэ хэрэгүүдые хэдэг байба. Тэдэнэр өөһэдынгөө нютагжаһан бүхы тосхонуудай, харуулай хэрэмүүдһээ эхилжэ бэхижүүлгэтэй томо хотонууд хүрэтэрхи обоонуудта үргэлэй шэрээнүүдые бодхоон бариба,

¹⁰ нангин шүтөөнүүдые ба Ашэраагай модон сэргэнүүдые үндэр гүбээнүүд дээрэ, набшаһата модон бүхэн доро табиба.

¹¹ Эзэн обоонуудай тахилнуудта үргэлнүүдээ шатаадаг арадуудай газарнуудые израильшуудта үгэхэ гэжэ тэндэхи уул хүнүүдые газар дайда дээрэһээнь намнаһан байгаа.

¹² Теэд израильшууд тэдэ газартань нютагжахалаараа, «Тэдэнэй ёһо заншал ба шажан мүргэлдэ бү орогты» гэжэ Эзэнэй айладаһан захяаень дүүргэнгүй, тэдэнэй онгон бурхадта шүтэн мүргэдэг болошоо юм.

¹³ Эзэн Өөрынгөө бүхы лүндэншэдээр ба абаралдагшадаар уридшалан дамжуулжа, израильшуудта ба иудынхидтэ иигэжэ айладаа юм: – Бусагты, муу замһаа зайсагты! Минии захяа заабариие сахигты! Би таанадта үбгэ эсэгэнэртэтнай үгэгшэ Һургаал заабаринуудаа Өөрынгөө барлаг лүндэншэдээр дамжуулааб. Минии айладагша захяа заабаринууд тэрэ Һургаал соо байха.

¹⁴ Теэд тэдэнэр Эзэнэй хэлэһэн үгые хайхаран абабагүй. Тэдэнэр Эзэндэ, өөрынгөө Бурханда этигэдэггүй байһан эсэгэнэртээл адляар үсэрэлдэбэд.

¹⁵ Израильшууд Тэрэнэй хуулинуудые, үбгэ эсэгэнэртэйнь баталһан үнэн сэхэ байха тухай хэлсээе, тэдээндэ захиһан захяае мартажа, оршон тойронхи арадуудые һажаалдажа, онгон бурхадтань шүтэн мүргэдэг болобо. Эзэн тэдэниие бү һажаалдагты, тэдээнһээ жэшээ бү абагты гэжэ израильшуудта хэлэһэн байгаа.

¹⁶ Теэд тэдэнэр Эзэнэй, өөрынгөө Бурханай бүхы зарлиг захяануудые хайхарбагүй. Тиигээд тэдэнэр өөһэдтөө тугалнуудые шудхаад, Ашэраагай модон сэргэнүүдые табяад, наран, һара болон тэнгэриин одо мүшэдтэ мүргэжэ, Баалда алба хэжэ,

¹⁷ хүбүүд басагадаа үргэл болгожо галда шатаадаг, үзэл үзэжэ, эльбэ жадха хэжэ һурахые оролдодог болобо. Тиигэжэ тэдэнэр Эзэндэ таарамжагүй хэрэгүүдтэ ба нүгэлдэ дарагдаба.

¹⁸ Эзэн эдэ бүгэдые хэдэг болошоһон израильшуудта сухалдаад, гансал иудын зониие Өөртөө үлөөжэ, бусадыень Өөрһөө холодхожо үлдэбэ.

¹⁹ Теэд иудыншье зон Эзэнэй, өөрынгөө Бурханай захяа заабаринуудые сахихаяа болижо, израильшуудтал адляар тэндэхи уул арадуудай ёһо заншал ба шажан мүргэлдэ оробо…

²⁰ Эзэн Израилиин бүхы зониие зэбүүрхэлтэйгээр буруушаажа, тэдэниие доромжолон, Өөрһөө холо болгожо, тонуул ба дээрмэдэлгэндэ үгэбэ.

²¹ Эзэнэй Израилиие Давидай хан шэрээһээ амяарлахадань, израильшууд Набаадай хүбүүн Еробоһаамые һунгажа, өөһэдынгөө хаан болгожо томилбо. Теэд Еробоһаам Эзэнээ мартахые израильшуудта баадхан идхажа, тэдэниие аймшагтай нүгэлтэ зам руу абаашаба.

²² Израильшууд Еробоһаамай нүгэлтэ замаар дабшажа, эдэ бүхы нүгэлнүүдһээ зайсажа шадабагүй.

²³ Эзэн Өөрынгөө бүхы барлаг лүндэншэдээр уридшалан дамжуулһан захяа зарлигуудыень сахяагүй Израилиие Өөрһөө холо болгожо үлдэбэ. Тиихэдэнь израильшууд өөһэдынгөө орон нютаг орхижо, Ассиридэ сүлүүлэн нүүжэ, мүнөө болотор нютагжаһан газартаа ажаһуунад.

Самари руу ондоо арадуудые нүүлгэ

²⁴ Ассириин хаан өөрынгөө хүнүүдые Вавилоонһоо, Кутааһаа, Аввааһаа, Хамаатһаа, Сэпарваһиимһээ израильшуудай ажаһууһан Самариин тосхонуудта ба хотонуудта нүүлгэн абаашаба. Тэдэнэр Самариин орон нютагай бүрин эрхэтэ эзэд боложо, тэндэхи хотонуудта болон тосхонуудта ажаһуужа эхилбэд.

²⁵ Тэдэнэр тэндэ нүүжэ ерэхэдээ, түрүүшээр Эзэниие шүтэдэггүй, хүндэлдэггүй байба. Тиихэдэнь Эзэн тэдээндэ арсалануудые эльгээбэ. Арсаланууд добтолжо, тэдэниие аладаг болобо.

²⁶ Тиихэдэнь арад зон Ассириин хаанда хандажа: – Танай зарлигаар Самариин тосхонууд ба хотонуудта нүүжэ ерэһэн бидэнэр энэ ороной Бурханда яажа шүтэн мүргэдэг ёһолол мэдэнэгүйбди. Бурхан бидэндэ арсалануудые эльгээбэ. Тэдэ арсаланууд бурханда яажа шүтэн мүргэдэг ёһолол мэдэхэгүй хүнүүдые алана, – гэжэ хэлэбэд.

²⁷ Ассириин хаан тэдэнэртэ хандажа: – Тэндэһээ эндэ туужа асарһан санаартадай али нэгые Самаридань бусаагты. Тэрэ тэндэ ошоод, таанадтай байхадаа, Самариин ороной бурханда яажа шүтэн мүргэдэг ёһолол таанадта заажа, һургажа үгэг, – гэбэ.

²⁸ Самариһаа эндэ туулгуулжа асаруулһан санаартадай нэгэн тэндэ бусаба. Тэрэ Бэт-Ээлдэ нютагжан һуурижаад, тэрэ арадые яажа Эзэндэ мүргэхэб гэһэн ёһолол заажа һургажа эхилбэ.

²⁹ Тиихэдэнь тэрэ арад нютагжан һуурижаһан газарайнгаа урдандаа самаряануудай бариһан дуган бүхэндэ өөһэдынгөө бурхануудай дүрсэнүүдые табибад.

³⁰ Вавилоонойхид Суккоот-Бэноот бурханай, Кутаа хотынхид Нэргаал бурханай, Хамаат хотынхид Ашимаа бурханай дүрсэнүүдые,

³¹ Авваа хотынхид Нибхааз ба Тартаак бухануудай дүрсэнүүдые бодхообо. Тиихэдэнь Сэпарваһиимһээ нүүжэ ерэгшэд Сэпарваһиимэй бурханууд болохо Адраммээлэхтэ ба Анаммээлэхтэ үргэл хэжэ, өөһэдынгөө үхибүүдые галда үгэдэг болобо.

³² Тэрэ үе сагта тэдэнэр Эзэндэ мүргэдэг, өөһэдынгөө яһатанһаа хэн нэгые нютагайнгаа обоонуудай санаарта болгожо томилбо. Тэрэ санаарта тэндэхи обоонуудта, мүн дуганууд соо тэдээндэ мүргэл үнгэргэдэг болобо.

³³ Теэд тэдэнэр Эзэндэ мүргөөшье һаа, өөһэдынгөө бурхадта шүтэдэг байба. Ушар юуб гэхэдэ, хари газарта нүүжэ ерэһэн тэдэнэр эхэ орондоо шүтэжэ байһан өөһэдынгөө бурхануудые мартабагүй.

³⁴ Тэдэнэр мүнөө болотор урданайнгаа ёһо заншалые сахиһаар зандаа юм. Тиимэһээ тэдэнэр Эзэндэ шүтэн мүргэхэеэ, Яковай нэрые «Израиль» гэжэ һэлгээд, тэрэнэй уг удамуудта сахигты гэжэ захиһан Эзэнэй бүхы захяа заабаринуудые, хуулинуудые болон Һургаалнуудые сахихаяа болишобо.

³⁵ Эзэн тэдэнэртэй үнэн сэхэ байха тухай хэлсээ баталжа: – Ондоо бурхануудта бү ёһологты, бү мүргэгты, тэдээндэ үргэл бү хэгты.

³⁶ Харин Өөрынгөө агууехэ хүсөөр, Өөрынгөө баруун гараар таанадые Египедһээ гаргаһан гансал Эзэндэ ёһологты, гансал Тэрээндэ мүргэгты, гансал Тэрээндэ үргэл үргэгты.

³⁷ Тэрэнэй таанадта бэшэһэн хуулинуудые, захиралтые, Һургаалнуудые болон ёһо заншалнуудые сахигты, ходол тэдэнииень бэелүүлэгты.

³⁸ Минии таанадтай баталһан үнэн сэхэ тухай хэлсээе бү мартагты, ондоо бусад бурхануудта бү ёһологты.

³⁹ Гансал Эзэндэ, таанадай Бурханда ёһологты. Тэрэ таанадые бүхы дайсадһаа аршалха, – гэжэ зарлиглаба.

⁴⁰ Теэд тэдэнэр Эзэнэй үгые дуулангүй, өөһэдынгөө хэжэ ябаһан урданай ёһо заншал үргэлжэлүүлжэ,

⁴¹ Эзэндэ мүргэжэ, өөһэдынгөө онгон бурхануудта алба хэжэл байба. Тэдэнэй үхи хүүгэд ба ашанар мүнөө болотор эсэгэнэрэйнгээ хэһэн ябадалнуудые даган үргэлжэлүүлһэн зандаа юм.