4 Хаан түрэнүүд 14 - Библи

¹ Израилиин хаан Ёахаазай хүбүүн Ехоһаашай хан түрэеэ хоёрдохи жэлээ засаглажа байхада, Ёһаашай хүбүүн Амацияа Иудын хаан болобо.

² Тэрэ хорин таба наһатайдаа хаан боложо, хорин юһэн жэлэй туршада Иерусалимда хааншалаа. Тэрэнэй эхэ Иерусалимһаа уг гарбалтай, Ёһаддаан гэжэ нэрэтэй байгаа.

³ Тэрэ Эзэндэ таарамжатай хэрэгүүдые бүтээжэ байбашье, үбгэ эсэгэ Давидай хэһэн бүхы ябуулгануудайнь эды тэдыень лэ бүтээбэ. Харин тэрэ өөрынгөө эсэгэ Ёһаашай хэрэг ябадалые дэмжэн үргэлжэлүүлбэ.

⁴ Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг байгаа.

⁵ Амацияа хаан хүсэндөө ороходоо, хаан эсэгыень алаһан түшэмэлнүүдые саазалба.

⁶ Гэбэшье, тэрэ алууршадай хүбүүдые саазалбагүй. Ушар юуб гэхэдэ, Моисейн Хуули соо Эзэн иимэ захяа заабари үгэнэ: «Үхибүүдэйнь хэһэн гэмтэ ябадалай түлөө эсэгэнэрынь, эсэгэнэрэйнь хэһэн гэмтэ ябадалай түлөө үхибүүдынь саазалжа болохогүй. Харин өөрын хэһэн гэмтэ ябадалайл түлөө хүн үхэлэй саазада хүртэхэ зэргэтэй».

⁷ Амацияа Дабһата хүндыдэ арба мянган эдоомуудые алаад, Сээлые дайгаар эзэмдэжэ, тэрэ хотые шэнээр Ёктээл гэжэ нэрэлбэ. Тэрэ хото мүнөө болотор иимэ нэрэтэй юм.

Амацияа болон Ехоһааш хоёрой хоорондохи дайн

⁸ Тэрэнэй һүүлдэ Амацияа Еһүүгэй аша, Ёахаазай хүбүүн болохо Израилиин хаан Ехоһаашда элшэдээ иимэ мэдээтэй эльгээбэ: «Дайлалдахаяа гара! Нюур нюураараа тулалдая!»

⁹ Израилиин хаан Ехоһааш Иудын хаан Амацияада иимэ харюу эльгээбэ: – Хэзээ нэгэтэ Ливаанда ургажа байгааша үүргэнэ Ливаандахи хуша модондо «Хүбүүнэйм һамган болгон басагаяа үгыш» гэжэ хэлээ бэлэй. Теэд Ливаанай ан арьяатан тэрэнэй хажуугаар үнгэржэ ябахадаа, тэрэ үүргэные хуха нуга дэбһэн гараа.

¹⁰ Эдоомые диилэһэн илалта шинии толгойе эрьюулээ. Сэдьхэлдээ гансал энэ илалтаараа омогорхо. Юундэ өөртөө гай тодхор бэдэрбэш? Магад, өөрөө хүлөө алдажа, Иудатай хамта унажа болохош!

¹¹ Амацияа тэрэнэй хэлэһэн энэ үгые дуулабагүй. Иигэжэ Израилиин хаан Ехоһааш ба Иудын хаан Амацияа Иудын Бэт-Шээмэштэ нюур нюураараа уулзажа, дайлалдаба.

¹² Израилиин сэрэг Иудын сэрэгые бута сохибо. Амиды үлөөшэнь гэр руугаа тэрьедэн гүйбэ.

¹³ Израилиин хаан Ехоһааш Бэт-Шээмэш шадархи тулалдаанда Ахазияагай аша, Ёһаашай хүбүүн болохо Иудын хаан Амацияае баряанда абажа, Иерусалим руу абаашаба. Тэндэ тэрэ Иерусалимай хэрэм ханануудые Эпрааимай хаалта үүдэнһээ Булангай хаалта үүдэн хүрэтэр дүрбэн зуун тохой ута ханые сүмэ сохижо, хотодо оробо.

¹⁴ Тиигээд тэрэ Эзэнэй һүмын ба хаанай ордоной һангуудта байһан алта мүнгэ, үнэтэй сэнтэй бүхы хэрэгсэлнүүдые тоножо, улад зониие баряанда абаад, Самари руу бусаа һэн.

Ехоһаашай ба Амацияагай наһа баралга

¹⁵ Ехоһаашай бусад хэрэг ябуулганууд, тэрэнэй Иудын хаан Амацияатай тулалдаһан баатаршалганууд тухай «Израилиин хаашуулай түүхын ном» соо бэшээтэй юм.

¹⁶ Ехоһааш наһа бараба. Тэрэниие Самарида байдаг үбгэ эсэгэнэртэйнь зэргэлүүлжэ, Израилиин хаашуулай булашада хүдөөлүүлбэ. Тэрэнэй хүбүүн Еробоһаам хаан болобо.

Амацияагай наһа баралга

¹⁷ Ёахаазай хүбүүн болохо Израилиин хаан Ехоһаашай наһа бараһанай удаа үшөө арбан табан жэл үлүү Иудын хаан Ёһаашай хүбүүн Амацияа ажаһууһан гээшэ.

¹⁸ Амацияагай бусад хэрэг ябуулганууд тухай «Иудын хаашуулай түүхын ном» соо бэшээтэй юм.

¹⁹ Тэрээндэ эсэргүү нюуса хэлсээ Иерусалимда эмхидхэгдэбэ. Теэд Амацияа Лахииш руу тэрьедэн хороо һэн. Гэбэшье нүгөөдэ зон Лахииш руу ошожо, тэрэниие олоод, алаба.

²⁰ Тэрэнэй бэеые морид дээрэ тээгээд, Иерусалимда асаржа, үбгэ эсэгэнэртэйнь хамта Давидай хотодо хүдөөлүүлээ бэлэй.

²¹ Иудын арад зон арбан зургаатай Азаарияае Амацияагай орондо хаан болгобо.

²² Амацияагай үбгэ эсэгэнэртэеэ хамта нойрсоходо, Азаарияа Элаат хотые шэнээр барюулаад, тэрэнээ Иудын засаглал доро үгэбэ.

Израилиин хаан – Еробоһаам II

²³ Ёһаашай хүбүүн Амацияагай арбан табан жэлдэ Иудын хаан байхада, Ехоһаашай хүбүүн Еробоһаам Израилиин хаан болобо. Тэрэ дүшэн нэгэн жэлдэ хан түрэеэ засаглажа, Самарида ажаһууба.

²⁴ Тэрэ Эзэндэ таарамжагүй хэрэг ябадалнуудые хэһэн байна. Тэрэ Израилиие нүгэлтэ зам руу хүтэлбэрилһэн Набаадай хүбүүн Еробоһаамай нүгэлһөө зайсаагүй.

²⁵ Еробоһаам Лэбоо-Хамаатһаа Дабһата далай хүрэтэрхи бүхы газар Израильда бусааба. Тиигэжэ Гаат-Хээпэрһээ гараһан Амиттайн хүбүүн, Эзэнэй барлаг – лүндэншэн Ионын арад зондо дамжуулһан соносхол – Израилиин Бурханай, Эзэнэй айладаһан үгэ бэелүүлэгдэбэ.

²⁶ Эзэн Израилиин багашуулһаа ехэшүүл хүрэтэр булта үхэжэ, гашуун зоболон үзэжэ, абарагшагүйдэлгые хараад,

²⁷ тэндэхи газар дээрэһээ Израилиин нэрые үгы хэхэгүй гэбэ. Тиигээд Эзэн Ехоһаашай хүбүүн Еробоһаамай гараар израильшуудые абаруулба.

²⁸ Еробоһаамай дайшалхы баатаршалганууд, тэрэнэй яажа Дамааск болон Хамаат хотонуудые Израильтай хамта Иудын засаглал дороһоо бусаалгаһан ба бусад ябуулганууд тухай «Израилиин хаашуулай түүхын ном» бэшээтэй юм.

²⁹ Тэрэнэй наһа барахада, тэрэниие Израилиин хаашуулай, өөрынь үбгэ эсэгэнэртэй зэргэлүүлжэ хүдөөлүүлбэ. Тэрэнэй һүүлээр тэрэнэй хүбүүн Захарияа хаан болобо.