4 Хаан түрэнүүд 12 - Библи

Иудын хаан – Ёһааш

¹ Еһүүгэй долоодохи жэлээ Израилиин хан түрын засаг барижа байхада, Ёһааш Иудын хаан болоһон байна. Тэрэ Иерусалимда дүшэн жэлдэ хан түрэеэ засаглаба. Тэрэнэй эхэ Цивьяа Бэһээр-Шээбэһээ уг гарбалтай байгаа.

² Ёһааш санаарта Ёядаагай һургаал заабариие баримталжа, бүхы наһандаа Эзэндэ таарамжатай үйлэ хэрэгүүдые хэбэ.

³ Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг байгаа.

Ёһааш Һүмэ һэргээнэ

⁴ Ёһааш санаартадта хандажа: – Эзэнэй һүмын досоохи нангин хэрэгсэлнүүдые бүтээлгэндэ бэлэг болгожо оруулһан, һүмые тэдхэн байгуулганда хүнүүдһээ албата татабари абаһан, Эзэнһээ али нэгэ юумэ туһа эрижэ тангариглалгадаа үргэһэн, санаартадай танилнуудһаа суглуулһан, һүмэдэ мүргэхэеэ ерэһэн һүзэгтэйшүүлэй үргэһэн бүхы мүнгэнүүдые

⁵ санаартад өөһэдынгөө этигэмжэтэ хүнүүдһээ абаг. Тиигээд тэрэ мүнгөөрөө һүмын хаана нэгэ тээнь һандаралгануудые заһабарилуулаг, – гэжэ хэлэбэ.

⁶ Теэд Ёһааш хаанай хорин гурбадахи жэлээ хан түрэеэ засаглажа байхада, санаартад Һүмын һандаралгые заһабарилжа шадабагүй.

⁷ Ёһааш хаан санаарта Ёядаае, мүн бусад санаартадые дуудажа ерүүлээд: – Таанад Һүмын эбдэржэ һандарһан юумэнүүдые юундэ заһабарилуулнагүйбта? Тиимэл хадаа өөһэдынгөө этигэмжэтэ хүнүүдһээ мүнгэ бэшэ бү абагты! Харин тэдэ мүнгэнтнай Һүмын заһабарилгада зорюулагдаһан байгаа, – гэбэ.

⁸ Санаартад арад зонһоо бэшэ мүнгэ суглуулхагүйбди гэжэ үгэеэ үгөөд, Һүмын заһабарилгаһаа болибо.

⁹ Санаарта Ёядаа нэгэ хайрсаг абажа, тэрэнэй дээрэ нүхэ гаргаад, тэрэнээ Һүмын үргэлэй шэрээгэй баруун талада табиба. Үүдэнэй дэргэдэхи харуулшан санаартад Эзэнэй һүмэдэ мүргэхэеэ ерэһэн хүнүүдэй үргэһэн мүнгые тэрэ хайрсаг руу табюулдаг болобо.

¹⁰ Тэрэ хайрсагай мүнгөөр дүүрэхэдэ, хаанай бэшээшэн ахамад санаартан хоёр Эзэнэй һүмэдэ оруулагдаһан мүргэлшэдэй үргэһэн мүнгые хайрсагһаа гаргажа тоолоод, тэдэ мүнгэ уутада хэжэ ябталаад,

¹¹ Эзэнэй һүмые заһабарилуулдаг эрхилэгшэдтэ үгэдэг болобо. Тэдэнэр Эзэнэй һүмэдэ хэһэн ажалайнь түлөө модошо, шулууша дархашуулда,

¹² мүн шулуушадта болон шулуу хайгшадта үгэдэг, Эзэнэй һүмын заһабарилганда хэрэгтэй болоһон модо шулуу ба хайгдаһан шулуунуудые худалдажа абадаг байба.

¹³ Теэд Эзэнэй һүмын һанда ороһон мүнгэнһөө Эзэнэй һүмын табагуудта, хабшуурнуудта, соргонуудта, сүршэхэ аршаан хэдэг аяга ба домбонуудта болон алта мүнгөөр хэһэн элдэб бүхы хэрэгсэлнүүдтэ гаргашалагдабагүй.

¹⁴ Тэрэ мүнгэнһөө гансал Эзэнэй һүмын досоохи ажал хэгшэдтэ, мүн заһабарилганда гаргашалагдадаг байба.

¹⁵ Хүдэлмэришэдтэ тоосооень хэхэеэ Эзэнэй һүмын һанһаа мүнгэ абаһан хүнүүдтэ юунэй түлөө мүнгэ түлэһэн тухайнь тоосохо эрилтэ табигдадаггүй, харин тэдэнэр найдал этигэмжэдэ хүртэдэг байба.

¹⁶ Гэм ба нүгэл сагааруулгын үргэлдэ үргэдэг тахилай мүнгэн Эзэнэй һүмын һанда оруулагдадаггүй, харин тэдэ мүнгэн санаартадта зорюулагдана.

Ёһааш Хазаһээлһээ Иерусалимые абарна

¹⁷ Тэрэ сагта Араамай хаан Хазаһээл дайшалхы аяншалга гаргажа, Гаадые добтолон абаба. Тиигээд тэрэ Иерусалимые булимтаран абахаяа һанаашалба.

¹⁸ Тиихэдэнь Иудын хаан Ёһааш Иудын хаашуул байһан Ёшапаат, Иораам болон Ахазияа гэжэ үбгэ эсэгэнэрэйнгээ һүмэдэ зорюулжа үргэһэн бүхы алта мүнгыень Эзэнэй һүмын ба хаанай ордоной дараануудһаа оложо, тэдэнээ Араамай хаан Хазаһээлдэ эльгээбэ. Тиихэдэнь Хазаһээл Иерусалимда добтолон орохоёо болибо.

¹⁹ Ёһаашай хэһэн бусад үйлэ хэрэгүүд тухай «Иудын хаашуулай түүхын ном» соо бэшээтэй юм.

²⁰ Тэрэнэй өөрынь түшэмэлнүүд нюуса хэлсээ хэжэ, Ёһаашые Бэт-Миллоодо алаба.

²¹ Шимаадай хүбүүн Иозахар, Шомээрэй хүбүүн Ёзабаад, тэрэнэй түшэмэлнүүд Миллоо ошодог харгыда ябаһан тэрэниие алабад. Ёһаашые Давид хотын булашадахи үбгэ эсэгэнэртэйнь зэргэлүүлжэ хүдөөлүүлбэ. Тэрэнэй хүбүүн Амацияа эсэгынгээ орондо хаан болобо.