4 Хаан түрэнүүд 1 - Библи

Элияа ба Израилиин хаан Ахазияа

¹ Ахаабай наһа бараһанай һүүлдэ моһаабууд Израилиин урдаһаа эсэргүүсэн бодобо.

² Ахазияа Самаридахи өөрынгөө ордоной дээдэ дабхарһаа унажа, хэрэлсынгээ тохойлуур эбдэжэ бэрхэтээд, «Энэ бэрхэтэлгэһээ һайжарха гүб гэжэ Экрооной бурхан Баалзэбүүлһээ һурагты» гэһэн даабаритайгаар элшэдээ эльгээбэ.

³ Эзэнэй Эльгээмэл Самариин хаанай элшэдые угтаха ба иигэжэ асууха захиралта Тишбиигэй Элияада үгэбэ: «Израильда Бурхан үгы юм аал? Экрооной шүтөөн Баалзэбүүлһээ үршөөл хайра һураха гэжэ юундэ ерэбэ гээшэбта?

⁴ Эзэн иигэжэ айладана: ши хэбтэһэн оронһоо буунгүй үхэхэш!» Элияа тэдэнэй урдаһаа ошобо.

⁵ Хаанай элшэнэр хаандаа бусабад. – Таанад юундэ бусабат? – гэжэ хаан асууба.

⁶ Тэдэнэр иигэжэ харюусабад: – Бидэнэй урдаһаа нэгэ хүн угтажа гараад: «Таанадые эльгээһэн хаандаа бусагты. Эзэн иигэжэ айладана гээд дамжуулагты: „Израильда Бурхан үгы юм аал? Ши Экрооной шүтөөн Баалзэбүүлһээ үршөөл хайра гуйхаяа эдэ элшэдээ намда эльгээбэ гүш? Ши энээнэйнгээ түлөө оронһоо буунгүй үхэхэш!“» – гэжэ хэлээ.

⁷ Хаан тэдээнһээ иигэжэ асууба: – Таанадые угтагша, эдэ бүгэдые хэлэгшэ хүн ямар түхэлтэй байгааб?

⁸ Тэдэнэр иигэжэ хаанда харюусабад: – Тэрэ хүн хониной арһан дэгэлтэй, бэлхүүһэндээ һур бүһэ бүһэлһэн байгаа. – Тэрэ Тишбиигэй Элияа, – гээд хаан

⁹ тэрээн руу табитын даргые табин сэрэгшэдтэйнь хамта эльгээбэ. Табитын дарга хадын орой дээрэ һууһан Элияада ерэбэ. – Бурханай хүн, – гэжэ тэрэ Элияада хандаба. – Доошоо буу гэжэ хаан шамда захирна!

¹⁰ Элияа тэрээндэ иигэжэ хэлэбэ: – Хэрбэеэ би Бурханай хүн байбални, гал тэнгэриһээ буужа, шамайе болон шинии табин сэрэгшэдые үнэһэн шандаруу болотор шатааг! Гал тэнгэриһээ буужа, тэрэниие болон тэрэнэй табин сэрэгшэдые үнэһэн шандаруу болотор шатааба.

¹¹ Хаан ондоо табинай даргые табин сэрэгшэдтэйнь хамта Элияада дахин эльгээбэ. Тэрэ сэрэгэй дарга Элияада ерээд: – Бурханай хүн! Түргэн доошоо буу гэжэ хаан шамда захирна, – гэбэ.

¹² Элияа тэрээндэ иигэжэ хэлэбэ: – Хэрбэеэ би Бурханай хүн байбални, гал тэнгэриһээ буужа, шамайе табин сэрэгшэдтэйшни хамта үнэһэн шандаруу болотор шатааг! Бурханай гал тэнгэриһээ буужа, тэрэниие табин сэрэгшэдтэйнь хамта үнэһэн шандаруу болотор шатааба.

¹³ Хаан гурбадахи табинайнгаа даргые табин сэрэгшэдтэйнь хамта тэрээндэ эльгээбэ. Тэрэ дарга үндэрлиг өөдэ гаража, Элияагай урда үбдэглэн һуугаад: – Бурханай хүн! Минии ба танай барлагуудай – энэ табин зоной ами наһые хайрлыт!

¹⁴ Тэнгэриһээ бууһан гал түрүүшын хоёр табитын даргые сэрэгшэдтэйнь хамта үнэһэн шадаруу болотор шатаагаа. Харин мүнөө та минии амиды мэндэ ябахые үршөөгыт! – гэжэ гуйба.

¹⁵ Эзэнэй Эльгээмэл Элияада иигэжэ зонхилбо: – Доошоо буу, тэрээнтэй ошолдо, тэрээнһээ бү ай. Элияа бодоод, табитын даргатай хамта хаанда ошожо,

¹⁶ иигэжэ хэлэбэ: – Эзэн иигэжэ айладана: Израильда Бурхан үгы юм шэнги Экрооной шүтөөн Баалзэбүүлһээ үршөөл хайра гуйхаяа элшэдээ эльгээһэнэйнгээ түлөө ши хэбтэһэн орон дээрэһээ бодонгүй үхэхэш!

¹⁷ Ахазияа Эзэнэй Элияада айладаһан аргаар үхэбэ. Тэрэнэй хүбүүгүй байһан тула Ёраам хаан болобо. Ёшапаадай хүбүүн Иораамай Иудын хан шэрээдэ хоёр жэл һуугаад байхада энэ ушар болоо.

¹⁸ Ахазияагай хэһэн бусад үйлэ хэрэгүүд Израилиин хаашуулай угай ном соо бэшээтэй юм.