3 Хаан түрэнүүд 4 - Библи

Соломооной түшэмэлнүүд

¹ Соломоон бүхы Израилиие хааншалан зонхилдог һэн.

² Тэрэнэй түшэмэлнүүд гэбэл: Цадоогой хүбүүн Азаарияа – санаартан;

³ Шишаагай хүбүүд Элихоорэп ба Ахияа – бэшээшэд; Ахилүүдэй хүбүүн Ёшапаат – гүрэнэй данса хадагалагша;

⁴ Ёядаагай хүбүүн Бэнайяа – сэрэгэй жанжин; Цадоок болон Абиатаар – санаартад;

⁵ Натаанай хүбүүн Азаарияа – можонуудай ноёдые хинагша; Натаанай хүбүүн Забууд – санаартан, мүн хаанай зүбшэгшэ;

⁶ Ахишаар – хаанай ордонгой эгээл ехэ түшэмэл; Абдаагай хүбүүн Адонираам – ясагай түлөө харюусагша бэлэй.

⁷ Хаанай ордониие эдеэ хоолоор хангаха уялгатай арбан хоёр можо ноёдые Соломоон томилжо, тэдэ тус тустаа нэгэ һарын туршада өөрын нютаг можоһоо эдеэ хоол асардаг бэлэй.

⁸ Тэдэ ноёдые нэрлэбэл, хада уулата Эпрааим нютаг можодо Хуурай хүбүүн зонхилоо.

⁹ Макаац, Шаалбиим, Бэт-Шээмэш, Элоон (Бэт-Ханаан) хотонуудта Бэн-Дээкэрэй хүбүүн ударидаа.

¹⁰ Аруббоот, Сохоо хотонуудай, мүн Хээпэр орон нютагай түлөө Хээсэд гэгшын хүбүүн харюусалгатай һэн.

¹¹ Абинадаабай хүбүүн бүхы Напаат-Доорой түлөө харюусадаг, тэрэ Соломооной Тапаат басагатай гэрлэнхэй, Соломооной хүрьгэн бэлэй.

¹² Ахилүүдэй хүбүүн Баһанаа Таанаах, Мэгиддоо хотонуудай, Царэтаан хотын хажуудахи, Езрээлһээ доошоо, Бэт-Шэһаанһаа Абээл-Мэхолаа, Ёкмэһаамай нүгөө тала хүрэтэр нэмжыдэг дайдын түлөө харюусалгатай байгаа.

¹³ Бэн-Гээбэрэй хүбүүн Галаадтахи Рамоот хотые, Мэнашшээ гэгшын хүбүүн Яһиирай обог һууринуудые зонхилдог, мүн хэрэм ханатай, гуулин шэбхэнүүдтэй жаран хотонуудтай Башаандахи Аргооб нютаг можые захирдаг бэлэй.

¹⁴ Иддоогой хүбүүн Ахинадааб Маханааим нютаг дайдын түлөө харюусагша һэн.

¹⁵ Ахимаац Напталии можо нютагые зонхилдог, Соломооной басаган Басэмаат һамгатай байгаа.

¹⁶ Хушай гэгшын хүбүүн Баһанаа Ашээр можо нютагта, мүн Бэалоодто захирагша һэн.

¹⁷ Паруаахай хүбүүн Ёшапаат Иссахаар можо нютагта зонхилоо.

¹⁸ Элаагай хүбүүн Шимэй Бэньямиинэй можо нютагта захиран һуугаа.

¹⁹ Үрии гэгшын хүбүүн Гээбэр эмоор яһатанай хаан Сиһооной, мүн Башаанай хаан Оогой ажаһуугша Галаад нютагта зонхилоо. Нэгэл тушаалтан орон нютагай түлөө харюусагша бэлэй.

Соломооной хан түрын һүр жабхалан

²⁰ Иуда болон Израилиин арад зон тэрэ үедэ далайн эрьеын элһэн мэтэ тоолошогүй олон болотороо үдэжэ, баян садхалан, жаргалтай хүхюу ажаһуугаа.

²¹ Евфрат мүрэнэй болон Пилишт орон нютагай хоорондуур оршодог, Египет хүрэтэр нэмжыгшэ дайдануудай хан түрэнүүдые Соломоон зонхилон ажаһуугаа. Тэдэ хан түрэнүүд Соломооной амиды мэндэ сагта үргэлжэ ясаг түлэжэ байгаа.

²² Соломооной хүреэлэнгэй үдэр бүриин хүнэһэн гэбэл, гушан кооро сагаан талхан, жаран кооро хара талхан,

²³ талха таряагаар тэжээһэн арбан, бэлшээреэр адуулһан хорин эбэртэ бодо мал, зуун хонин, буга, зээрэн, гүрөөһэнүүд, тарган тобир галуу тахяанууд бэлэй.

²⁴ Евфрат мүрэнэй зүүн эрьеын бүхы хан түрэнүүдые, Типсаахһаа эхилээд, Гааза хүрэтэр бүхы газар дайдые тэрэ зонхилжо, тойроод байгааша орон нютагуудтаяа эбтэй эетэй ажамидараа.

²⁵ Даанһаа Бэһээр-Шээбэ хүрэтэр нэмжыдэг газар дайдатай Иудын болон Израилиин зон Соломооной амиды байгаа сагта ажана амгалан, өөрын үзэмэй модоной һөөгүүд, инжир модод дороо ажаһуугаа.

²⁶ Соломоондо дүшэ мянган хүллэдэг морид, арбан хоёр мянган унаха морид бии һэн.

²⁷ Можо нютагай ноёд өөр өөрын һарада Соломоон хаанда бүхы эдеэ хоолынь дутамаггүй асардаг бэлэй.

²⁸ Моридыень ешмээн, һолоомоор тэдэ жэншэдгүй хангаа.

Соломооной агууехэ мэргэн ухаан

²⁹ Бурханай хайраар Соломоон сэсэн мэргэн, угаа ехэ эрдэмтэй, хизааргүй ухаатай байгаа.

³⁰ Зүүн зүгэй сэсэн мэргэшүүлһээ, Египедэй сэсэшүүлһээ тэрэ һураггүй дээгүүр мэргэн ухаатай һэн.

³¹ Эзраахай Этаанһаа, Махоолой хүбүүд Һэмаан, Халкоол, Дардааһаа, юрэдөө, бүхы зонһоо тэрэ сэсэн мэргэн, хаяа хадхаад ажаһуугша орон нютагуудай уладта тэрэ алдаршаад байгаа.

³² Соломоон гурба мянган мэргэн үгүүлэл бэшээ, мянгаад дуу зохёогоо.

³³ Ургамал модон тушаа – Ливаанай үнэтэ хуша модонһоо эхилээд, хана дээгүүр ургадаг ногоон тухай, амитад, жэгүүртэн, мүлхидэг хорхой, загаһа жараахай тухайшье тэрэ үгүүлэгшэ һэн.

³⁴ Дэлхэйн хаашуул тэрэнэй сэсэн мэргэн тушаа дуулажа, мэргэн үгэнүүдыень шагнахыень хүнүүдые зорюута эльгээдэг бэлэй.