3 Хаан түрэнүүд 22 - Библи

¹ Араам болон Израилиин хоорондо гурбан жэлэй туршада дайн дажар болоогүй.

² Гурбадахи жэлдэнь Иудын хаан Ёшапаат Израилиин хаанда зорижо ошобо.

³ Израилиин хаан түшэмэлнүүдтээ: – Галаадай Рамоот хото манай гэжэ таанад мэдэнэ гүт? Юундэ юушье хэнэгүй, Араамай хаанһаа тэрэнээ бусаанагүйбибди? – гэжэ асууба.

⁴ Тиигээд тэрэ: – Галаадай Рамоодто добтолхоёо намтай хамта гараха гүш? – гэжэ Ёшапаадһаа асуугаа бэлэй. Тиихэдэнь Ёшапаат Израилиин хаанда: – Ши хайшаа ябахабши, бишье тиишээ ябахаб. Минии сэрэг шинии сэрэгэй хойноһоо ябаха, минии морид шинии моридой хойноһоо зорихо, – гэбэ.

⁵ Удаань Ёшапаат Израилиин хаанда: – Түрүүн Эзэнһээ зүбшөөл һурыш, – гэбэ.

⁶ Израилиин хаан дүрбэн зуугаад лүндэншые суглуулжа: – Галаадай Рамоодто добтолхомнай гү, али үгы гү? – гэжэ асууба. Тэдэ: – Добтологты, Эзэн тэрэниие танай гарта үгэжэ байна, – гээд харюусаба.

⁷ Харин Ёшапаат: – Эзэнһээ асууха үшөө ондоо лүндэншэ эндэ бии гээшэ гү? – гээд асууба.

⁸ Израилиин хаан Ёшапаадта: – Эзэнэй харюу дамжуулан хэлэдэг үшөө нэгэ хүн биил даа, теэд би тэрээндэ дурагүйб, юуб гэхэдэ, тэрэ нам тушаа гансал муугаар уридшалан хэлэдэг, һайн юумэ хэлээгүй. Имлаагай хүбүүн Михай гээшэ, – гэбэ. Ёшапаат тэрээндэ: – Үгы, хаан, тиигэжэ бү хэлыш, – гэбэ.

⁹ Тиихэдэнь Израилиин хаан нэгэ түшэмэлөө дуудажа: – Имлаагай хүбүүн Михай гээшые түргөөр дуудажа асара, – гэбэ.

¹⁰ Израилиин хаан болон Иудын Ёшапаат хаан хаан хубсаһаяа үмдэнхэй, Самари хотын талмай дээрэ, хаалгануудай хажууда өөр өөрын хаан шэрээдэ заларанхай һуугаа. Бүхы лүндэншэд урдань абарал буулгажа байгаа бэлэй.

¹¹ Хэнаанаагай хүбүүн Цэдэкиия өөртөө түмэр эбэрнүүдые хэжэ, иигэжэ соносхобо: – Эзэн мүн айладхана: Араамай улад зониие иимэ эбэрнүүдээр мүргэжэ, дууһан хюдахаш.

¹² Бүхы лүндэншэдшье тон тиимээр уридшалан айладхажа байгаа: – Галаадай Рамоодто добтолон орогты, амжалта туйлахат, Эзэн тэрэниие танай гарта үгэнэ.

¹³ Михай гэгшые дуудахаяа ошогшо нэгэн: – Михай, лүндэншэд нэгэн хүн мэтэ бултадаа хаанда һайн мэдээ дуулган, лүндэн табина. Танайшье үгэ тэдээндэл адли байг лэ, һайн мэдээ дуулгыт даа, – гэбэ.

¹⁴ Михай: – Эзэнэй нэрээр тангаригланаб! Эзэнэйл айладаһан үгэ би дамжуулхаб, – гэбэ.

¹⁵ Тэрэ хаанда ерэбэ. Хаан тэрээнһээ: – Михай, Галаадай Рамоодто добтолон орохомнай гү, али үгы гү? – гэжэ асууба. Тэрэ: – Добтолон орогты, амжалта туйлахат, Эзэн тэрэниие танай гарта үгэнэ, – гэбэ.

¹⁶ Хаан тэрээндэ: – Эзэнэй нэрэһээ дуугархадаа, ши намда зүбхэн үнэн сэхые дуулга гэжэ хэды дахин шамда тарнидан хэлэхэбиб? – гэхэдэнь,

¹⁷ тэрэ хэлэбэ: – Хонишонгүй хонид мэтэ хада уулаар таранхай Израилиин сэрэг харанаб. «Тэдэ удамаршагүй. Дай үүдхэнгүй, гэр руугаа амар тайбан бусаг лэ» гэжэ Эзэн айладана.

¹⁸ Израилиин хаан Ёшапаадта: – Тэрэ нам тушаа һайнаар бэшэ, гансал муугаар уридшалан айладхадаг гэжэ би хэлээ бэшэ һэн гүб? – гэбэ.

¹⁹ Михай харюудань: – Эзэнэй айладхал шагна! Эзэнэй сэнтиидээ залараад, хажуудань баруун, зүүн гараарнь Огторгойн сэрэг барандаа зогсон байна гэжэ би харааб.

²⁰ Эзэн иигэжэ асууба: «Ахаабай хорхойень хэн хүдэлгэжэ, Галаадай Рамоот руу абаашажа шадахаб? Тэрэ тэндэ хосорхо һэн». Булта өөр өөрын һанамжануудые дурадхажа байхада,

²¹ нэгэ һүнэһэн урагшаа гаража, Эзэнэй урда зогсоод, «би шадахаб» гэбэ. «Ямар аргаар?» гэжэ Эзэн тэрээнһээ асууба.

²² Тэрэ «би ошожо, тэрэнэй бүхы лүндэншэдые худал абарал буулгадаг болгохоб» гэбэ. Эзэн «шадахаш. Ошожо, энээнээ бүтээ» гээ һэн.

²³ Тиигээд мүнөө Эзэн шинии лүндэншэдые худал хэлэдэг болгоо. Тэрэ шамда гай тодхор ушаруулха гээд шиидээ.

²⁴ Хэнаанаагай хүбүүн Цэдэкиия дүтэлөөд, Михай гэгшын хасар альгадаад, – Эзэн намда бэшэ, гансал шамда айладана гэжэ нээрээ һанажа байна гүш?! – гэбэ.

²⁵ Михай хэлэбэ: – Хорохо газар бэдэржэ, нэгэ таһалгаһаа нүгөө таһалга руу гүйжэ байхадаа энээниие мэдэхэш даа.

²⁶ Израилиин хаан захирба: – Михайые баригты! Тиигээд хотын дарга Аммоондо болон хаанай хүбүүн Ёһаашда абаашагты!

²⁷ Энээниие түрмэ шорондо хаяжа, минии амиды мэндэ бусатар хилээмэ, уһаар үл залгуулан байгты гээд хаан захирна гэжэ хэлэгты.

²⁸ Михай хэлэбэ: – Амиды мэндэ бусаа һааш, Эзэн намда айладаагүй гээд элирхэ. Тиигээд тэрэ иигэжэ зондо соносхобо: – Бултадаа энээниие шагнаад, хадуужа абагты!

Байлдаанда Ахаабай диилдэһэн ушар ба үхэлынь

²⁹ Израилиин хаан Ахааб болон Иудын хаан Ёшапаат сэрэгээ дахуулан, Галаадай Рамоот хотодо добтолхоёо ошобо.

³⁰ Ахааб Ёшапаадта иигэжэ хэлэбэ: – Би хубсаһаа һэлгээд, байлдаанда орохом. Харин ши хаанай хубсаһа үмдөөд бай. Израилиин хаан ондоогоор хубсалжа, байлдаан руу оробо.

³¹ Араамай хаан дайшалхы тэргэнүүдэйнгээ гушан хоёр ноёдто иигэжэ захирба: – Юрын сэрэгтэйшье, сэрэгэй ноёдтойшье бү тулалдаарайгты, гансал Израилиин хаанда добтолооройгты.

³² Дайшалхы тэргэнүүдэй ноёд Ёшапаадые хараад, «Израилиин хаан энэ мүн» гэжэ һанажа, тэрээнтэй тулалдахаа хотирбо. Теэд Ёшапаадай хашхархада,

³³ дайшалхы тэргэнүүдэй ноёд тэрэнэй Израилиин хаан бэшэ байһые харахадаа, тэрээнһээ хотироо һэн.

³⁴ Араамай нэгэ сэрэгшэ һурша номоор харбахадаа, өөрөөшье ойлгоногүй Израилиин хааниие хуягайнь забһарай нүхэ оножо шархатуулба. Тэрэ дайшалхы тэргын жолоо баригшада: – Эрьеэрэй, байлдаанһаа намайе гарга. Би шархатааб, – гэбэ.

³⁵ Теэд тулалдаан тэрэ үдэр бүри эршэдэжэ, хаан Араамай сэрэгэй урдаһаа харан, дайшалхы тэргэ соогоо байха баатай болоо һэн. Шархаһаань шуһан урдажа, тэргын дотор адхарба. Үдэшэ тээ хаан наһа бараба.

³⁶ Наранай орожо байхада, Израилиин бүхы жагсаалаар иимэ захирал соносхогдобо: – Бултадаа өөрын хото руу, өөрын газар руу ябая!

³⁷ Иигэжэ Ахааб хаан наһа бараа бэлэй. Бэень Самари руу асарагдажа, тэндэ хүдөөлүүлэгдэбэ.

³⁸ Самариин сөөрэмэй хажууда тэрэ дайшалхы тэргые угаахадань, Эзэнэй айладаһанай ёһоор, нохойнууд хаанай шуһа долёожо, янхан эхэнэрнүүд тэндэһээ бэеэ угаажа байгаа.

³⁹ Ахаабай бусад хэрэгүүд, заанай яһаар бодхон бариһан ордон, бариһан бүхы хотонууд тухайнь Израилиин хаашуулай угай бэшэг соо бэшээтэй.

⁴⁰ Ахааб элинсэг хулинсагуудайнгаа булаша бунханда хүдөөлүүлэгдэжэ, орондонь Ахазияа хүбүүниинь хаан шэрээдэ заларба.

Иудын хаан – Ёшапаат

⁴¹ Израилиин хаан Ахаабай дүрбэдэхи жэлээ хааншалха үедэ Асаагай хүбүүн Ёшапаат Иудын хаан болоһон юм.

⁴² Ёшапаат гушан табатайдаа хаанай шэрээдэ һуужа, Иерусалимда хорин табан жэлэй туршада хааншалаа. Эхэнь Шилхиигэй басаган Азубаа бэлэй.

⁴³ Тэрэ Асаа эсэгынгээ жэшээ даган, Эзэндэ таатай хэрэгүүдые эрхилэн ябаа. Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг, уталгануудые ууюулдаг байгаа.

⁴⁴ Ёшапаат Израилиин хаантай амгалан тайбан байха тушаа хэлсээ баталаа.

⁴⁵ Ёшапаадай бусад хэрэгүүд, баатаршалганууд Иудын хаашуулай угай бэшэг соо бэшээтэй.

⁴⁶ Үшөө Асаа эсэгынь амиды мэндэ байхада бии байгааша янхан эхэнэр, эрэшүүлые тэрэ үгы болгон усадхаа.

⁴⁷ Эдоомдо тэрэ үедэ хаан байгаагүй, хаанай томилон табиһан захирагша тэрэ орон нютагые зонхилдог байгаа.

⁴⁸ Опиир гэжэ газар руу алта олзолхын тула ошохоёо Ёшапаат далайн мантан онгосонуудые баряа. Теэд тэдэнь Эциһоон-Гээбэртэ бутаран һалаа бэлэй. Иигэжэ хүрэхэ газараа хүрөөгүй.

⁴⁹ Тиихэдэнь Ахаабай хүбүүн Ахазияа Ёшапаадта: – Минии зонтой хамта танай зон далайн онгосоор тамардаг байг лэ, – гэбэ, харин Ёшапаат зүбшөөгөөгүй.

⁵⁰ Ёшапаат наһа баража, элинсэг хулинсагтаяа хамта Давидай хото соо хүдөөлүүлэгдөө һэн. Тэрэнэй орондо Иораам хүбүүниинь хаан шэрээдэ заларба.

Израилиин хаан – Ахазияа

⁵¹ Иудын хаан Ёшапаадай арбан долоодохи жэлээ хааншалха үедэ Ахаабай хүбүүн Ахазияа Самарида Израилиин хаан болоһон юм. Тэрэ Израилиие хоёр жэл соо хааншалхадаа,

⁵² Эзэндэ таагүй хэрэгүүдые хэжэ, эхэ, эсэгынгээ болон Израилиие нүгэлдэ оруулһан Набаадай хүбүүн Еробоһаамай жэшээ даган ябаа.

⁵³ Тэрэ Баалда шүтэн мүргэжэ, эсэгэдээл адли, Израилиин Эзэн Бурханиие бүхы үйлэ хэрэгүүдээрээ уурлуулаа бэлэй.