3 Хаан түрэнүүд 17 - Библи

Лүндэншэ Элияа ган гасуур тухай зүгнэнэ

¹ Галаадтахи Тишбиигэй лүндэншэ Элияа Ахаабта иигэжэ хэлэбэ: – Минии зальбардаг Израилиин Эзэн Бурханай нэрээр тангаригланаб! Удаадахи хоёр жэлэй туршада шүүдэршье унахагүй, бороошье орохогүй. Гансал минии хэлэхэдэ орохо.

² Эзэн тэрээндэ иигэжэ айладхаба:

³ – Энэ газар орхижо, зүүн зүг руу шэглэн ошоод, Иордан голһоо зүүлжээ урдагша Хэриит горхоной хажуугаар хоргодо.

⁴ Энэ горхонһоо ундалжа байхаш, тэндэ хирээнүүдтэ шамайе эдеэ хоолоор ханган байхыень Би захирааб.

⁵ Тэрэ Эзэнэй үгэ дуулажа, ошожо, Иорданһаа зүүлжээ урдагша Хэриит горхоной хажууда үлэбэ.

⁶ Хирээнүүд тэрээндэ үглөө, үдэшэ хилээмэ болон мяха асардаг, горхонһоо тэрэ ундалдаг байба.

⁷ Нэгэ хэды сагай удаа тэрэ горхон хаташаба, юуб гэхэдэ, тэрэ нютагта бороо ороогүй шуу.

Элияа Зарэпаадай бэлбэһэн эхэнэртэ туһална

⁸ Эзэн Элияада иигэжэ айладаба:

⁹ – Сидооной хажуудахи Зарэпаат руу яба. Тэндээ үлөөрэй. Шамайе хооллуулдаг байха тухай нэгэ бэлбэһэн эхэнэртэ захирааб.

¹⁰ Элияа Зарэпаат руу ошобо. Хотын хаалгануудта дүтэлөөд харахадань, нэгэ бэлбэһэн эхэнэр хатаһан мүшэр суглуулжа ябана. Тэрэ эхэнэрые дуудаад: – Намда нэгэ амһарта соо ууха уһа хэжэ асарыт даа, – гэжэ гуйба.

¹¹ Эхэнэрэй уһа абажа ерэхэеэ ошоходонь, тэрэ хойноһоонь хашхарба: – Хилээмэ мүн лэ намда асарыт.

¹² Харин тэрэ эхэнэр: – Танай Эзэн Бурханай нэрээр тангаригланаб, намда хилээмэн үгыл. Аяга соо нэгэ адха гурил, нэгэ дуһал болохо гэхээр оливын тоһон бии. Харагты даа, би хоёр модо оложо суглуулаад, гэртээ ошожо, энээниие бэлэдхэжэ болгохоб, тиигээд хүбүүнтэеэ хамта эдеэд, удаань хоюулаа үхэхэбди, – гэбэ.

¹³ – Бү һанаагаа зобо, – гэжэ Элияа хэлэбэ. – Хэлээшэ юумэеэ ошожо хэ. Харин урид намда энээнһээ багахан талха хээд асара. Өөртөө болон хүбүүндээ энээнэй удаа эдеэ хоол хэхэш.

¹⁴ Израилиин Эзэн Бурханай айладаһанай ёһоор, Эзэнэй газар руу бороо эльгэтэр аяга соо гурил ба оливын тоһон дууһахагүй!

¹⁵ Тэрэ эхэнэр ошожо, Элияагай хэлээшээр хэжэ, өөрөөшье, өөрынь гэр бүлэшье, Элияашье олон үдэрэй туршада эдеэ хоолтой байба.

¹⁶ Аяга соо гурил ба оливын тоһон дууһанагүй. Элияа гэгшээр дамжуулан Эзэнэй айладхаһанай ёһоор хэрэг бүтэбэ.

Элияа бэлбэһэн эхэнэрэй хүбүүе амидыруулна

¹⁷ Энээнэй удаа гэрэй эзэн эхэнэрэй хүбүүн ехэ үбшэлжэ, амисхалынь таһалдаба.

¹⁸ Тэрэ эхэнэр Элияада: – Би танда ямар муу юумэ хээбиб? Бурханай хүн гэжэ таниие һанаалби. Харин та минии нүгэлые һануулжа, хүбүүем хюдахаяа ерэһэн байгаат, – гэбэ.

¹⁹ – Хүбүүгээ намда үгэ, – гэжэ хэлээд, хүбүүень тэрэ үргэн абажа, өөрынгөө байдаг таһалга руу абаашаад, унтари дээрээ хэбтүүлбэ.

²⁰ Элияа Эзэндэ зальбарба: – Эзэн Бурхамни! Та минии тогтоһон энэ гэрэй бэлбэһэн эхэнэрэй хүбүүе үхүүлжэ, гай буулгаха юм гүт?!

²¹ Хүбүүн дээрэ тэрэ гурба дахин алдалан хэбтээд, Эзэндэ зальбарба: – Эзэн Бурхамни! Энэ үхибүүнэй амиие бусаагыт!

²² Эзэн Элияа гэгшын гуйлта дуулажа, үхибүүнэй ами наһа бусаажа, тэрэнь амилжа эхилбэ.

²³ Элияа үхибүүе тэбэрин абаад, дээдэ таһалгаһаа буулган, эхэдэнь үгэбэ. Тиигээд тэрэ хэлэбэ: – Харыш, хүбүүншни амиды мэндэл.

²⁴ Тэрэ эхэнэр Элияада: – Одоол би мүнөө таниие Бурханай хүн гэжэ танижа, үнэхөөрөө Эзэн танаар дамжуулан айладана гээд мэдэбэб! – гэжэ хэлэбэ.