3 Хаан түрэнүүд 13 - Библи

¹ Зай, уталга ууюулхаяа бэлдэжэ, үргэлэй шэрээгэй хажууда Еробоһаамай зогсожо байхада, Бурханай хүн Иудаһаа Бэт-Ээлдэ Эзэнэй зарлигаар ерэбэ.

² Тэрэ үргэлэй шэрээдэ Эзэнэй айладхал хашхаран соносхобо: – Үргэлэй шэрээ, үргэлэй шэрээ! Эзэн иигэжэ айладхаа: «Давидай уг удамда Ёшияа гэжэ нэрэтэй хүбүүн түрэхэ. Тэрэ шам дээрэ уталга ууюулдаг, мүргэлэй обоонуудай санаартадые үргэл болгон шатааха, хүнэй яһануудые шам дээрэ галдаха!»

³ Бурханай хүн үшөө иигэжэ нэмэбэ: – Эзэн үнэхөөрөө энээниие айладхаа гэһэнэй дүлгэ тэмдэг гэбэл, иимэ: хараарайт, үргэлэй шэрээ хамхаран бутарха, дээрэнь байгааша үнэһэн таран хиидэхэ.

⁴ Бурханай хүнэй Бэт-Ээлэй үргэлэй шэрээдэ хандан айладхаһые хаан дуулахадаа, гараараа тэрээн руу заагаад: – Баригты энэ хүниие! – гэжэ захирба. Тэрэ дары заагааша гарынь, яагаашье һаань, хүдэлхэеэ болишобо.

⁵ Эзэнэй үгөөр Бурханай хүнэй үзүүлһэн дүлгэ тэмдэгэйнь ёһоор, үргэлэй шэрээ хамхаран бутарба, дээрэнь байгааша үнэһэн таран хиидэбэ.

⁶ Хаан Бурханай хүндэ хандан: – Минии түлөө Эзэн Бурхандаа мүргыш даа, гарайм хүдэлдэг болохые гуйгыш даа, – гэбэ. Бурханай хүнэй Эзэндэ зальбархада, хаанай гар эдэгэжэ, урдынхидаал адли болобо.

⁷ Хаан Бурханай хүндэ: – Намтай хамта ошожо, эдеэ хоол баригты, бэлэг танда үгэхэб, – гэбэ.

⁸ Харин тэрэ хаанда иигэжэ харюусаба: – Өөрынгөө ордоной хахадыеньшье үгөө һаатнай, би тантай ошохогүйб, энэ газарта эдеэ хоол эдихэгүйб, уһа уухагүйб.

⁹ Ушар юуб гэхэдэ, Эзэн намда иигэжэ зарлигтаһан юм: «Тэндэ хоол бү баряарай, уһа бү уугаарай, ябаһан харгы замаараа бү бусаарай».

¹⁰ Тиигээд тэрэ Бэт-Ээл руу ерэһэн харгыгаараа бэшэ, ондоо харгыгаар эрьен ябаба.

Лүндэншын үгэ дуулахагүй ушар

¹¹ Тэрэ сагта Бэт-Ээлдэ нэгэ үндэр наһатай лүндэншэ ажаһуудаг байгаа. Тэрэнэй хүбүүдэй нэгэн эсэгэдээ ерээд, Бэт-Ээлдэ мүнөөдэр тэрэ Бурханай хүнэй хэһэн хэрэгүүдые, хаанда хэлээшэ үгэнүүдыень хөөрэжэ үгэбэ.

¹² Эсэгэнь хүбүүдһээ: – Тэрэ ямар харгыгаар бусаа бэ? – гэжэ асууба. Хүбүүдынь Иудаһаа ерэһэн Бурханай хүнэй һөөргэлһэн харгые харуулба.

¹³ Тэрэ хүбүүдтээ: – Минии элжэгэн дээрэ эмээл тохогты, – гэбэ. Хүбүүдынь элжэгэн дээрэ эмээл тохобо. Тиигээд тэрэ элжэгээ унан мордобо.

¹⁴ Үндэр наһатай лүндэншэ Бурханай хүнэй хойноһоо ябажа, сарса модон доро һуужа байхадань тэрэниие олоод: – Иудаһаа ерээшэ Бурханай хүн та мүн гүт? – гэжэ асууба. – Би, – гэбэ тэрэ.

¹⁵ – Минии гэртэ ошожо, эдеэ хоол барижа хайрлыт, – гэжэ үбгэн лүндэншэ уриба.

^16-17 – Би тантай хамта бусан ябажа шадахагүйб, юуб гэхэдэ, «тэндэ эдеэ хоол бү баряарай, унда бү уугаарай, ябаһан харгыгаараа бү бусаарай» гэжэ Эзэн намда захирһан юм, – гэжэ Бурханай хүн харюусаба.

¹⁸ – Би тандал адли лүндэншэ гээшэб. Эльгээмэл Эзэнэй үгэ намда дамжуулан, «тэрэниие гэртээ оруулжа, эдеэ хоол, унда таби» гэжэ айладхаа юм, – гэжэ үндэр наһатай лүндэншэ хэлэбэ. Гэбэшье тэрэ худалаар хэлээ.

¹⁹ Бурханай хүн үбгэн лүндэншэтэй хамта гэртэнь ерэжэ, эдеэ хоол бариба, ундалба.

²⁰ Эдеэ хоолой шэрээгэй саана тэдэнэй һуужа байха үедэ Эзэнэй үгэ үбгэн лүндэншэдэ хүрэжэ ерэбэ.

²¹ Иудаһаа ерээшэ Бурханай хүндэ тэрэ иигэжэ шангаар соносхобо: – Эзэн иигэжэ айладажа байна: Минии үгэ дуулангүй, захиралтыем дүүргээгүй байһанайш түлөө,

²² һөөргөө бусажа, Минии хориһон газарта эдеэлжэ ундалжа байһанайш түлөө иимэ юумэн тохёолдохо: наһа барахадаш, шамайе үбгэ эсэгэнэрэйш булашада хүдөөлүүлхэгүй.

²³ Эдеэлжэ уужа дүүргэһэнэйнь удаа тэрэ Бурханай хүндэ элжэгэ эмээллэжэ үгэбэ.

²⁴ Бурханай хүн аян замда гараба. Харин харгыдань арсалан дайралдажа, Бурханай хүниие алажархиба. Бэень харгы зам дээрэ хаяатай хэбтэжэ, элжэгэн хажуудань зогсонхой, бэеын хажууда арсалан зогсожо байба.

²⁵ Хажуугаар үнгэржэ байгааша улад зон харгы дээрэ хэбтэжэ байһан бэе хүүрынь, дэргэдэнь зогсожо байһан арсаланиие хаража, энээн тушаа үбгэн лүндэншын ажаһуудаг хото соо хөөрэбэ ха.

²⁶ Аян замһаань тэрэниие бусааһан тэрэ үбгэн лүндэншэ энээн тушаа дуулаад: – Эзэнэй зарлиг дүүргээгүй тэрэл Бурханай хүн ха. Эзэн тэрээндэ айладаһанайнгаа ёһоор, тэрэниие арсаланда үгэжэ, таһа татуулаад алаба, – гэбэ.

²⁷ – Элжэгэ эмээллэгты, – гэжэ хүбүүдтээ хэлэхэдэнь, тэдэнь эмээллэбэ.

²⁸ Үбгэн лүндэншэ харгыда гаража, аян зам дээрэ хэбтэһэн бэе хүүрыень олобо. Бэеын хажууда элжэгэн ба арсалан зогсожо байгаа. Арсалан бэе хүүрые эдеэгүй, элжэгэндэ хүрөөгүй байба.

²⁹ Лүндэншэ Бурханай хүнэй хүүрые үргэжэ, элжэгэн дээрэ тээгээд, гашуудалай ёһолол хэжэ, хүдөөлүүлхэеэ һөөргэнь Бэт-Ээл руу абаашаба.

³⁰ Тэрэ шарил хүүрые өөрынгөө булашада хүдөөлүүлжэ, «хөөрхы даа, дүүмни!» гэжэ уйлан хайлан байгаа бэлэй.

³¹ Хүдөөлүүлһэнэй удаа тэрэ хүбүүдтээ иигэжэ хэлэбэ: – Минии наһа барахада, Бурханай хүнэй хүдөөлүүлэгдэһэн энэ булаша соо, яһануудайнь хажууда намайе табяарайгты.

³² Юуб гэхэдэ, Бэт-Ээлэй үргэлэй шэрээ болон Самариин хотонуудаар мүргэлэй обоонууд тушаа тэрэнээр дамжуулан Эзэнэй айладаһаниинь бэелүүлэгдэхэ.

Еробоһаам нүгэлөө олошоруулжал байна

³³ Иимэ ушарай болоһоной удаа Еробоһаам хаан бузар муу замһаа эрьебэгүй, мүргэлэй газарнуудаар юрын улад зонһоо санаартадые томилон табиһаар лэ байба. Дуратай хүндэ тэрэ һахил хүртүүлжэ байгаа.

³⁴ Иимэ нүгэлтэ хэрэгүүд тэрэнэй уг удамые һэе мүргүйгөөр усадхагдаха тээшэнь хүтэлэн байгаа бэлэй.