3 Хаан түрэнүүд 12 - Библи

¹ Бүхы израильшууд Рэхобаамые хаан болгохо гэжэ Шэхээмдэ сугларһан байгаа. Тиимэһээ Рэхобаам Шэхээмдэ ерэбэ.

² Набаадай хүбүүн Еробоһаам Соломоон хаанһаа тэрьедэн Египет руу ошоһон аад, тэрээн тушаа дуулахадаа, һөөргөө бусаба.

³ Израилиин улад зон тэрээниие дуудажа ерүүлээд, хамта Рэхобаам хаанда ошожо, иигэжэ хэлээ бэлэй:

⁴ – Танай эсэгэ маанадые ехэ хүндөөр дарлаһан юм. Харин та эсэгынгээ шэрүүн зарлиг зөөлэрүүлжэ, маанад дээрэ тээһэн хүндэ ашаае хүнгэрүүлжэ, ажалыемнай хүнгэдхөө гээшэ һаатнай, бидэ Танда албалан байхалди.

⁵ – Ябагты, гурбан хоногой һүүлээр дахин намда ерээрэйт, – гэжэ Рэхобаам тэдээндэ харюусаба. Арад түмэн тараба.

⁶ Эсэгынь амиды байхада албалжа байгаа аха захатантай Рэхобаам зүбшэжэ: – Ямар харюу энэ арад түмэндэ хэлэхэбиб? – гэжэ асууба.

⁷ – Хэрбээ нэгэ үдэрөөр энэ улад зонойгоо барлагынь боложо, хэрэгтэй юумыень бэелүүлээ, зүбшөөһэн харюу үгэбэлтнай, тэдэ хэтын хэтэдэ танай зарасанар байхал, – гэжэ тэдэ хэлээ һэн.

⁸ Харин Рэхобаам тэдэнэй зүбшэл хараада абангүй, өөртэйнь хамта үдэһэн, мүнөө өөрынь түшэмэлнүүд болоһон залуу зонтой зүбшэл бариба.

⁹ – Эсэгынтнай маанад дээрэ ашаһан хүндэ ажалые хүнгэлыт гэжэ намда хэлэжэ байгааша арад зондо юун гэжэ харюу үгэхэбиб, намда зүбшэл хэлэгты, – гэжэ тэрэ тэдээндэ хандаба.

¹⁰ Өөртэйнь хамта үдэһэн залуу зон тэрээндэ иигэжэ хэлэбэ: – Эсэгэтнай маанад дээрэ хүндэ ажал ашаа, тэрэниие хүнгэлыт гэжэ танда хэлэжэ байгааша тэрэ улад зондо иимэ харюу үгэгты: «Минии шэгшы хурган эсэгымни бэлхүүһэнһээ бүдүүн юм!

¹¹ Зай, минии эсэгэ таанарта хүндэ ажал хүүлээ юм гээшэ һаань, би тэрэ ажалые бүри хүндэ бологохоб! Минии эсэгын таанадые ташуураар сохёо хадань би таанадые адаалхай түмэр түдэгөөр хэһээхэб!»

¹² Гурбадахи үдэртөө намда ерээрэйгты гэжэ хаанай захирһанай ёһоор Еробоһаам ба бүхы улад зон Рэхобаамда гурбадахи үдэртөө ерэбэ.

¹³ Хаан аха захатанай зүбшэл анхарангүй, арад зондо хатуу шэрүүн харюу үгэбэ.

¹⁴ Тэрэ залуу зоной зүбшэл хараада абажа, иигэжэ хэлэбэ: – Минии эсэгэ таанадта хүндэ ажал хүүлээ, би тэрэниие бүри хүндэ болгохоб! Эсэгэмни таанадые ташуураар сохидог байгаа, би таанадые адаалхай түмэр түдэгөөр хэһээхэб!

¹⁵ Иигэжэ хаан арад зоной гуйлтые анхарбагүй. Ушар юуб гэхэдэ, иимэ аргаар Шилооной Ахияа гэгшээр дамжуулан, Набаадай Еробоһаам хүбүүндэ Эзэнэй айладхагша иигэжэ хүсэлдэхэ байгаа бшуу.

¹⁶ Хаан маанадай гуйлта анхарбагүй гэжэ Израилиин зон бултадаа ойлгоходоо, иигэжэ дуугаралдаба: «Давидай гэр бүлэ маанарта хэд болохоб?! Ишайн хүбүүн маанадта хуби үлөөхэгүйл. Израилиин зон, гэртээ тарая даа! Рэхобаам өөрынгөө арадые зонхилон байг, маанарта бү хамаархаг». Тиигэжэ Израилиин бүхы улад зон гэр гэртээ тараа бэлэй.

¹⁷ Рэхобаам иигэжэ гансал Иудын обогой хотонууд дээрэ хаан болон зонхилжо үлөө бэлэй.

¹⁸ Зараса хүдэлмэришэдые хинагша Адораамые Рэхобаамай эльгээхэдэ, израильшууд тэрээниие шулуудан алажархиба. Харин Рэхобаам хаан тэргэдээ яаралтай һуужа, Иерусалим руу тэрьедээ бэлэй.

¹⁹ Иигэжэ тэрэ сагһаа мүнөө хүрэтэр Израилиин зон Давидай үри һадаһадта эсэргүү байдаг.

Израилиин хан шэрээдэ Еробоһаамай заларал

²⁰ Еробоһаамай бусаһан тушаа Израилиин улад зон дуулахадаа, тэрэниие суглаандаа дуудажа асаруулаад, Израилиин хаан болгобо. Гансал Иудын обог зон Давидай уг удамда үнэн зандаа үлөө бэлэй.

²¹ Рэхобаам Иерусалим руу бусаад, Иудын болон Бэньямиинэй обогуудһаа дайнда дүрэтэй зуун наян мянган эрхим сэрэгшэдые суглуулба. Тэдэ Израильда добтолжо, бүхы орон нютагые Соломооной хүбүүн Рэхобаамай мэдэлдэ оруулха ёһотой байгаа.

²² Гэбэшье Бурхан лүндэншэ Шэмаяада иигэжэ айладхал буулгаба:

^23-24 «Өөрын аха дүүнэртэй, Израилиин арад зонтой, дайн дажар бү үүдхэгты, гэр гэртээ харигты, юуб гэхэдэ, эдэ бүгэдые Эзэн ушаруулаа гэжэ Соломооной хүбүүн, Иудын хаан Рэхобаамда болон Иудын ба Бэньямиинэй бүхы зондо ойлгуулан хэлэ». Тэдэ Эзэнэй үгэ дуулажа, гэр гэртээ хариба.

Даан ба Бэт-Ээлдэ онгодые Еробоһаам табина

²⁵ Эпрааим хада дээрэ Шэхээм хото Еробоһаам бүхэлжэ, барилга ябуулба. Тэндэ тэрэ байрлаа һэн. Удаань тэрэнээ орхижо, Пэнүһээл хото бүхэлөө бэлэй.

^26-27 Нэгэтэ тэрэ «энэ арад зон Иерусалим руу Эзэнэй Һүмэдэ тахил үргэхэеэ ябажа байхадаа Иудын хаан Рэхобаамда татагасан эрьехэеэ магад. Тиигэбэл, тэдэ намайе алаад, Рэхобаамай хааншалга мэдэрхэл» гэжэ һанажа эхилбэ.

²⁸ Зүбшэһэнэй удаа хаан хоёр алтан тугал бүтээбэ. Тиигээд тэрэ улад зондо иигэжэ хэлэбэ: – Иерусалим руу бэшэ ябаһанай хэрэггүй. Израилиин улад зон, таанадые Египедһээ гаргаһан бурхадтнай гэбэл, эдэ мүн!

²⁹ Нэгэ алтан тугалые тэрэ Бэт-Ээлдэ, нүгөөдыень Даанда табиба.

³⁰ Улад зон мүргэхэеэ Бэт-Ээл болон Даан руу ябажа, нүгэл абажа эхилбэ.

³¹ Еробоһаам хада уулануудаар мүргэлэй газарнуудые байгуулба, Левиин обогой бэшэ санаартадые томилбо.

³² Иудада болодог баяр наадандал адли баярые тэрэ наймадахи һарын арбан табадахи үдэртэ байгуулжа, үргэлэй шэрээ дээрэ үргэл үргэдэг болобо. Бүтээһэн тугалнуудтаа үргэл Бэт-Ээлдэ үргэжэ эхилбэ. Хада уулануудаар байгуулһан мүргэлэй газарнуудаараа тэрэ санаартадые томилбо.

Иудын хан түрын лүндэншэ Бэт-Ээлэй үргэлэй шэрээ тухай

³³ Өөрынгөө дураар тогтооһон наймадахи һарын арбан табанай үдэр тэрэ Бэт-Ээлдэ бүтээһэн үргэлэй шэрээ дээрэ үргэл үргэхэеэ ошобо. Израилиин зондо зорюулһан баяр наада эхилхэеэ тэрэ үргэлэй шэрээдэ дүтэлбэ.