3 Хаан түрэнүүд 11 - Библи

Соломоон хариин бурхадта мүргэнэ

¹ Соломоон хаан фараоной басаганһаа гадна хари оронуудай, Моһаабай, Аммооной, Эдоомой, Сидооной, мүн хээт зоной эхэнэрнүүдтэ дурладаг байгаа.

² Эдэ арадууд тушаа Эзэн Израилиин зондо хандан «Таанар тэдэнтэй, мүн тэдэшье таанартай худа ураг боложо байха ёһогүй. Юуб гэхэдэ, тэдэ таанарай зүрхэ сэдьхэлые өөрын бурхад руу шэглүүлхэ шуу» гэжэ һэргылээ бэлэй. Теэд Соломоон тэдэ арадуудай эхэнэрнүүдтэ дурладаг бэлэй.

³ Хаан долоон зуун һамгатай, тиихэдэ гурбан зуун бага һамгатай байгаа. Тэдэ Бурханай харгы замһаа тэрэниие хадууруулба.

⁴ Соломооной үбгэрхэдэ, һамгадынь тэрэниие хариин бурхадта мүргэдэг болгуулха гэжэ оролдожо эхилбэ. Давид эсэгэдээ адли бэшэ, өөрын Эзэн Бурханда тэрэ бүхы сэдьхэлһээ шүтэхэеэ болибо.

⁵ Иигэжэ Соломоон Сидооной эхэнэр бурхан Аштаартада, Аммооной жэгшүүрилтэ шүтээн Милхоомдо шүтэжэ эхилбэ.

⁶ Эзэнэй урда тэрэ нүгэл үйлэдэжэ, Давид эсэгэдээ адли Эзэндэ үнэн сэхэ бэшэ байба.

⁷ Удаань Соломоон Моһаабай жэгшүүрилтэ шүтээн Хэмоошто ба Аммооной жэгшүүрилтэ шүтээн Моолохто зорюулан, Иерусалимай зүүн зүгтэ байгаа уула дээрэ мүргэлэй обоо байгуулба.

⁸ Өөһэдын бурхадта уталга ууюулан, тахил үргэжэ байһан хари ороной бүхы һамгадтаа тэрэ иимэ мүргэлэй газарнуудые байгуулаа.

^9-10 Хоёр дахин өөртэнь үзэгдэжэ, хариин бурхадта мүргэхыень хориһон Израилиин Эзэн Бурханһаа Соломооной хадууран байхада Эзэн тэрээндэ уурлаба.

¹¹ Эзэн Соломоондо: – Иимэ юумэ үйлэдэжэ, Минии шамда захиһан хэлсээ заабариием сахяагүй байһанайш тула Би шамһаа хаан түрэ заатагүй хуулан абажа, түшэмэлдэш үгэхэб.

¹² Гэбэшье Давид эсэгыншни аша габьяа хараада абан, эдэ бүгэдые шинии амиды байгаа сагта бэелүүлхэгүйб, хүбүүнэйш хааншалха үедэ хэхэб.

¹³ Харин бүхы хан түрэ хуулан абахагүйб, минии богоол Давидай болон шэлэн абаһан Иерусалимайнгаа түлөө Би нэгэ обогые хүбүүндэш үлөөхэб, – гэжэ айладаба.

Соломооной дайсад

¹⁴ Тиигээд Эзэн эдоом хүн, хаан уг удамтай Һадаадые Соломооной дайсан болгобо.

^15-16 Энээнэй урда тээ, Эдоомые Давидай диилээд байха үедэ сэрэгэйнь жанжин Ёһааб байлдаанда унаһан сэрэгшэдые хүдөөлүүлхэеэ ерээ бэлэй. Ёһааб болон сэрэгшэдынь зургаан һарын туршада Эдоомдо байжа, тэндэ байгаа бүхы эрэшүүлые усадхаа һэн.

¹⁷ Тиихэдэ үшөө үхибүүн байһан Һадаад эсэгынгээ эдоом яһанай нэгэ хэды түшэмэлтэй хамта Египет руу тэрьедээ һэн.

¹⁸ Тэдэ Мидианһаа гаража, Параан руу ерээд, хэдэн хүниие дахуулан, Египедэй фараондо ошоо. Фараон тэрээндэ гэр байра, газар үгэбэ, эдеэ хоолоор хангадаг болобо.

¹⁹ Һадаад фараоной һанаанда ехэ таараһан тула фараон тэрээндэ өөрынгөө хатан Тахпэнээзэй дүү басага һамган болгон үгэжэ гэрлүүлбэ.

²⁰ Тахпэнээзэй дүү басаган тэрээндэ Гэнубаат гэжэ хүбүү түрэбэ. Тахпэнээз тэрэ хүбүүе фараоной гэртэ өөрынгөө хүбүүдтэй хамта үдүүлһэн байна.

²¹ Давид болон сэрэгэй жанжин Ёһааб наһа бараа гэжэ дуулахадаа, Һадаад фараондо: – Өөрынгөө газар нютаг руу ошохыем зүбшөөгыт, – гэжэ гуйба.

²² – Минии хажууда байхадаа ши юугээрээ дуталдаад, өөрын нютаг руу бусахые хүсэнэбши? – гэжэ фараон тэрээндэ хэлэбэ ха. – Үгы, дуталдаха юумэн үгы, харин гансал бусахыем зүбшөөгыт даа, – гэжэ тэрэ харюусаба.

²³ Бурхан үшөө нэгэ хүниие – Элиадаагай хүбүүн Рэзооные – Соломооной дайсан болгобо. Тэрэ Рэзоон өөрын эзэнһээ, Цобаагай хаан Һадаад-Ээзэрһээ, тэрьедэһэн байгаа.

²⁴ Һадаад-Ээзэрые Давидай диилэһэнэй удаа Рэзоон дээрмэшэдэй бүлэгэй толгойлогшо болобо. Тэдэ Дамааск руу ошожо, сугларагша зониинь тэрэниие Дамааскын хаан болгобо.

²⁵ Соломооной амиды мэндэ байгаа сагта тэрэ хододоо Израилиин дайсан байгаа. Һадаад болон Рэзоон хододоо Израильда сүйд ушаруулдаг һэн. Тэрэ араамшуудые зонхилон хааншалаа.

Хан түрэ хубаагдаха тухай Ахиин зүгнэл

²⁶ Соломооной түшэмэл Еробоһаам хаанай урдаһаа эсэргүүсэн бодобо. Тэрэ Набаадай хүбүүн, Эпрааимай Цэрэдаагай хүн һэн. Эхэнь бэлбэһэн эхэнэр Цэруяа бэлэй.

²⁷ Юундэ тэрэ хаанай урдаһаа буһалгаалааб гэбэл, ушарынь иимэ: Соломооной ажалшадай Иерусалимай хойто талада хотын хана хэрэмүүдые заһабарилжа байхада,

²⁸ Соломоон Еробоһаамай шанга хүдэлдэгые обёоржо, Мэнашшээ болон Эпрааимай обогуудай газарнуудаар ябуулагдажа байгаа ажал хүдэлмэриие хинахыень томилбо.

²⁹ Нэгэтэ Еробоһаамай Иерусалимһаа гараад ябажа байхада Шилооной Ахияа лүндэншэ шэнэ хубсаһа үмдэнхэй урдаһаань дайралдаба. Хээрэ талада ганса тэдэл байгаа.

³⁰ Гэнтэ Ахияа шэнэ хубсаһаяа абаад, арбан хоёр хуби болгон шуулажархиба.

³¹ Тиигээд тэрэ Еробоһаамда иигэжэ хэлэбэ: – Энээнэй арбан хубиие аба. Юуб гэхэдэ, Израилиин Эзэн Бурхан иигэжэ айладаа: Соломоонһоо хан түрэ хуряан абажа, шамда арбан обог үгэнэм.

³² Харин Минии богоол Давидые болон Израилиин бүхы газар нютагууд сооһоо шэлэн абаһан Иерусалим хотые хараада абан, Соломоондо нэгэл обог үлөөхэб.

³³ Энээниие юундэ хэнэбиб гэхэдэ, Соломоон Намайе орхижо, Сидооной бурхан Аштаартуудта, Моһаабай бурхан Хэмоошто, Аммооной бурхан Милхоомдо шүтэн мүргэжэ эхилээ. Соломоон Минии хойноһоо ябаагүй, Намда таатай зүб юумэ хээгүй, Давид эсэгэдээл адли байгаагүй, хуули ёһонуудыем, тогтоол заабаринуудыем сахибагүй.

³⁴ Гэбэшье Соломоонһоо бүхы хаан түрые хуряан абахагүйб, Минии һургаалнуудые, хуули ёһонуудые сахидаг байһан Давидай, Минии шэлэн абагша богоолой, аша габьяагай түлөө Соломоониие амиды мэндэ сагтань хаан зандань байлгахаб.

³⁵ Харин тэрэнэй хүбүүнһээ хаан түрые абажа, арбан обогыень шамда үгэхэб.

³⁶ Хүбүүндэнь нэгэ обог үлөөхэб. Тиихэдэм Намда мүргэдэг байхын тула Минии шэлэн абаһан Иерусалимда Давид богоолойм үри һадаһан хододоо хааншалан байха.

³⁷ Шамайе Израилиин хаанаар Би шэлэнэб. Хүсэһэн арадаа ши зонхилон байхаш.

³⁸ Минии захин заабарилһан бүхы юумэ сахижа, Минии хойноһоо дахан ябажа, Давид богоолдом адляар Намда таатай хэрэг үйлэдэн, хуули ёһонуудыем, һургаалнуудыем сахин байгаа һааш, Би шамтай байхаб, Давидай түлөө хэһэндэл адляар Израилиин хаан түрэ шамда, үринэртэш хододоо үгэн байхаб.

³⁹ Давидай үринэртэ зэмэ амасуулан хэһээхэб, гэбэшье хододоо хэһээжэ байха бэшэб.

⁴⁰ Соломоон Еробоһаамые алаха гэжэ бэдэрбэ, теэд Еробоһаам Египедэй хаан Шишаак руу зугадан тэрьелжэ, Соломооной наһа баратар Египедтэ ажаһуугаа бэлэй.

Соломооной наһа баралга

⁴¹ Соломооной хэһэн бусад хэрэгүүд, ажаябуулгань ба сэсэн мэргэн ухааниинь тэрэнэй үйлэ хэрэгүүд тушаа ном соо бэшээтэй юм.

⁴² Бүхы Израилиие зонхилжо, дүшэн жэлэй туршада Соломоон Иерусалим соо хааншалаа.

⁴³ Тэрэ наһа баража, Давид эсэгынгээ хотодо элинсэгүүдтэйгээ хамта хүдөөлүүлэгдэбэ. Удаань тэрэнэй орондо хан шэрээдэ Рэхобаам хүбүүниинь залараа бэлэй.