3 Хаан түрэнүүд 10 - Библи

¹ Шэбаагай хатан Соломоон хаанай алдар соло тушаа дуулаад, таабаринууд мэтэ хүндэ асуудалнуудые тэрээндэ табижа туршахаяа һэдэбэ.

² Тиигээд тэрэ Иерусалим руу ехэ баялиг асарба: арюун хангалтай гүгэл уталгануудые, алта мүнгэ, эрдэни шулуунуудые дүүрэн ашаһан тэмээн хамбытай хүрэжэ ерэбэ. Соломоондо орожо, һанаһан тухайгаа асуужа, тэрээнтэй хөөрэлдэбэ ха.

³ Соломоон бүхы асуудалнуудтань харюу үгэбэ. Хаанай мэдэхэгүй юумэн үгы байба.

⁴ Шэбаагай хатан Соломооной сэсэн мэргэн байһые, бариһан ордонгыень,

⁵ шэрээ дээрэ дэлгэһэн эдеэ хоолыень, түшэмэлнүүдэйнь гэр байра, бэеынь уян шаламгайе, хубсаһа хунарыень, үзэмэй дараһан архи аягалагшадые, Эзэнэй Һүмэ соо үргэһэн түгэс шатаалта үргэлыень хаража, тэсэжэ ядан,

⁶ хаанда иигэжэ хэлэбэ: – Өөрынгөө газар дайдада байхадаа танай хэрэгүүд, сэсэн мэргэн ухаан тушаа дуулаһан байнаб.

⁷ Гэбэшье өөрөө ерэжэ, өөрынгөө нюдөөр хараадүйдөө тэрэ үгэнүүдтэ этигэдэггүй байгааб. Мүнөө хаража байхадаа, хахадыньшье дуулаагүй байгааб гэжэ һананаб, юуб гэхэдэ, сэсэн мэргэн ухаантнай, баялигтнай минии дуулаһанһаа үлүү ехэ байнал.

⁸ Зонтнай хэды жаргалтайб! Хажуудатнай байжа, сэсэн мэргэн үгүүлэлытнай шагнаха аргатай богоолнуудтнай хэды жаргалтайб!

⁹ Энэрэл хайраа үзүүлэн, хаан шэрээдэ таниие заларуулагша Эзэн Бурхантнай үреэл магтаалда хүртэг лэ! Израильда хэтэ мүнхэдөө дуратай байһандаа таниие үнэн шударга байхынтнай тула, үнэн зүбые үйлэдэхынтнай тула Эзэн таниие хаанаар томилоол!

¹⁰ Тиигээд тэрэ хаанда асарһан бэлэгүүдээ барюулба: зуун хорин талаант шэжэр алта, үнэтэ эрдэни шулуунуудые, үнэтэ хангалтай гүгэлнүүдые. Соломоон хаанда Шэбаагай хатанай бэлэглэһэнһээ үлүү иимэ ехэ гүгэл бэшэ хэзээдэшье асаржа байгаагүй юм.

¹¹ Опиирһоо алта асардаг далайн онгосо Опиирһоо энэ удаа барилгын үнэтэ модо, эрдэни шулуунуудые асарба.

¹² Тэрэ асарһан үнэтэ зандан модоор хаан Эзэнэй Һүмын болон хаанай ордоной гэшхүүрнүүдые шэмэглүүлбэ. Мүн лэ хүгжэмшэдтэ ятага болон лимбэнүүдые тэрэ урлуулба. Нэгэн доро барилгын иимэ ехэ үнэтэй модон урдань хэзээдэшье асарагдаагүй, мүнөөшье болотор асарагдаагүй юм.

¹³ Шэбаагай хатанай эриһэн, хүсэһэн бүхы юумыень, дээрэһээнь өөрын үгэхэ гэжэ һанаһан зүйлнүүдые нэмэжэ, Соломоон хаан бардам гараараа элбэг дэлбэг бэлэг барюулба. Тиигээд Шэбаагай хатан албатанаараа өөрын орон нютаг руу бусаба.

Соломооной баялиг

¹⁴ Соломоон хаан жэл бүри зургаан зуун жаран зургаан талаант алта олзолдог һэн.

¹⁵ Энээнһээ гадна аралжаа наймаа эрхилэгшэдһээ, Аравиин хаашуулай, Израилиин можо нютагуудай ноёдһоо алта мүнгэн хаанай һан руу орожол байгша һэн.

¹⁶ Соломоон хаан шэжэр алтаар хоёр зуун мантан бамбай бүтээлгэбэ. Бамбай бүхэндэ зургаан зуун шээкэлэй алтан гаргашалагдаа.

¹⁷ Хаан алтаар гурбан зуун багашаг бамбай бүтээлгэбэ. Бамбай бүхэндэ гурбан миина алтан гаргашалагдаа һэн. Хаан тэдэ бамбайнуудые Ливаанай үнэтэ модоор шэмэглэгдэһэн таһалга соо табиба.

¹⁸ Тэрэ заанай һоёогоор мантан хан шэрээ бүтээлгэбэ. Тиигээд тэрэ шэрээе шэжэр алтаар шэмэглүүлбэ.

^19-20 Хан шэрээ руу ошоһон зургаан гэшхүүр, шэрээгэй хоёр талаар гар табиха табсангууд, хажуугаарнь зогсоһон хоёр арсалан, тиихэдэ тэрэ зургаан гэшхүүр дээрэ арбан хоёр арсалангай дүрсэнүүд хоёр талаарнь дархалуулагдаба, шэрээгэй ара таладань бухын дүрсэ байба. Иимэ үзэсхэлэнтэ зүйлые ямаршье хан түрэдэ урдань урлаагүй бэлэй.

²¹ Соломоон хаанай бүхы аяганууд алтан, Ливаанай үнэтэ модоор шэмэглэгдээтэй таһалгада бүхы амһартанууд алтан һэн. Мүнгэн Соломооной үе сагта үнэтэйдэ тоологдодоггүй бэлэй. Тиимэһээ мүнгөөр бүтээгдэһэн юуншье тэрээндэ байгаагүй.

²² Хаанай далайн онгосонууд Хираам хаанай онгосонуудтай хамта Таршииш хүрэтэр тамардаг, гурбан жэлдээ нэгэ удаа алта, мүнгэ, заанай һоёо, һармагшан, тугас шубуудые асардаг бэлэй.

²³ Соломоон хаан дэлхэйн бүхы хаашуулһаа үлүү баялигаараа, сэсэн мэргэн ухаагаараа шалгараа һэн.

²⁴ Тиимэһээ дэлхэйн хамаг зон Соломоонтой уулзаха, Эзэн Бурханай заяаһан сэсэн мэргэн ухааень шагнаха гэжэ эрмэлзэдэг байгаа.

²⁵ Жэлһээ жэлдэ хаанда ерэһэн хүн бүхэн бэлэг асардаг һэн: алта, мүнгэн амһартануудые, хубсаһа хунар, дайнай зэбсэгүүдые, үнэтэ гүгэлнүүдые, хурдан моридые, лууснуудые бэлэг болгон баридаг байгаа.

²⁶ Тиигэжэ Соломоон хаанда нэгэ мянга дүрбэн зуун дайшалхы тэргэ, арбан хоёр мянган морин сэрэг сугларба. Тэдэнээ тэрэ дайшалхы тэргын байрладаг хотонуудаар, мүн өөрын Иерусалим хото соо байрлуулаа.

²⁷ Соломоон хаанай зонхилхо сагта Иерусалимда мүнгэн түмэр юрын шулуундал адли тоологдодог, харин Ливаанай үнэтэ хуша модод набтар газараар ургадаг һөөг бургааһандал адли үдхэн ургадаг бэлэй.

²⁸ Соломоон хаанай наймаашадынь хаандаа моридые Египедһээ, Күээһээ худалдан абадаг һэн.

²⁹ Тэдэ наймаашад Египедһээ дайшалхы тэргэ зургаан зуун шээкэл, мори зуун табин шээкэл мүнгөөр худалдан абадаг һэн. Дараань тэдэ наймаашад араамшуудай болон хээдүүдэй хаашуулда тэдэниие асардаг бэлэй.