2 Хаан түрэнүүд 9 - Библи

Давид Мэпибоошэт хоёр

¹ Нэгэтэ Давид иигэжэ хэлэбэ: – Саулай гэр бүлэһөө амиды мэндэ үлэһэн хүн үгы гээшэ гү? Ёнатаанай түлөө би тэрээндэ энэрэл хайра үзүүлхэ һэм.

² Саулай гэртэ Цибаа гэжэ нэрэтэй зараса байдаг байгаа. Тэрэ Давидта дуудагдаба. Хаанай тэрээнһээ: – Ши Цибаа гүш? – гэжэ асуухадань, тэрэ: – Танай богоол би мүн, – гэбэ.

³ Хаан тэрээнһээ асууба: – Саулай гэр бүлэһөө хэн нэгэн үлөөгүй гээшэ гү? Бурханда хэлэһэнэй ёһоор, би тэрээндэ энэрэл хайра үзүүлхэ һэм. Цибаа хаанда харюусаба: – Ёнатаанай хүл муутай хүбүүн бии.

⁴ Хаан тэрээнһээ асууба: – Тэрэ хаана байнаб? – Аммиһээл гэгшын хүбүүн Махиирай гэртэ, Лодэбаарта, – гэжэ Цибаа харюу үгөө һэн.

⁵ Тиигээд Давид хаан хүниие эльгээн, Лодэбаарһаа, Аммиһээл гэгшын хүбүүн Махиирай гэрһээ тэрэниие асаруулба.

⁶ Саулай аша, Ёнатаанай хүбүүн Мэпибоошэт Давидта ерэжэ, газарта унан мүргэбэ. Давид тэрээндэ хандаба: – Мэпибоошэт! – Танай богоол би эндэ байнаб, – гэбэ тэрэ.

⁷ – Бү ай. Би шинии эсэгэ Ёнатаанай түлөө шамда энэрэл хайра заабол үзүүлхэб, хүгшэн абыншни Саулай бүхы газарые шамда бусаахаб. Ши минии шэрээдэ һуужа, намтай хамта хододоо эдеэ хоол баридаг байхаш, – гэжэ Давид тэрээндэ хэлэбэ.

⁸ Мэпибоошэт дахин мүргэбэ: – Богоолтнай үхэһэн нохойһоо дээрэ бэшэл. Хэн аад, би танай хайрада хүртэнэ гээшэбиб?!

⁹ Тиигээд Саулай зараса Цибаае хаан дуудажа, иигэжэ хэлэбэ: – Саулай болон тэрэнэй гэр бүлын бүхы юумые би шинии эзэнэй аша хүбүүндэ үгэнэб.

¹⁰ Эзэнэйшни аша хүбүүнэй хоол хүнэһэтэй байхын тула ши, хүбүүдшни, богоолнуудтнай газарынь элдүүрилжэ, үрэ жэмэсыень асаран үгэжэ байгты. Тэрээнһээ гадна эзэнэйшни аша хүбүүн Мэпибоошэт минии шэрээдэ һуужа, намтай хамта эдеэ хоол бариха эрхэдэ хүртэхэ. Цибаа арбан табан хүбүүтэй, хорин богоолтой бэлэй.

¹¹ Тэрэ хаанда харюусаба: – Эзэн хаанайнгаа намда, богоолдоо, захирһан бүхы юумые би дүүргэхэб. Иигэжэ Мэпибоошэт хаанай хүбүүдэй нэгэн мэтэ Давидтай хамта гэртэнь эдеэ хоол баридаг болобо.

¹² Тэрэ Михаа гэжэ нэрэтэй бишыхан хүбүүтэй һэн. Цибаагай гэр бүлын гэшүүд бултадаа Мэпибоошэдой зарасанар болобо.

¹³ Мэпибоошэдой хоёр хүлынь муу, дохолдог, тэрэ Иерусалимда ажаһуудаг, хододоо хаанай шэрээдэ һуужа, эдеэ хоол баридаг байгаа.