2 Хаан түрэнүүд 8 - Библи

¹ Тэрэнэй удаа Давид пилиштүүдые илажа, номгоруулба. Тэрэ Мэтээг-Һаһаммаа хотые тэдээнһээ буляан абаба.

² Давид моһаабуудые бута сохибо. Тэрэ тэдэниие газар дээрэ хэбтүүлээд, аргамжаар хэмжэбэ. Гурбанайнь хоёр хубиие алаба, нэгэ хубииень амиды үлөөбэ. Моһаабшууд Давидай засаг мэдэржэ, ясаг түлэдэг болобо.

³ Цобаагай хаан, Һадаад-Ээзэрэй хүбүүн Рэһооб Евфрат мүрэнэй нюруугаар өөрынгөө засаг түрые батадхаяа ошожо ябаа. Давид тэрэниие бута сохибо.

⁴ Давид нэгэ мянга долоон зуун морин сэрэг, хорин мянган ябаган сэрэг олзолон абаба. Тэргын моридойнь шүрбэһые тэрэ отолбо, харин зуун тэргэдэ хүрэхөөр моридые мэндэ үлөөгөө һэн.

⁵ Цобаагай хаан Һадаад-Ээзэртэ туһалхаяа Дамааскын араамшуудай ерэхэдэнь, Давид хорин хоёр мянгыень алаба.

⁶ Тиигээд Дамааскын араамшуудые зонхилхо өөрын сэрэг ноёдые дээрэнь табиба, араамшууд богоолынь боложо, ясаг түлэдэг болоо һэн. Давидай ябаһан газар бүхэндэнь Эзэн туһалжа байгаа.

⁷ Һадаад-Ээзэрэй зоной алтан номо һаадагуудые Давид буляан абажа, Иерусалим руу асарба.

⁸ Һадаад-Ээзэрэй хотонууд болохо Бээтах болон Бэротайһаа Давид хаан угаа ехэ гуулин түмэр мүн лэ дээрмэдэн абаа һэн.

⁹ Һадаад-Ээзэрэй хамаг сэрэгые Давидай бута сохиһон тухай Хамаадай хаан Той гэгшэ дуулаад,

¹⁰ тэрэниие мэндэшэлхын, һайе хүргэхын тула Ёраам хүбүүгээ эльгээбэ. Ушарынь хадаа Һадаад-Ээзэр Тойтой ходо дайлалдажа байгаа бшуу. Ёраам ерэхэдээ, алтан, мүнгэн, гуулин эд зүйлнүүдые асарба.

¹¹ Давид хаан диилэгшэ бүхы уласуудһаа абаһан алта, мүнгэнтэй хамта тэрээнииеньшье Эзэндэ зорюулба.

¹² Тэдэ ямар уласуудһааб бэ гэхэдэ, эдоом, моһааб, аммоон, пилишт, амалээг, мүн Цобаагай хаан Рэһообой Һадаад-Ээзэр хүбүүнһээ олзолон абаһан зөөри болоно.

¹³ Давид Дабһата хүндыдэ арбан найман мянган эдоомшуудые хюдажа, тэрэ байлдаанһаа бусахадаа, угаа ехэ нэрэтэй түрэтэй болобо.

¹⁴ Тэрэ Эдоомдо өөрын сэрэг ноёдые һуурижуулба. Бүхы Эдоомоор тэдэ байрлажа, эдоомшууд бултадаа Давидай богоолнууд болобо. Давидай ябаһан газар бүхэндэнь Эзэн туһалан байгаа.

Давидые хүрээлэгшэд

¹⁵ Иигэжэ Давид бүхы Израилиин хаан түрэ барижа, арад түмэнөө зүб шударгыгаар зонхилжо байгаа.

¹⁶ Цэруяа эхэтэй Ёһааб сэрэгэй дарга, Ахилүүдэй хүбүүн Ёшапаат түүхэ бэшээшэ,

¹⁷ Ахитуубай хүбүүн Цадоок болон Абиатаарай хүбүүн Ахимээлэх санаартад, Сэраяа бэшээшэ,

¹⁸ Ёядаагай хүбүүн Бэнайяа Давидай бэе аршалагшадай ноён һэн, тэрэ хэрээдүүдые ба пэлидүүдые захирдаг һэн. Давидай хүбүүд санаартан байгаа.