2 Хаан түрэнүүд 7 - Библи

Давид Бурханда һүмэ бодхоохые түсэблэнэ

^1-2 Давид өөрынгөө ордондо ажаһуужа, Эзэн тойроод байһан дайсадһаань аршалжа, амгалан байдал үршөөгөө бэлэй. Давид лүндэншэ Натаанда иигэжэ хэлэбэ: – Эзэнэй хэлсээнэй ханзын майхан соо табяатай байхада, би хуша модоор бариһан ордондо ажаһуунаб.

³ Натаан хаанда харюусаба: – Һанаһан юумэеэ бултыень үйлэдэгты, юуб гэхэдэ, Эзэн тантай хамта байна.

⁴ Тэрэл һүниндөө Эзэнэй үгэ Натаанда иигэжэ дуулдаба:

⁵ – Ябажа, минии зараса Давидта иимэ юумэ хэлэ. Эзэн иигэжэ айладхажа байна: «Минии оршохо үргөө барижа үгэхэ хүниинь ши мүн юм гүш?

⁶ Израилиин арад зониие Египедһээ гаргаһан сагһаа хойшо энэ болотор Би үргөө соо байгаагүйб, майхан соол оршон, нэгэ газарһаа нүгөө газар хүрэтэр ябадаг байгааб.

⁷ Израилиин арад зонтой хаанашье ябаа хадаа Өөрынгөө арадай удамаршадта „намда Ливаанай үнэтэ сэнтэ хуша модоор үргөө баригты“» – гэжэ нэгэшье дахин айладаагүйб.

⁸ Тиимэһээ мүнөө ши Минии богоол Давидта иигэжэ хэлэ: – Түмэн Сэрэгтэ Эзэн иигэжэ айладхажа байна. Өөрынгөө арад түмэн Израилиин захирагша болгохын тула Би шамайе бэлшээриһээ, хонин һүрэг харууһалжа байхадаш абаа һэм.

⁹ Хаанашье ябахадаш Би шамтай байжа, хамаг дайсадыешни шинии хажууһаа усадхааб. Мүнөө дэлхэйн агууехэ зондол адли шамайе агууехэ болгон, нэрыешни алдаршуулхам.

¹⁰ Би Израилиин арадые ажаһууха газартай болгохоб, тэрэнэй байдал батадхахаб, өөһэдынгөө газар дээрэ амгалан ажаһууха, тэдэнэр хэзээдэшье һамаргаанда орохоёо болихо. Энээнһээ хойшо тэрэниие хашаашад дахин харшалхагүй.

¹¹ Өөрынгөө арад түмэн Израилиие хүтэлхыень удамаршадые табиһан сагһаа эхилжэ, Би бүхы дайсадһааш шамайе амаруулхаб, гэр бүлыеш батажуулхаб гэжэ Эзэн шамда дуулгана.

¹² Шинии наһа баража, үбгэ эсэгэнэртэеэ хамта мүнхэ нойроор нойрсоходош, Би шинии нэгэ хүбүүе хаан шэрээдэ һуулгажа, хаан түрыень бата болгохоб.

¹³ Тэрэ Намда ордон бодхоохо, Би тэрэнэй уг удамда хаан шэрээ хэтэ мүнхэдөө эзэлүүлхэб.

¹⁴ Би тэрэнэй эсэгэ боложо, тэрэ Минии хүбүүн болохо. Тэрэнэй гэм зэмэ хэбэл, мүшэрөөр эсэгын хүбүүгээ хэһээдэгтэл хэһээхэб.

¹⁵ Гэбэшье Минии үршөөл хайра тэрээнтэй байха. Саулһаа буруу хаража, шамда энэрэл үзүүлһэндэл тэрээнһээ буруу хаража байхагүйб.

¹⁶ Ши хододоо үри һадаһадтай байхаш, хаан түрэшни хэтэ мүнхэдөө оршохо. Хаан шэрээдэ һууха уг удамшни хэзээдэшье таһалдахагүй!

¹⁷ Натаан эдэ бүхы үгэнүүдые болон үзэгдэлые дууһан Давидта хөөрэжэ үгэбэ.

Давид Бурханда мүргэнэ

¹⁸ Давид хаан ошожо, Эзэнэй урда һуун, иигэжэ зальбарба: – Эзэн Бурхамни! Би хэн аад, баһа минии гэр бүлэ юун аад, Та намайе иитэрээ үргөө гээшэбта?

¹⁹ Энэшье Танда бага шэнгеэр һанагдаал, Эзэн Бурхамни! Өөрынгөө богоолой уг удамай ерээдүй тушаа үшөө айладхаат. Хүниие иигэжэ хүтэлнэлта, Эзэн Бурхамни!

²⁰ Би, Давид, Танда энээнһээ үлүү үшөө юу хэлэхэбиб даа? Та Өөрынгөө богоолые мэдэнэ ха юмта, Эзэн Бурхамни!

²¹ Айладаһанаа батадхажа, Өөрынгөө һанаагаар эдэ бүгэдые хэбэт. Богоолтнай болохо намда эдэ бүхы агууехэ хэрэгүүдээ Та мэдүүлбэт.

²² Эзэн Бурхамнай, Та болбол агууехэт! Тандал адли хэншье байхагүй. Бидэнэй шагнажа мэдэһээр, Танһаа бэшэ ондоо Бурхан байхагүй!

²³ Танай арад түмэн Израильдал адли үшөө ямар үндэһэтэн газар дээрэ байнаб? Та, Бурхан, Израилиие абаржа, Өөрын арад түмэн болгоод, Өөрынгөө нэрэ алдаршуулаа бэлэйт. Египедһээ гаргажа, ондоо арадуудһаа болон тэдэнэй бурхадһаа сүлөөлэн, арад түмэнэйнгөө түлөө Та агууехэ, һүрдэмөөр үйлэ хэрэгүүдые хээ бэлэйт.

²⁴ Израилиин арад зониие хэтэ мүнхэдөө Өөрын арад түмэн болгобот. Эзэн, Та тэдэнэй Бурхан болобот.

²⁵ Нам тухай болон минии уг удам тухай айладаһан үгэнүүдээ мүнөө хэтэдээ бэелүүлыт, Эзэн Бурхан! Үгүүлһэнээ баталыт!

²⁶ Нэрэтнай хэтэ мүнхэдөө агууехэ боложо, «Түмэн Сэрэгтэ Эзэн болбол Израилиин Бурхан» гэжэ хэлэгдэхэнь болтогой! Минии, Давидай, уг удамһаа Танай энэрэл хайра бү һалаг лэ!

²⁷ Түмэн Сэрэгтэ Эзэн, Израилиин Бурхан! Юундэ Танда иимэ зальбаралтай хандахаяа зүрхэлөөбиб гэхэдэ, Та эдэ бүгэдые намда, Өөрынгөө богоолдо, мэдүүлээт, уг удамыемни хаан шэрээдэ хододоо байха гээд айладхаа бэлэйт.

²⁸ Эзэн Бурхамни, Та болбол Бурхан. Найдуулһан юумэеэ хододоо бэелүүлдэгта, иимэ һайн юумэ намда, богоолдоо, дуулгабат.

²⁹ Танай богоол болохо минии уг удамые юрөөгыт, Танай үршөөл хайра тэрээнтэй хэтэ мүнхэдөө байг лэ! Эзэн Бурхан, Та Өөрөө энээн тухай айладхаа бэлэйлта, Танай юрөөлөөр минии, Танай богоолой, уг удам хэтэ мүнхэдөө юрөөлтэй байхань болтогой!