2 Хаан түрэнүүд 6 - Библи

¹ Давид Израилиин эрхим эрэшүүлые дахин суглуулба. Тэдэ гуша мянган суглараа.

² Давид зэһэжэ, херүүбүүд дээрэ заларагша Түмэн Сэрэгтэ Эзэнэй нэрээр нэрлэгдэһэн Бурханай ханзые асархаяа тэдэ зонтоёо хамта Иудын Баһалаа руу ябаба.

³ Добо дээрэ байһан Абинадаабай гэрһээ абаашахын тула тэдэ Бурханай ханзые шэнэ тэргэ дээрэ табиба. Абинадаабай хүбүүд Уззаа, Ахиһоо гэгшэд Бурханай ханзатай тэрэ тэргэ хүтэлбэ,

⁴ тиихэдэ Ахиһоо ханзын урдуурнь алхалан ябаа бэлэй.

⁵ Давид болон бүхы израильшууд Эзэнэй урда хүхилдэн, бүхы шадалаараа дуу дуулажа, ятаг, лира, хэнгэрэг, тобшуур, сан дуугарган наадажа ябаа.

⁶ Тэдэнэй Нахооной обииндо хүрэжэ ерэхэдэ, үхэрнүүдынь торожо, Бурханай ханзые хэлтылгэбэ. Уззаа тэрэ ханзада хүрэн, шүүрэн бариба.

⁷ Эзэн тэрэ дары Уззаада уур хилэн боложо, Бурханһаа түбэгшөөхэгүй ябадалайнь түлөө тэндэнь һалгаажа, тэрэ Бурханай ханзын дэргэдэ гээгдэбэ.

⁸ Эзэнэй Уззаае һалгааһанда Давид шаналаа бэлэй, тиигээд энэ газарые Пээрэц-Уззаа гэжэ нэрлэбэ. Мүнөө болотор тэрэ иигэжэ нэрлэгдэдэг.

⁹ Тэрэ үдэр Давид Эзэнһээ айн, иигэжэ хэлээ һэн: – Эзэнэй ханзые яагаад өөртөө абаашахабиб даа?

¹⁰ Тиигээд тэрэ Эзэнэй ханзые өөрын хото руу абаашахаяа зүрхэсөөд, Гаат хотын ажаһуугша Обээд-Эдоомой гэртэ тэрэниие шэглүүлбэ.

¹¹ Иигэжэ Эзэнэй ханза Гаат хотын хүн Обээд-Эдоомой гэртэ гурбан һара байба. Эзэн Обээд-Эдоомые ба бүхы гэр бүлыень юрөөбэ ха.

¹² Давид хаанда зон иигэжэ дуулгаба: – Бурханай ханзаһаа боложо, Эзэн Обээд-Эдоомой гэр бүлые болон хамаг юумыень юрөөгөө. Давид ошожо, Бурханай ханзые Обээд-Эдоомой гэрһээ Иерусалим руу баяртай абан ерэбэ.

¹³ Эзэнэй ханзые үргэн ябаһан зоной зургаан алхам алхаха бүхэндэнь Давид үхэр болон тарган тугалаар үргэл үргэн байба.

¹⁴ Давид маалинга эфод үмдэнхэй, Эзэниие магтан бүхы шадалаараа бүжэглэбэ.

¹⁵ Иигэжэ Давид болон бүхы израильшууд шаг шууяа татан, эбэр бүреэ дуугарган, Эзэнэй ханзые тэлэн ябаба.

¹⁶ Эзэнэй ханзые Давидай хотодо оруулха үедэ Саулай басаган Михаал сонходо байгаад, Эзэнэй урда хатаран, баясан ябаһан Давидые харажархиба, тиигээд тэрэниие шоо үзэбэ.

¹⁷ Иигэжэ тэдэ Эзэнэй ханзые асаржа, Давидай зорюута тэрээндэ гэжэ бодхооһон майханай дунда, байрадань залаба. Давид Эзэндэ түгэс шатаалта болон амгалан тайбан байдалай үргэлнүүдые үргэбэ.

¹⁸ Тэрэ түгэс шатаалта ба амгалан байдалай үргэлнүүдые үргэжэ дүүргээд, Түмэн Сэрэгтэ Эзэнэй нэрээр арад зониие юрөөбэ.

¹⁹ Тиигээд тэрэ бүхы израильшуудта, эрэшүүл болон эхэнэрнүүдтэ нэгэ-нэгэ зүһэм хилээмэ, хатааһан финикиин лепёошхо, үзэмэй лепёошхо үгэбэ. Удаань хамаг зон гэр гэртээ хариба ха.

²⁰ Давидай гэр бүлэеэ юрөөхэеэ ерэхэдэнь, Саулай басаган Михаал тэрэниие угтан гаража, иигэжэ хэлэбэ: – Израилиин хаан мүнөөдэр ямар ехээр шалгарба гээшэб! Тэнэг хүнэй эшэхэгүй нюсэгэлдэгтэл, тэрэ мүнөөдэр зарасанарайнгаа, шэбэгшэнэрэйнгээ хараһаар байтар нюсэгэлөө.

²¹ Давид Михаалда харюусаба: – Би Эзэниие магтан баярлаһан зандаал байхаб! Шинии эсэгэһээ болон тэрэнэй бүхы түрэл гаралһаа дээгүүр намайе һунган шэлэжэ, Эзэн Өөрынь арад түмэн болохо Израилиин удамаршан болгон намайе томилоо. Эзэндэ магтаал түүрээн, бүжэглэжэл байхаб!

²² Би энээнһээшье ехээр доройтохоб. Харин шинии хэлэһэн тэдэ шэбэгшэнэр намайе үндэрөөр сэгнэхэл!

²³ Саулай басаган Михаал наһа баратараа иигэжэ үри хүүгэдгүй байгаа бэлэй.