2 Хаан түрэнүүд 5 - Библи

Давид Израилиин болон Иудын хаан болобо

¹ Удаань Израилиин бүхы обогууд Хэброон руу, Давидта ерээд хэлэбэ: – Бидэ танай мяха шуһанай таһардаһан бэлэйлди.

² Урид Саулай манай хааншье байха үедэ та Израилиин арад зониие байлдаануудта ударидажа, сэрэг хододоо илалта туйлаад бусадаг байгаа. Тиигээд Өөрынь арад түмэн болохо Израилиие танай ударидаха, удамаршан болохо тухай Эзэн танда найдуулан айладхаһан бэлэйл.

³ Иигэжэ Израилиин бүхы аха захатан Хэброон руу хаанда ерэжэ, Давид хаан тэндэ Эзэнэй урда тэдэнтэй хэлсээ баталба. Тиигээд тэдэ Давидые Израилиин хаан болгон, тоһо түрхин ёһолбо.

⁴ Давид гуша наһатайдаа хаан боложо, дүшэн жэл соо хаан түрые зонхилбо.

⁵ Тэрэ Хэброондо Иудые долоон жэл, зургаан һара, Иерусалимда бүхы Израиль болон Иудые гушан гурбан жэлэй туршада захиран зонхилон байгаа юм.

Давид Иерусалимые эзэлнэ

⁶ Хаан өөрынгөө зонтой хамта Иерусалим руу, евүүсүүдэй урдаһаа добтолхоёо гараба. Тэрэ нютагай уул зон болохо евүүсүүд Давидта иигэжэ хэлэбэ: – Ши иишээ орожо шадахагүйш. Һохор, дохолоншье зон шамайе үлдэжэ гаргахал. Тэдэ Давидые хото руу нэбтэрэн орожо шадахагүй гэжэ һанажа байгаа.

⁷ Гэбэшье Давид Сионой хэрэм эзэлэн абаба. Энэнь Давидай хото болобо.

⁸ Тэрэ үдэр Давид иигэжэ хэлэбэ: – Евүүсүүдтэй тулалдагша хүн бүхэн тэдэнэй хоолойе отолог! Һохор болон дохолон хүнүүдые би үзэн яданаб! Тиимэһээл «һохор, дохолон зон Эзэнэй үргөө руу орохо ёһогүй» гэлсэдэг юм.

⁹ Иигэжэ Давид тэрэ хэрэмдэ байрлажа, тэрэнь Давидай хото гэжэ нэрлэгдээ бэлэй. Бүхы хотые, Миллоһоо эхилээд саашань, шэнэ хэрэм ханаар хүреэлбэ.

¹⁰ Түмэн Сэрэгтэ Эзэн Бурханай өөртэйнь хамта байһан ушарһаа Давид улам хүсэтэй боложол байгаа.

¹¹ Тиирэй хаан Хираам Давид руу элшэнэрые эльгээбэ. Тэдэ Ливаанай үнэтэ сэнтэй хуша модо асарба. Модошо ба шулууша дархашуул мүн лэ ерэбэ. Тэдэ Давидта ордон барижа үгэбэ.

¹² Эзэнэй өөрыень Израилиин хаан болгожо баталһые, Өөрынь арад түмэн болохо Израилиин түлөө хаан түрыень үргэлсэһые Давид ойлгобо.

¹³ Хэброонһоо ерэһэнэйнгээ удаа Давид Иерусалимда үшөө бага һамгадые, мүн һамгадые өөртөө абаба. Тэрэ үшөө хүбүүд, басагадтай болобо.

¹⁴ Иерусалимда түрэһэн тэрэнэй үхи хүүгэдэй нэрэнүүд гэбэл: Шаммууһа, Шобааб, Натаан, Соломоон,

¹⁵ Ибһаар, Элишууа, Нээпэг, Япииһа,

¹⁶ Элишамаа, Элиадаа, Элипээлэт гэгшэд болоно.

Пилиштүүд илагдаба

¹⁷ Давидые Израилиин хаан болгожо, тоһо түрхин ёһолһон тухай дуулахадаа, бүхы пилиштүүд зэһэн гаража, Давидые алахаяа бэдэрбэ ха. Давид энээниие дуулажа, хэрэм руу доошоо бууба.

¹⁸ Пилиштүүд ерэжэ, Рэпаиимэй хүндыдэ таран тогтобо.

¹⁹ Давид Эзэнһээ асууба: – Пилиштүүдэй урдаһаа гарахам гү? Тэдэниие диилэхэдэм туһалха гүт? Эзэн Давидта айладхаба: – Гара! Пилиштүүдые диилэхэдэтнай Би заабол таанадта туһалхаб.

²⁰ Тиигээд Давид Бааһал-Пэрациим руу ерэжэ, тэндэ пилиштүүдые хюдаба. Тэрэ иигэжэ хэлэбэ: – Эзэн минии урда дайсадыемни үерэй уһан мэтэ сүмэ сохёо. Тиимэһээ тэрэ газар Бааһал-Пэрациим гэжэ нэрлэгдээ бэлэй.

²¹ Пилиштүүд тэрьедэхэдээ, тэндэ бурхадайнгаа дүрсэнүүдые хаяа бэлэй. Давид зонтоёо тэдэнииень оложо абаа һэн.

²² Пилиштүүд дахин ерэжэ, Рэпаиимэй хүндыгөөр таран зогсобо.

²³ Давидай Эзэнһээ асуухада, Эзэн айладаба: – Урдаһаань шэглэн бү гара. Тэдэнэй араар тойрожо, лиирэ модоной түглын талаһаа тэдээндэ добтоло.

²⁴ Лиирэ мододой орой дээгүүр алхалжа байһанай абяа дуулахадаа, таанад добтологты. Юуб гэхэдэ, Би пилиштүүдые хюдахаяа одоо тиихэдэ танай урда гараад ябана гээшэб.

²⁵ Давид Эзэнэй захирһанай ёһоор бүхы юумэ бүтээжэ, Гээбэһээ Гээзэр хүрэтэр пилиштүүдые хюдаа һэн.