2 Хаан түрэнүүд 19 - Библи

Ёһааб Давидые зэмэлнэ

¹ Хаанай Абшалоомой хойноһоо уйлан гашуудажа байһан тушаа Ёһааб дуулаба.

² Тиигээд тэрэ үдэр илалтань бүхы сэрэгшэдтэ гай гашуудал болон хубилба. Ушар юуб гэхэдэ, хүбүүн тухайгаа хаанай сэдьхэлээ үбдэжэ байһые зон дуулаһан, хэлсэһэн байгаа.

³ Дайнһаа зугадажа, нэрээ гутааһан зоной нюусаар бусажа ерэдэгтэл, тэрэ үдэр сэрэг хото руу һэмээхэн, нюусаар орожо ерэбэ.

⁴ Хаан нюураа бүглөөд, шангаар: – Минии хүбүүн Абшалоом! Абшалоом, хүбүүмни, хүбүүмни! – гэжэ орилжо байгаа.

⁵ Ёһааб хаанай гэртэ ерэжэ, иигэжэ хэлэбэ: – Ами наһыетнай болон басагад, хүбүүдэйтнай, һамгадайтнай, бага һамгадайтнай ами наһа абарһан өөрынгөө бүхы сэрэгые мүнөөдэр та доромжолоот.

⁶ Таниие үзэн ядадаг зондо та дуратайт, танда дуратай зониие та үзэн яданат. Сэрэгэй дарганар болон зарасанар танда юуншье бэшэ гэжэ мүнөөдэр харуулбат. Хэрбээ Абшалоом амиды мэндэ, харин бидэ бултадаа хосороо һаамнай, танда таарамжатай байха һэн ха гэжэ мүнөөдэр ойлгобоб.

⁷ Мүнөө газаашаа гараад, сэрэгшэдтэй хөөрэлдэгты. Гараагүй һаатнай, Эзэнэй урда тангаригланаб, энэл һүниндөө нэгэшье хүн тантай үлэхэгүй! Энэ хадаа наһан соогоо үзэһэн хараһан гай зоболонһоотнай үшөө доро юумэн байха.

⁸ Иигээд хаан бодон ошожо, хотын хаалгын дэргэдэ һууба. Сэрэгшэдтэ энээн тухай дуулгахадань, сэрэг бултадаа хаанай урда сугларба. Харин израильшууд тус тустаа өөһэдын майхан руу зугадан тарашоо һэн.

Давид Иерусалим руу һөөргэлбэ

⁹ Израилиин бүхы обогуудай зон өөһэд хоорондоо иигэжэ арсалдажа эхилбэ: – Хаан бидэниие дайсадһаа, пилиштүүдэй һабарһаа абаран сүлөөлөө. Харин мүнөө Абшалоомһоо боложо, хаан газар нютагһаа тэрьедээ.

¹⁰ Бидэнэй тоһолжо хаан болгоһон Абшалоом байлдаанда алуулаа. Юундэ мүнөө хааниие һөөргэнь бусаахаяа хэншье оролдоногүйб?

¹¹ Давид хаан санаарта Цадоок болон Абиатаарта хүниие эльгээжэ, иигэжэ захиба: – Иудын удамаршадта иигэжэ хэлэгты: «Юундэ таанад хааниие ордондонь түрүүлэн бусаахаяа һананагүйбта?

¹² Таанад болбол минии аха дүү, мяха шуһанайм таһардаһан. Тиимэ аад, юундэ намайе бусаан асархада һүүлшын болохо болообта?»

¹³ Мүн Амасаада «Ши минии мяха шуһанай таһардаһан бэшэ юм гүш? Би шамайе Ёһаабай орондо сэрэгэйнгээ жанжин болгохоб. Тиигээгүй һаам, Бурхан намайе шиидхүүжэн!» гэжэ хаан хэлэнэ гээд хэлэгты.

¹⁴ Давидай үгэнүүд Иудын бүхы зоной зүрхэ сэдьхэл хүдэлгэжэ, түшэмэлнүүдтэеэ хамта бусахыень тэдэ хаанда дурадхаа һэн.

¹⁵ Тиигээд хаан бусажа, Иордан голдо хүрэбэ. Тэрэниие угтан, гол гаталуулхын тула Иудын зон Гилгаалда ерээ һэн.

Шимэй хүлисэл гуйна

¹⁶ Бахуриимһээ уг гарбалтай бэньямиин хүн Гэраагай хүбүүн Шимэй Давид хааниие угтахаяа яаран, Иудын зонтой хамта ерэбэ.

¹⁷ Тэрээнтэй хамта бэньямиин обогой мянган эрэшүүл, тиихэдэ Саулай гэр бүлын зараса Цибаа арбан табан хүбүүдээ, хорин зарасанараа дахуулан, Иордан голдо хаантай уулзахаяа ерээ бэлэй.

¹⁸ Иигээд тэдэ хаанай гэр бүлэдэ, түшэмэлнүүдтэнь гол гаталхадань туһалба. Хаанай Иордан гол гаталхадань, Гэраагай хүбүүн Шимэй урдань газарта унаба.

¹⁹ Тэрэ хаанда иигэжэ хэлэбэ: – Эзэн хаамни, намайе гэмтэй гэжэ бү тооложо байгыт. Танай Иерусалимһаа гаража байһан тэрэ үдэр минии хэһэн гэмые зүрхэ сэдьхэлдээ хадагалжа бү ябыт.

²⁰ Үндэр түрэлтэ хаан, би нүгэл хэһэнээ мэдэнэб, тиимэһээ Иосифой гэр бүлэһөө эгээл түрүүлэн таниие угтахаяа би мүнөөдэр ерээб.

²¹ Цэруяагай хүбүүн Абишай харюудань иигэжэ хэлэбэ: – Эзэнэй тоһолон ёһолһон хүниие харааһанайнгаа түлөө Шимэй үхэхэ ёһотой.

²² Гэбэшье Давид хэлээ һэн: – Цэруяагай хүбүүд, энэ болбол минии шиидхэхэ хэрэг. Израилиин хаан мүн гээшэб гэжэ мүнөөдэр мэдээб. Мүнөөдэр хэншье Израильда алуулха ёһогүй.

²³ Тиигээд хаан Шимэйдэ тангариглан, иигэжэ тунхаглаба: – Ши үхэхэгүйш.

Хаан Мэпибоошэдтой уулзаба

²⁴ Саулай аша хүбүүн Мэпибоошэт мүн лэ хааниие угтахаяа гараба. Тэрэ хаанай Иерусалимһаа гаража ябаһан үдэрһөө хойшо энэ мүнөө амар мэндэ бусажа ерэһэн үдэр хүрэтэрынь хүлөө угаагаагүй, һахалаа абаагүй, хубсаһаашье угаагаагүй байба.

²⁵ Угтахаяа урдаһаань Иерусалим руу тэрэнэй ерэхэдэ, хаан асууба: – Мэпибоошэт, ши юундэ намтай хамта ябаагүйбши?

²⁶ – Үндэр түрэлтэ хаан! Та намайе эрэмдэг гээд мэдэнэт. Тантай хамта ябахаяа һанажа, элжэгэ эмээллэхыень зарасадаа хэлэхэдэм, тэрэ намайе мэхэлээ.

²⁷ Намайе худалаар танда хоблоо. Теэд та Бурханай Эльгээмэл мэтэт. Хэхэ гэһэн юумэеэ хэгты.

²⁸ Минии үбгэ эсэгын гэр бүлэ хаанай урда юуншье бэшэ, үхэл тарааха зон байгаашье һаань, та намайе өөрынгөө шэрээдэ, тантай хамта эдеэ хоол баридаг зоной дунда һуулгаат. Би юундэшье гомдохо эрхэгүйб, – гэжэ Мэпибоошэт харюусаба.

²⁹ Хаан тэрээндэ хэлэбэ: – Энээн тухай хэлэхэшни хүрөө. Ши болон Цибаа газар хоорондоо хубаажа абахат гэжэ би захирнаб.

³⁰ – Цибаа бултыеньшье абаг лэ. Эзэн хаанаймни амиды мэндэ бусаһаниинь лэ намда эгээл сэнтэй, – гэжэ Мэпибоошэт хэлээ һэн.

Давид ба Барзиллай

³¹ Галаадай хүн Барзиллай Рогэлиимһээ ерэжэ, хаанай Иордан гол гаталхадань мүн лэ үдэшэлсэбэ.

³² Барзиллай хадаа угаа үндэр наһатай, ная хүрэһэн хүн бэлэй. Тэрэ баян хүн байгаа, тиимэһээ Давидай Маханааимда байха үедэнь хүнэһөөр хангаа һэн.

³³ Хаан Барзиллайда хэлэбэ: – Намтай хамта гол гаталан ябагты. Би Иерусалимда таниие анхаралаар хүреэлхэб.

³⁴ Теэд Барзиллай иигэжэ харюусаба: – Үндэр түрэлтэ хаан! Би үндэр наһатайб. Тантай хамта Иерусалим ошоошье хадаа би хэды удаан амиды мэндэ ябахабиб даа?

³⁵ Би ная наһатай болооб. Һайн, мууешье илгаруулжа шадахагүйб, эдеэ-унданай амта ойлгоногүйб, эрэ, эхэнэр дуушадай хоолойшье дуулахагүйб. Эзэн хаандаа юундэ дарамта болохобиб даа.

³⁶ Богоолтнай тантай хамта Иордан голые гаталжа, нэгэ бага ябаад бусаг. Намда шагнал хэрэггүй.

³⁷ Минии өөрынгөө хотодо, эхэ, эсэгынгээ булашын ойро үхэхын тула намайе һөөргэнь табигты. Харин энэ минии хүбүүн Кимһаам. Тэрэ тантай ябаг лэ, Үндэр түрэлтэ хаан. Өөрынгөө һанаһаар тэрээндэ хандаарайт.

³⁸ Хаан тиихэдэнь иигэжэ хэлэбэ: – Кимһаам намтай хамта ябаг. Танда таарамжатай юумэ би тэрээндэ хэжэ байхаб. Танай намһаа хүсэһэн бүхы юумыетнайшье би бэелүүлхэб.

³⁹ Иигэжэ Давид болон тэрэнэй бүхы сэрэг Иордан гол гаталба. Хаан Барзиллай гэгшые таалажа, юрөөбэ. Тиигээд Барзиллай гэр руугаа бусаа һэн.

Иуда Израиль хоёр арсалдаба

⁴⁰ Хаан Гилгаал руу ябажа, Кимһаамшье тэрээнтэй ошобо. Иудын бүхы сэрэгшэд, Израилиин сэрэгэй хахадынь хааниие дахан ябаа һэн.

⁴¹ Удаань израильшууд бултадаа хаанда ерээд, иигэжэ хандаба: – Манай аха дүүнэр болохо Иудын зон юундэ таниие буляажа, бүхы гэр бүлэтэй, түшэмэлнүүдтэйтнай, тантай хамта байһан бүхы зонтой Иордан гол гаталуулан асарааб?

⁴² Иудын зон тэдээндэ харюусаба ха: – Юундэб гэхэдэ, хаан болбол манай дүтэ түрэл юм. Юундэ энээнэй түлөө бидэндэ уурланабта? Хаанһаа бидэ эдеэ хоолоор хүндэлүүлжэ байгаа бэшэбди, бэлэг үгөө бэшэ.

⁴³ Израилиин зон хэлэбэ: – Давид хаанай талаар таанадта орходоо бидэ арба дахин ехэ эрхэтэйбди. Хааниие һөөргэн бусааха тухай маанадай түрүүн хэлэһые бү мартагты! Гэбэшье Иудын зон эрхэнүүд тухайгаа хэлэхэдээ, Израилиин зонһоо үлүү шанга, дошхон байгаа бэлэй.