2 Хаан түрэнүүд 16 - Библи

Давид ба Цибаа

¹ Давид хадын оройһоо нэгэ бага уруудан ябахадаа, Мэпибоошэдой зараса Цибаатай уулзаба. Тэрэ ашаа тээһэн хоёр элжэгэтэй, тэдээн дээрээ хоёр зуун хүбэриг хилээмэн, зуун багса хатааһан үзэм, зуун багса инжир, нэгэ тулам үзэмэй дараһан архи ашаһан ябаа.

² Хаанай Цибааһаа: – Яахаяа эдэ бүгэдые абаад ябанабши? – гэжэ асуухада, Цибаа иигэжэ харюусаба: – Элжэгэнүүд хаанай гэр бүлын унаа, хилээмэн болон жэмэс зоной эдихэ хоол, үзэмэй дараһан архи хадаа элһэн сүл губида эсэһэн зоной ууха ундан болохо юм.

³ – Эзэнэйшни хүбүүн хаана байнаб? – гэжэ хаан асууба ха. – Тэрэ Иерусалимда үлөө, «мүнөө израильшууд үбгэ эсэгымни хаан түрые намда бусааха» гэжэ хэлэнэ, – гэбэ Цибаа.

⁴ Тиихэдэнь хаан Цибаада иигэжэ хэлэбэ: – Мэпибоошэдой хамаг юумэн мүнөө шинии. – Үндэр түрэлтэ хаан, би танай үнэн зарасаб, үршөөл хайратнай хододоо намтай байхань болтогой! – гэжэ Цибаа хэлэжэ, доро дохибо.

Давид ба Шимэй

⁵ Давид хаанай Бахуриимдэ хүрэжэ ерэхэдэ, Саулай түрэлэй нэгэ хүн гаража ерэбэ. Тэрэ Гэраагай хүбүүн Шимэй бэлэй. Тэрэ хараал шэрээл табижа ябаба.

⁶ Хаан руу, мүн хааниие баруун, зүүн талаһаа тойроод байһан түшэмэлнүүд руунь тэрэ шулуу шэдэжэ байгаа һэн.

⁷ Шимэй: – Тонило, тонило! Алууршан! Хаатаржаан!

⁸ Саулай гэр бүлын шуһа урдахуулһанайш түлөө Эзэн шамайе хэһээжэ байна. Ши Саулай хаан шэрээ буляажа абааш. Тиимэһээл Эзэн хаан шэрээе шамһаа шэлжүүлэн, Абшалоом хүбүүндэшни үгэбэ. Алууршан байһандашнил эдэ бүхы гай гасалан шамтай ушарна, – гэжэ харааба.

⁹ Цэруяа эхэтэй Абишай: – Энэ үхэһэн нохой яахадаа минии эзэн хааниие харааха болооб? Ошожо, тэрэнэй толгой таһа татахые намда зүбшөөгыт, – гэбэ ха.

¹⁰ Хаан: – Цэруяагай хүбүүд, таанад яанабта? Хэрбээ Эзэнэй тэрээндэ «Давидые хараа» гэжэ хэлээ хадань, тэрэ харааһан болобол, хэн тэрээндэ «Ши юундэ иинэбши?» гэжэ хэлэхэ юм? – гэбэ.

¹¹ Тиигээд Давид Абишай болон бүхы түшэмэлнүүдтээ иигэжэ хэлэбэ: – Минии түрэһэн хүбүүнэй намайе алаха гэжэ байгаа хадань энэ бэньямиин хүнэй тиихэньшье бүри ехэ шалтагаантай юм бэшэ гү? Орхигты тэрэниие! Эзэн тэрээндэ захираа, тэрэ хараажал байг.

¹² Эзэн минии доромжолуулагдажа байһые хаража, тэрэнэй хараалай орондо намда һайн һайханиие хэжэ магад.

¹³ Давид болон тэрэнэй зон өөрын харгы замаар саашалжа, Шимэй тэдэнэй хойноһоо, хадын ташалангаар гэшхэлэн, тэрэниие хараажа, шулуу шэдэжэ, шорой сасажа ябаа һэн.

¹⁴ Хаан өөрынгөө зонтой хамта Иордан руу ерэбэ. Тэдэ эсэжэ ядарһан тула тэндэ амараа һэн.

Абшалоом Иерусалимда ерэбэ

¹⁵ Абшалоом болон бүхы Израилиин сэрэг Иерусалим хото руу ерэбэ. Ахитоопэлшье тэрээнтэй хамта ерээ һэн.

¹⁶ Давидай нүхэр Хушай гэдэг архэй хүн Абшалоомдо ерэжэ, иигэжэ хандаба: – Хаан мандатугай! Хаан мандатугай!

¹⁷ Абшалоом Хушайһаа асууба: – Нүхэртөө шинии үнэн сэхэ байгаашашни энэ гээшэ гү? Юундэ ши нүхэртэеэ хамта ябаагүйбши?

¹⁸ Хушай Абшалоомдо харюусаба: – Үгы. Эзэн болон энэ арад түмэн, бүхы израильшууд хэниие шэлэн һунганаб, би тэрэнэй боложо, тэрээнтэй хамта байхаб. Би тантайб.

¹⁹ Тиигээдшье би хэндэ бэшэ алба хэхэбиб даа. Урдань танай эсэгэдэ алба хэдэг бэлэйб, мүнөө хүбүүндэнь хэхэ ёһотойб.

²⁰ Нэгэ хэды болоод Абшалоом Ахитоопэлһээ асууба: – Зүбшэл хэлэгты. Яаха болонобибди?

²¹ Ахитоопэл харюусаба: – Гэрээ һахюулхаар эсэгынгээ үлөөһэн бага һамгадтай унтагты. Таниие эсэгэдээ үзэн ядуулхаар юумэ хэһыетнай, үнэхөөр дайсаниинь болоһыетнай бүхы Израиль дуулажа, танай тала баригшад бүри ехээр таниие дэмжэжэ эхилхэ.

²² Иигээд Абшалоомдо ордоной хушалта дээрэ майхан татагдаба, тэрэ тиишээ орон, эсэгынгээ бага һамгадтай унтаба. Хамаг Израиль энээниие хараа һэн.

²³ Тэрэ сагта Ахитоопэлэй зүбшэлнүүд Бурханһаа зүбшэл асуужа байһандал тоологдодог байгаа. Тэдэ Давидташье, Абшалоомдошье ехэ сэнтэй бэлэй.