2 Хаан түрэнүүд 13 - Библи

Амноон ба Тамаар

¹ Удаань иимэ юумэн болобо. Давидай хүбүүн Абшалоом Тамаар нэрэтэй, сэбэр һайхан дүү басагантай байгаа. Давидай нүгөөдэ һамганайнь хүбүүн Амноон тэрээндэ дурлаба ха.

² Амноон үбшэлтэрөө Тамаар тухай һанаан үнөөн болодог болобо. Тамаар басаган үшөө байгаа, тиимэһээ тэрээндэ яажа дүтэлхэеэ тэрэ бэрхэшээжэ байба.

³ Тэрэ нэгэ нүхэртэй һэн. Тэрэнь Давидай аха Шимаагай хүбүүн Ёнадааб бэлэй. Ёнадааб ехэ мэхэтэй байгаа.

⁴ Тэрэ Амноондо хэлэбэ: – Хаанай хүбүүн байгаад, юундэ ши үдэрһөө үдэртэ туранхай боложол байнабши? Намда хэлэхэгүй юм гүш? Амноон тэрээндэ харюусаба: – Абшалоом ахынгаа дүү басаган Тамаарта дурлашооб.

⁵ Тиихэдэнь Ёнадааб тэрээндэ иимэ юумэ дурадхаба: – Орондоо хэбтэжэ, үбшэлһэн мэтэ хэбэр үзүүлэ. Эсэгынгээ шамайе эрьехэеэ ерэхэдэнь, тэрээндэ «Дүү басаган Тамаарые ерүүлжэ, минии хараһаар байтар эдеэ хоол намда бэлдүүлыт. Тамаарай гарһаа эдеэ барихаб» гэжэ хэлэ.

⁶ Иигэжэ Амноон хэбтэжэ, үбшэлһэн мэтэ хэбэр үзүүлбэ. Хаан тэрэниие эрьехэеэ ерэбэ. Амноон эсэгэдээ хэлэбэ: – Дүү басаган Тамаарые ерүүлжэ, минии хараһаар байтар намда хэдэн бообо хүүлыт, намда тэрэнэй гарһаа эдихыем зүбшөөгыт.

⁷ Тиихэдэнь хаан Тамаарай гэр руу хүниие ябуулжа: – Амноон ахынгаа гэртэ ошожо, тэрээндэ эдеэ хоол хэжэ үгэ, – гэжэ хэлэхыень захяа һэн.

⁸ Иигэжэ Тамаар Амноон ахынгаа гэртэ ерэбэ. Тэрэ хэбтэжэ байгаа. Тамаар талха абажа зуураад, хараһаар байтарнь бообо хэжэ, шанаба.

⁹ Тэрэ тогоогоо абажа, эдеэ урдань табиба. Теэд Амноон эдихэеэ арсаба. Амноон иигэжэ хэлэбэ: – Бултадаа эндэһээ гараг. Бүхы зон тэндэһээ гараба.

¹⁰ Тиихэдэнь Амноон Тамаарта хэлэбэ ха: – Эдеэе унталгын таһалга руу абааша, би шинии гарһаа эдихэб. Тамаар хэһэн бообонуудаа Амноон ахынгаа унталгын таһалга руу абаашаба.

¹¹ Урдань табихадань, Амноон тэрэниие саб тэбэреэд: – Намтай хэбтэ, – гээ бэлэй.

¹² Теэд Тамаар тэрээндэ хэлэбэ: – Үгы, ахай, тиигэжэ болохогүй. Намайе бү доромжологты. Израильда иимэ юумэ хэдэггүй бшуу. Иимэ муухай юумэ бү хэгты.

¹³ Бишье иигэжэ бузарлагдаад хайшаа ошохобиб? Ташье Израильда ухаагүй зоной нэгэн мэтэ тоологдодог болохот. Хаантай хөөрэлдыт даа. Тэрэ намайе танда үгэхэеэ арсахагүй байха.

¹⁴ Теэд Амноон тэрэнэй үгые дуулабагүй. Үлүү хүсэтэй байһан тула тэрэниие хүсөөр эдлэбэ.

¹⁵ Удаань Амноон тэрэниие угаа ехээр үзэн ядажа эхилбэ. Тэрэ үээн ядалгань тэрээндэ дуратайһаа булюу ехэ байгаа бэлэй. Амноон тэрээндэ хандаба: – Бодоод, тонило!

¹⁶ Харин Тамаарай тэрээндэ: – Үгы. Намайе үлдэхэ гээшэ танай намда хэһэн муу хэрэгһээ бүри муу юумэн, – гэжэ хэлэбэшье, тэрэ үгыень дуулабагүй.

¹⁷ Тиигээд Амноон залуу зарасаяа дуудан, иигэжэ захирба: – Энээниие намһаа үлдэжэ гаргаад, үүдээ шэбхэдэ. Амнооной зараса захиралтыень дүүргээ һэн.

¹⁸ Тамаар үнгэтэ ута хубсаһа үмдэнхэй бэлэй. Хаанай хадамда гараадүй басагад иимэ хубсаһа үмдэдэг байгаа.

¹⁹ Тамаар толгой дээрээ үнэһэ адхан, үнгэтэ хубсаһаяа урижа, нюураа гараараа бүглэн, шангаар уйлан ябаба.

²⁰ Тэрэнэй аха Абшалоом: – Амноон ахашни шамтай хамта байгаа гү? Дүүхэймни, мүнөө дуугүй байгыш даа. Тэрэ шинии аха бшуу даа. Энээниие зүрхэ сэдьхэлдээ хадагалжа бү бай, – гэбэ. Иигэжэ Тамаар Абшалоом ахынгаа гэртэ һүр һүлдэгүй, гансаардан ажаһуугаа бэлэй.

²¹ Давид хаан эдэ бүхы хэрэг тушаа дуулаад, ехэ уурлаба.

²² Харин Абшалоом Амноондо һайн, муушье юумэ хэлээгүй. Дүү басаган Тамаарые хүсөөр эдлэһэндэнь тэрэ Амнооные үзэн ядадаг болоо һэн.

Абшалоом үһөөгөө абана

²³ Тэрээнһээ хойшо хоёр жэл үнгэрөө. Абшалоом Эпрааим хотын хажуудахи Бааһал-Хацоорто хонидой нооһо хайшалалгын баяр хэжэ, хаанай бүхы хүбүүдые уриба.

²⁴ Абшалоом хааниие бараалхан, иигэжэ уриба: – Танай богоол болохо би хонидой нооһо хиргаха баяр хэжэ байнаб. Та түшэмэлнүүдтэйгээ хамта ерэжэ, баяр ёһололдо хабаадыт.

²⁵ Теэд хаан Абшалоомдо харюусаба: – Үгы даа, хүбүүмни, маанадай булта ябаһанай хэрэггүй. Шамда дарамта болохобди. Хэдышье Абшалоомой гуйгаа хадань, хаан ошобогүй, харин тэрэниие юрөөбэ.

²⁶ Тиихэдэнь Абшалоом иигэжэ хэлэбэ: – Тиигэбэл, минии аха Амноон бидэнтэй хамта ошог лэ. – Юундэ тэрэ шамтай ошохо юм? – гэжэ хаан асууба.

²⁷ Гэбэшье Абшалоомой гуйхадань, Амнооные болон өөрынгөө бүхы хүбүүдые тэрээнтэй хамта тэрэ ябуулба.

²⁸ Абшалоом зарасанартаа захирба: – Анхарагты! Амнооной үзэмэй дараһан архи уужа, хүхижэ эхилхэдэнь, би таанарта «Амнооные хюдагты» гэхэб. Тиихэдэм тэрэниие алагты. Бү айгты. Би өөрөө таанарта захиржа байна ха юмбиб. Бү айгты, зоригтой байгты!

²⁹ Абшалоомой зарасанар захирһанайнь ёһоор Амнооные алаба. Тиихэдэнь хаанай бүхы хүбүүд өөр өөрынгөө луус унаад, тэрьедэбэ.

³⁰ Тэдэнэй үшөө аян замдаа ябажа байха үедэ Давидта иимэ мэдээн дуулдаба: – Абшалоом хаанай бүхы хүбүүдые алаа, хэнииньшье амиды үлөөгүй.

³¹ Тиихэдэнь хаан бодожо, хубсаһаа урин, газарта унаа бэлэй. Тэрэнэй хажууда байһан бүхы зарасанарынь мүн лэ хубсаһаяа уриба.

³² Теэд Давидай аха Шимаагай хүбүүн Ёнадааб иигэжэ хэлэбэ: – Хаанай хүбүүд бултадаа алуулба гэжэ та бү һанагты. Амноон лэ алуулаа. Ушар юуб гэхэдэ, дүү басаган Тамаарыень Амнооной доромжолһон үдэрһөө хойшо Абшалоом иимэ һанаатай байгаа.

³³ Тиимэһээ одоо «Хаанай бүхы хүбүүд алуулба» гэжэ һанаата боложо бү байгты, эзэн хаамни. Гансал Амноон гээгдээ.

³⁴ Абшалоом тиигэһээр байтар тэрьедээ бэлэй. Тэрэ үедэ харуулшан хүбүүнэй обёорходо, хадын ташалангаар олон зон буужа ябаба. Тэрэ хаанда энээн тушаа дуулгаба.

³⁵ Ёнадааб хаанда иигэжэ хэлэбэ: – Харагты, эдэ танай хүбүүд ерэжэ ябана. Минии хэлэһэнэй ёһоор лэ болобо.

³⁶ Тэрэнэй дуугарамсаарнь лэ хаанай хүбүүд ерэжэ, шанга гэгшээр уйлалдаба. Хаан болон тэрэнэй бүхы түшэмэлнүүдшье мүн лэ шангаар бархиралдаа бэлэй.

^37-38 Абшалоом тэрьедэн, Гэшүүрэй хаан, Аммиһүүдэй хүбүүн Талмай руу ошоо һэн. Тэрэ тэндэ гурбан жэлэй туршада байгаа. Давид Амноон хүбүүнэйнгөө хойноһоо үни удаан сагта гашуудабашье,

³⁹ гашуудахаяа болижо, уур сухалынь бууража, Абшалоомой хойноһоо мүрдэн гарабагүй.