2 Хаан түрэнүүд 10 - Библи

¹ Нэгэ хэды сагай үнгэрһэнэй удаа аммоонуудай хаан наһа бараба. Тэрэнэй орондо Хануун хүбүүниинь хаан шэрээдэ һууба ха.

² Тиихэдэнь Давид: – Эсэгынь намда үршөөл хайра үзүүлһэндэл би Наһаашай хүбүүн Хануунда тиимэ хайра үзүүлхэ юм байна, – гэжэ хэлээд, эсэгэ тухайнь шаналһанаа элирхэйлхэеэ өөрынгөө зарасанарые тэрээндэ эльгээбэ. Давидай зарасанарай аммоонуудай газар руу ерэхэдэнь,

³ аммоонуудай ноёд өөрынгөө хаан Хануунда иигэжэ хэлэбэ: – Давид танда шаналалаа мэдүүлхэеэ зониие эльгээхэдээ эсэгытнай хүндэлһэндөө эльгээгээ гэжэ һанаа гүт? Үгы даа, энэ хотые тагнан хаража һандаргаахаяа Давид тан руу зоноо эльгээгээ.

⁴ Тиихэдэнь Хануун Давидай зониие барижа, хүн бүхэнэйнь һахалай хахадые хюһаад, хубсаһыень ташаа хүрэтэрынь шуулажа таһалаад, һөөргэнь табиба ха.

⁵ Энээн тушаа Давид дуулажа, тэдэ зонойнгоо урдаһаа хүнүүдые эльгээн, һахалайнгаа ургатар Ерихоондо байхыень, тиигээд һүүлдэнь бусахыень захиба. Ушар юуб гэхэдэ, тэдэ зон угаа доромжологдоод байгаа шуу.

⁶ Аммоонууд Давидай дайсад болоһоноо ойлгожо, Бэт-Рэһообой болон Цобаагай араамшуудта хандан, хорин мянган ябаган сэрэг, Тообһоо арбан хоёр мянган эрэшүүлые, Маһахаагай хааниие нэгэ мянган хүнтэйнь хүлһэлэн абаба.

⁷ Давид энээниие дуулаад, Ёһаабые эгээл эрэлхэг сэрэгтэйнь хамта урдаһаань эльгээбэ ха.

⁸ Аммоонууд гаража ерээд, өөрынгөө гол хото Раббаагай бартаануудай дэргэдэ байлдаанай жагсаалаар зогсобо. Цобаа болон Рэһообой араамшууд, мүн Тооб болон Маһахаагай зон амяараа талада тогтобо.

⁹ Хоёр газарта тулалдаха хэрэгтэйе Ёһааб хараад, Израилиин бүхы шэлдэг эрэшүүлые шэлэн, араамшуудай урдаһаа табиба.

¹⁰ Харин үлэһэн зоноо аммоонуудай урда жагсаахые тэрэ өөрын дүү Абишай гэгшэдэ даалгаба.

¹¹ Ёһааб иигэжэ хэлэбэ: – Хэрбээ араамшуудай намһаа үлүү хүсэтэй байгаа һаань, ши намда туһалхаш. Харин аммоонуудай шамһаа хүсэтэй байгаа хадань, би шамда туһалхаяа ерэхэб.

¹² Зоригтой бай! Арад түмэнэйнгөө түлөө, Бурханайнгаа хотонуудай түлөө эрэлхэг шангаар зогсоё. Эзэн хэхэ юумэеэ үйлэдэхэнь болтогой!

¹³ Иигэжэ Ёһаабай болон тэрээнтэй хамта байһан сэрэг араамшуудтай тулалдаба, араамшууд зугадаба.

¹⁴ Аммоонууд араамшуудай зугадахые хараад, өөһэдөө Абишайһаа зугадажа, хото руугаа оробо ха. Тиигээд Ёһааб аммоонуудта дайсахаяа болижо, Иерусалим руу ерэбэ.

¹⁵ Араамшууд Израильда диилдэһэнээ хараад, өөһэдынгөө бусад зониие суглуулба.

¹⁶ Һадаад-Ээзэр хүнүүдые эльгээн, Евфрат мүрэнэй саада эрьедэ байһан араамшуудые асаруулба ха. Тэдэнь Хэлаамда ерэбэ. Һадаад-Ээзэрэй сэрэгэй жанжин Шобаах тэдэниие ударидан ябаа.

¹⁷ Энээн тушаа Давидта мэдээжэ боложо, тэрэ бүхы Израилиие суглуулан, Иорданиие гаталжа, Хэлаам руу ерэбэ. Араамшууд Давидай урдаһаа тулалдахаяа жагсаа. Байлдаан боложо,

¹⁸ араамшууд израильшуудһаа тэрьедэбэ. Давид тэдэнэй долоон зуун дайшалхы тэргэтэ сэрэг, дүшэн мянган морито сэрэг хюдажа, сэрэгэй жанжин Шобаахые шархатуулхадань, тэрэ тэндээ хосорбо.

¹⁹ Һадаад-Ээзэрэй мэдэлдэ байгаа бүхы хаашуул Израильда илагдаһанаа ойлгожо, Израилиин эрхэдэ орожо, энхэ тайбан ажаһууха тухай хэлсээ баталба. Араамшууд энээнһээ хойшо аммоонуудта туһалхаяа айдаг болоо һэн.