2 Хаан түрэнүүд 1 - Библи

Давид Саулай гээгдэһэн тушаа мэдэбэ

¹ Саулай гээгдэһэнэй удаа Давид амалээгүүдые бута сохижо, һөөргөө бусаад, хоёр хоног Циклаагта байба.

² Гурбадахи үдэрынь нэгэ хүн Саулай хотон хүреэнһөө хүрэжэ ерээ һэн. Тэрэнэй хубсаһан гай гашуудалһаа боложо уригданхай, толгойнь тооһо шоройдо дарагданхай. Тэрэ Давидта дүтэлөөд, газарта унан, һунажа мүргэбэ.

³ Давид тэрээнһээ асууба: – Ши хаанаһаа ерээбши? – Би Израилиин хотон хүреэнһөөб, арай гэжэ амиды үлөөб, – гэжэ тэрэ харюусаба.

⁴ – Юун болооб? Намда дуулгыш, – гэбэ Давид. – Манай сэрэг байлдаанай газарһаа тэрьедэжэ, олон зомнай шархатаа, алуулаа. Саул болон тэрэнэй хүбүүн Ёнатааншье алуулаа, – гэжэ тэрэ хэлэбэ.

⁵ – Саулай, мүн тэрэнэй хүбүүн Ёнатаанай гээгдэһые ши хаанаһаа мэдээбши? – гэжэ мэдээ хүргэжэ ерэгшэ залуу хүнһөө Давид асууба.

⁶ Давидта тэрэ иимэ харюу үгөө һэн: – Тушаан болон дайралдажа, би тиихэдэ Гилбооһа хадада байгааб. Жада дээрээ тонгойһон Саулые хараа һэм, дайшалхы тэргэнүүд ба морин сэрэгүүд тэрэниие хүсэжэ байгаа бэлэй.

⁷ Тэрэ ара тээшээ эрьежэ, намайе хараад, дуудаба. «Би эндэ байнаб», – гэжэ харюусабаб.

⁸ «Ши хэн гээшэбши?» – гэжэ намһаа асуухадань, «би амалээг хүмби», – гэжэ хэлээ бэлэйб.

⁹ Тиихэдэм Саул: «Дүтэлөөд, намайе ала! Би хүндөөр шархатанхайб, угаа зобожо байнаб», – гэбэ.

¹⁰ Би дүтэлжэ, тэрэниие алаа һэм. Юуб гэбэл, иимэ хүндөөр шархатаһанайнгаа удаа тэрэ амиды байжа шадахагүй гэжэ мэдэжэ байгааб. Тэрэнэй толгой дээрэхи титим, гарайнь бугааг абажа, иишэнь тандаа асарааб, эзэмни.

¹¹ Давид гашуудалда абтан, хубсаһаяа уриба, тэрээнтэй хамта байһан бүхы зон мүн лэ тиибэ.

¹² Һэлмээр сабшагдан алуулһан Саул ба тэрэнэй хүбүүн Ёнатаан тушаа, Эзэнэй улад зон болохо Израиль тушаа тэдэ гашуудан уйлажа, үдэшэ болотор масаг бариба.

¹³ Давид мэдээ хүргэжэ ерэһэн залуу хүнһөө асууба: – Ши хаанахи хүмши? – Би ерүүл хүн болохо амалээг хүнэй хүбүүмби, – гэжэ тэрэ харюусаа һэн.

¹⁴ Давид тэрээндэ хэлээ бэлэй: – Ши Эзэнэй шэлэжэ, тоһоор түрхиһэн хүндэ гар хүрэн алажа байхаһаа юундэ айгаагүйбши?!

¹⁵ Тиигээд Давидай зонойнгоо нэгыень дуудажа: – Дүтэлөөд тэрэниие алагты! – гэхэдэнь, тэрэ амалээг хүниие үхэтэрынь сохижо алаба.

¹⁶ Давид амалээг хүндэ иигэжэ үгүүлээ бэлэй: – Ши өөрөө өөртөө тодхор татааш. «Эзэнэй тоһолһон хүниие алааб» гэжэ хэлэхэдээ, ши өөрынгөө урдаһаа гэршэлээш.

Саул болон Ёнатаан тушаа Давидай гашуудал

¹⁷ Давид Саул болон тэрэнэй хүбүүн Ёнатаан тухай гашуудалай энэ дуу дуулажа,

¹⁸ Иудын улад зониие тэрээндэ һургахые захирба. (Тэрэ Иашарай ном соо бэшэгдэнхэй.)

¹⁹ Израилиин бахархал! Ши дайсанайнгаа урда һүгэдэн сухарингүй алуулбаш! Эгээл эрэлхэг зоригтойшуулнай алдалан унаба!

²⁰ Пилиштүүдэй басагадые баярлуулхагүйн, бэлгэеэ отолуулаагүй зоной үхидые хүхеэхэгүйн тула энээн тушаа Гаадта бү мэдүүлэгты, Ашхэлооной гудамжануудташье бү тунхаглагты.

²¹ Оо, Гилбооһын уула хаданууд, таанад дээрэ шүүдэр бү унаг, бороо бү орог, таряалангууд хододоо хооһон байг лэ! Юуб гэхэдэ, эрэлхэг зоригтойшуулай бамбай, Саулай тоһо түрхюулһэн бамбай тэндэ бузарлагдаба.

²² Ёнатаанай һурша ном тодо мэргэн, Саулай һэлмэ хайра гамгүй байгаа, шархатаһан дайсадай шуһа һородог, сэрэгшэдэй өөхэ отолдог бэлэйл.

²³ Саул ба Ёнатаан, эгээл дуратайнууднай, эгээл һайханууднай, амиды сагтаа хамта, наһа барахадаашье тэдэ һалаагүйл! Тэдэ бүргэдһөөшье хурдан, арсаланһаашье хүсэтэй бэлэйл.

²⁴ Оо, Израилиин басагад, Саул тушаа уйлыта! Тэрэ таанадта уб улаан дэгэл гоёон үмдэхүүлдэг, хубсаһыетнай алтаар шэмэглэдэг һэн.

²⁵ Тулалдаанда баатарнууд унаба! Ёнатаан дайсадайнгаа урда һүгэдэн сухарингүй алуулаа.

²⁶ Ёнатаан, ахамни! Тан тушаа зобон шаналжа байнаб. Та намда угаа хайратай байгаат. Танай хайра дуран намда хэды гайхалтай һайхан, бүһэгүй хүнэй дуранһаа үлүү дээрэ бэлэйл.

²⁷ Эрэлхэг зон алдалан унаба, дайнай зэбсэгүүд һалаба!