Фессалоникиинхидтэ 2-дохи 3 - Библи

Бидэнэй түлөө зальбаржа байгты

¹ Аха дүүнэрни, түгэсхэлдэнь иимэ юумэн хэлэхэ байнаб: Эзэнэй һургаал таанадай дунда яажа таража байнаб, тон тиигэжэл саашадаа таража, алдаршажа байхын тула таанад бидэнэй түлөө зальбаржа байгты.

² Бидэниие нүгэлтэ, хуурмаг хүнүүдһээ зайсуулжа байхыень баһа Бурханда зальбаржа байгты. Хүн бүхэн Бурханай Үгэдэ үнэн сэхэ байдаггүй.

³ Гэхэдэ Эзэн найдабаритай. Тиимэһээ Тэрэ таанадые зоригжуулжа, шолмосһоо аршалжа байха.

⁴ Таанад бидэнэй захирһан юумые хэхэт, саашадаашье хэжэ байхат гэһэн хатуу этигэл Эзэн бидэндэ үгэнэ.

⁵ Бурханай хайра дурые мэдэрүүлжэ, Христоосой ерэхые хүлеэхэ тэсэбэри Эзэн таанадта үршөөг лэ.

Ажаллаха уялга

⁶ Аха дүүнэрни, бидэнэй үгэһэн захяа заабариие сахидаггүй, журам замбараагүй һүзэглэгшэдһөө зайсажа байгты гэжэ Эзэн Иисүүс Христоосой нэрэ алдараар таанадтаа захирнабди.

⁷ Бидэнэйл хэһэн юумые һажаажа хэхэ ёһотойгоо таанад өөһэдөөшье һайн ойлгонот. Таанадтай хамта байхадаа, бидэ журам сахидаг һэмди.

⁸ Бидэ хэнээшье туһаламжые түлөөһэгүй абадаггүйбди. Таанадай хэндэшье ашаан болохогүй гэжэ бидэ үдэр һүнигүй ажалладаг һэмди.

⁹ Туһаламжа эрихэ эрхэгүй байһандаа бидэ тиигээ бэшэбди, харин таанадта һажаажа байха жэшээ харуулхын тула тиигэжэ ажаллажа байгаабди.

¹⁰ Бидэ таанадаар суг байхадаа, «Ажаллаха дурагүй хүн эдихэ ёһогүй» гэжэ хэлэдэг һэмди.

¹¹ Таанадай дунда журам сахидаггүй, юушье хэдэггүй, гансал ондоо хүнүүдэй хэрэгтэ оролсожо байдаг хүнүүд бии гэжэ дуулаһан ушарһаа эдэ бүхэниие хэлэнэбди.

¹² Тэдэ зониие дарууханаар амидаржа, өөһэдөө ажаллажа, өөһэдыгөө тэжээжэ байхыень Эзэн Иисүүс Христоосой нэрэ алдараар бидэ уряалжа, идхажа байнабди.

¹³ Аха дүүнэрни, таанад ходол үлзытэй юумэ бүтээжэ ябагты.

¹⁴ Энэ бэшэг соогоо захиһан үгэнүүдыемнай дуулаха дурагүй хүнүүд байжа магадгүй. Тиигэбэл таанад тэдэ хүнүүдэй эшэжэ улайхын тула тэдэниие ажаглажа байгаад, тэдэнээр харилсангүй байгаарайт.

¹⁵ Тиихэдээ тэдэндэ дайсадта адли бү хандаарайт, харин аха дүүнэрээ һургажа байһандал ухаан заажа байгаарайт.

Һүүлшын Үгэнүүд

¹⁶ Амгалан тайбанай эхин болохо Эзэн Өөрөө таанадта хододоо бүхы юумэндэ амгалан тайбаниие үршөөжэ байг лэ. Эзэн та бүхэнтэй оршожо байг лэ.

¹⁷ Өөрын гараар би энээниие бэшэнэб: Павел таанадые амаршална. Иимэ арга бүхы хандалгануудаймни бэлгэ тэмдэг болодог. Иигэжэл би бэшэдэг хүм.

¹⁸ Эзэн Иисүүс Христоосой үршөөл хайра та бүхэнтэй оршожо байг лэ.