1 Угай бэшэг 10 - Библи

Саулай эсэсэй үдэрнүүд, наһа баралга

¹ Пилиштүүд Израильтай дайлалдан, Израилиин зон пилиштүүдһээ тэрьедэжэ, Гилбооһа уулада алдалан унаба.

² Пилиштүүд Саулые болон тэрэнэй хүбүүдые хүсэжэ, Саулай Ёнатаан, Абинадааб, Малхишууһа хүбүүдые алаба.

³ Саулые тойроод ехэ байлдаан бужаганажа, һурша ном харбагшад тэрэниие харбажа, хүндөөр шархатуулба.

⁴ Тиихэдээ Саул өөрынь зэр зэбсэгые үргэгшэдэ: – Ши һэлмэеэ һугалаад, намайе хадхажа ала. Бэлгэеэ отолуулаагүй эдэ хүнүүд ерэжэ, бэеымни доромжолхол, – гэбэ. Теэд зэр зэбсэгынь үргэгшэ ехэ айжа, тэрэ захиралтыень дүүргэжэ шадабагүй. Саул һэлмэ абажа, дээрэнь унашаба.

⁵ Зэбсэг баригшань Саулай үхэһые үзөөд, өөрынгөө һэлмэ дээрэ унажа үхэбэ.

⁶ Иигэжэ Саул гурбан хүбүүдтэеэ, бүхы зарасанартаяа хамта гээгдэбэ.

⁷ Нюруу газарта байһан Израилиин бүхы зон сэрэгэй тэрьедэһэн, Саулай болон хүбүүдэйнь үхэһые мэдээд, хотонуудаа орхижо, зугадаба. Пилиштүүд ерэжэ, тэндэ байрлаа бэлэй.

⁸ Үглөөдэрынь пилиштүүд алагдаһан зониие тонохоёо ерэхэдээ, үхэһэн Саулай болон тэрэнэй гурбан хүбүүдэй бэенүүдые Гилбооһа уула дээрэ олобо.

⁹ Тэдэ Саулай толгой отолжо, хуяг, дуулгыень тайлан абажа, зэбсэгыень абажа, өөһэдынгөө шүтээнүүдтэ, арад зондо мэдээ дуулгахаяа элшэнэрые Пилиштын бүхы нютагуудаар эльгээбэ.

¹⁰ Саулай сэрэгэй зэбсэгые тэдэ өөһэдын бурхадай һүмэ соо табижа, толгойень Дагооной һүмэ соо үлгэбэ.

¹¹ Ябээш-Галаадай ажаһуугшад пилиштүүдэй Саулда юу хэһые дуулаад,

¹² бүхы сэрэгшэдынь ошожо, Саулай болон тэрэнэй хүбүүдэй бэенүүдые абажа, Ябээштэ асарба. Тиигээд яһыень Ябээшдэхи сарса модон доро хүдөөлүүлбэ. Тэдэ долоон хоног масаглаа һэн.

¹³ Эзэндэ үнэн сэхэ байгаагүй, Эзэнэй үгэ дуулаагүй, үхэһэн зоной һүнэһэ дуудагшада хандаһанайнгаа түлөө Саул иигэжэ наһа бараба.

¹⁴ Эзэниие тэрэ хүндэлөөгүй. Эзэн тэрэниие хороожо, Ишайн хүбүүн Давидта хан түрэ дамжуулба.