1 Хаан түрэнүүд 9 - Библи

Саул Самуил хоёр уулзаба

¹ Бэньямиин обогой Кииш гэжэ нэрэтэй нэгэ хүн байгаа. Тэрэ Абиһээл гэгшын хүбүүн, Цэроор гэгшын аша, Бэхораатын гуша, Апииахын дүшэ бэлэй. Тэрэ баян, хүндэтэй хүн байгаа.

² Тэрэ Саул гэжэ нэрэтэй хүбүүтэй һэн. Саул залуу, һайхан, Израилиин зоной дунда тэрээнһээ үлүү һайхан, нюргаар үндэр хүн үгы бэлэй.

³ Нэгэтэ Саулай эсэгэ Киишэй элжэгэнүүд үгы болошобо. Кииш өөрынгөө хүбүүн Саулда иигэжэ хэлэбэ: – Зарасанарай нэгыень абажа, элжэгэнүүдые бэдэрхэеэ ошо.

⁴ Тэдэ Эпрааимай уула хадаар, Шалиишаа нютагаар бэдэрэн ябаба, теэд элжэгэнүүдээ олобогүй. Шаһалиим нютагаар тэдэ ябаба, тэндэ элжэгэнүүд мүн лэ үгы. Бэньямиин нютагааршье тэдэ ябаба, олобогүй.

⁵ Цүүп нютагта ерэхэдээ, Саул зарасадаа иигэжэ хэлэбэ: – Һөөргэлэе. Эсэгэмни элжэгэнүүд тушаа бэшэ, харин маанадай түлөө һанаагаа зобохо.

⁶ Зарасань тэрээндэ: – Хүлеэгты. Энэ хотодо Бурханай хүн бии. Тэрэ хүндэтэй хүн. Тэрэнэй хэлэһэн юумэн булта бэелүүлэгдэдэг. Мүнөө тэрээндэ ошоё. Хаана элжэгэнүүдые олохыемнай тэрэ заажа үгэжэ магад, – гэбэ.

⁷ Саул зарасадаа: – Бидэ ошоо һаа, тэрэ хүндэ юу абаашажа үгэхэбибди? Манай сумаануудта эдеэншье дууһанхай. Бурханай хүндэ бариха бэлэгшье байхагүй. Бидэндэ юун бииб? – гэбэ.

⁸ Зарасань Саулда: – Харагты. Намда шээкэлэй дүрбэнэй нэгэ хуби бии. Би тэрэниие Бурханай хүндэ үгэхэб, тиихэдэм ябаха замыемнай тэрэ бидэндэ заажа үгэхэ, – гэжэ харюусаба.

^9-11 Саул зарасадаа: – Зүб хэлэжэ байнаш. Ошоё, – гээ һэн. Иигээд Бурханай хүнэй байдаг хото руу тэдэ ябаба. Хото өөдэ үгсэн ябахадаа, уһа удхахаяа гаража ябаһан залуу басагадтай тэдэ уулзажа, тэдээнһээ асууба: – Мэдэлшэн бии гү? (Урдань Израильда хэн нэгэн Бурханай хүниие асуухаяа ошоходоо, «мэдэлшэндэ ошоё» гээд хэлэдэг бэлэй. Мүнөө Бурханай лүндэншэ гээд нэрлэдэг хүниие урдань мэдэлшэн гэдэг байгаа.)

¹² Тэдэ харюусаба: – Байна. Сэхэ ябагты. Одоо яарагты, юуб гэхэдэ, арад зон мүнөөдэр үргэлэй газарта үргэл хэхэ, тиимэһээ тэрэ хото руу мүнөөдэр ерээ юм.

¹³ Таанад хото руу оромсоороо үргэлэй газарта гарахынь, хоол барихынь урда тээ тэрээнтэй золгогты. Юуб гэхэдэ, тэрэнэй үргэл үреэхэеэ ерэтэр арад зон хоол барихагүй. Үргэлые тэрэнэй үреэһэнэй удаа уригдагшад хоол барижа эхилдэг. Тиимэһээ яарагты, мүнөө үшөө тэрэниие олохолта.

¹⁴ Тиигэжэ тэдэнэр хото өөдэ үгсэбэ. Хото соо ябахадань, Самуил үргэлэй газар өөдэ гарахаар урдаһаань ябажа байба.

¹⁵ Саулай ерэхын нэгэ үдэрэй урда тээ Эзэн Самуилда юумэ эли болгон иигэжэ айладаа бэлэй:

¹⁶ – Үглөөдэр энэ сагта Би шамда Бэньямиинэй обогой нэгэ хүниие эльгээхэб. Ши тэрэниие Минии арад түмэн Израилиин захирагша ноён болгон, тэрээндэ оливын тоһо түрхин ёһолол хэ. Тэрэ Минии арад түмэниие пилиштүүдэй һабарһаа абарха. Арад түмэнэймни туһа эрин уйлаһаниинь Намда дуулдаа.

¹⁷ Самуилай Саулые обёорходо, Эзэн тэрээндэ мэдүүлбэ: – Хара. Минии шамда хэлэһэн хүн энэ байна. Тэрэ Минии арад түмэниие хүтэлбэрилхэ.

¹⁸ Саул хаалгануудай хажууда ябааша Самуилда дүтэлжэ, иигэжэ хандаба: – Мэдэлшын гэрэй хаана байдагые намда хэлэжэ үгыт.

¹⁹ Самуил Саулда: – Би мэдэлшэн гээшэб. Минии урда ороод, үргэлэй обоо өөдэ ябагты. Юуб гэхэдэ, мүнөөдэр таанад намтай хамта хоол барихат. Үглөө үглөөгүүр би мэдэхэеэ һанаһан асуудалнуудтатнай харюусахаб.

²⁰ Гурбан хоногой урда тээ үгы болоһон элжэгэнүүд тухайгаа һанаагаа бү зобогты. Юуб гэхэдэ, тэдэ олдоо. Юрэдөө, Израилиин бүхы баялиг мүнөө хэнэй юм бэ?! Шинии болон шинии угай! – гээ бэлэй.

²¹ Саул: – Би Израилиин обогууд сооһоо хамагай багань болохо Бэньямиин обогой хүбүүн гээшэб. Минии эсэгын бүлэ тэрэ обогой бүхы гэр бүлэнүүд сооһоо эгээл багань бэшэ юм аал? Та юу хэлэнэбта? – гээ һэн.

²² Самуил Саулые болон зарасыень танхимда дахуулан орожо, уригдаһан гушан зоной түрүүдэ, хойморто һууха газар зааба.

²³ Самуил тогоошондо хэлэбэ: – Минии шамда үгөөшэ, «өөртөө тэрэниие байлга» гэжэ хэлэһэн хубиие асара.

²⁴ Тогоошон мяхатай гуя гарган, Саулай урда табиба. Самуил иигэжэ хэлэбэ: – Шамда үлөөһэн юумэн энэ байна. Урдаа табижа, эдеэлэ. Би зониие урижа хэлэһэнһээ хойшо шамда гэжэ энээниие хадагалан табиһан юмби. Иигэжэ Саул Самуилтай хамта тэрэ үдэр эдеэ хоол баряа бэлэй.

²⁵ Тэдэнэр обооһоо хото руу буужа, Саулда хушалта дээрэ орон заһагдаа һэн.

²⁶ Үүр сайхада Самуил хушалта дээрэ хоногшо Саулые дуудаба: – Бодо. Би шамайе үдэшэхэб. Саул бодожо, Самуилтай хамта газаашаа гараба.

²⁷ Хотын захада хүрэжэ байхадаа Самуил Саулда иигэжэ хэлэбэ: – Маанадһаа урид ябахые зарасадаа хэлэ. Харин өөрөө эндэ зогсон бай. Би шамда Бурханай үгэ мэдүүлхэмни. Зарасань урда тээнь гаража ябаа бэлэй.