1 Хаан түрэнүүд 8 - Библи

Израиль өөһэдтөө хааниие эринэ

¹ Самуил үндэр наһатай боложо, өөрынгөө хүбүүдые Израилиин удамаршад болгон табиба.

² Ууган хүбүүнэйнь нэрэ Ёһээл, хоёрдохи хүбүүнэйнь нэрэ Абияа бэлэй. Тэдэ Бэһээр-Шээбэдэ удамаршад бэлэй.

³ Харин хүбүүдынь эсэгынгээ замаар ябаагүй, эдилгэ тээшэ эрьежэ, бэлэгүүдые абан, ёһо гурим хазагайруулдаг байба.

⁴ Израилиин бүхы аха захатан сугларан, Рамаа руу Самуилда ерэбэ.

⁵ Тиигээд тэрээндэ тэдэ: – Та үбгэрөөт. Хүбүүдтнай танай замаар ябанагүй. Тиимэһээ мүнөө бусад арадуудтал адли бидэниие зонхилхо хааниие маанадта табин томилжо үгыт, – гэжэ хэлэбэ.

⁶ Тэдэнэй: – Бидэниие зонхилхо хааниие маанадта үгэгты, – гэжэ хэлэһэниинь Самуилда һайшаагдабагүй. Самуил Эзэндэ мүргэн зальбарба.

⁷ Эзэн Самуилда: – Арад зоной шамда хэлэһэн бүхы юумэ дуула. Юуб гэхэдэ, тэдэ шамайе буруушаана бэшэ, харин тэдэниие зонхилон хаан байхыемни Намайе буруушаажа байна!

⁸ Минии тэдэниие Египедһээ гаргаһан үдэрһөө хойшо мүнөө болотор тэдэ Намайе орхин, ондоо бурхадта алба хэһэндэл адляар тэдэ мүн лэ шамда иимэ юумэ хэжэ байна.

⁹ Зай, тэдэнэй үгые дуула. Гансал ши тэдээндэ һайса һануулжа, зонхилхо хаанайнь эрхэнүүдые соносхо, – гэжэ айладхаба.

¹⁰ Тэрээнһээ хааниие эрижэ байгааша арад зондо Самуил Эзэнэй бүхы үгэнүүдые хэлэжэ үгэбэ.

¹¹ Тэрэ хэлэхэдээ: – Таанадые зонхилхо хаанай эрхэ мэдэлынь иимэ байха: хүбүүдыетнай тэрэ сэрэгэй албанда татан, морин тэргэнүүдтээ һуулгаха, мориндоо мордуулан байха, морин тэргэнүүдэйнь урдуур хэрэгтэй юумээрнь хангажа тэдэ гүйдэг байха.

¹² Хаан өөртөө мянгаад болон табин хүнэй дарга болгон тэдэниие томилхо, газараа тэдэнээр хахалуулхын, таряагаа хуряалгахын, сэрэгэй зэр зэбсэг болон тэргын хэрэгсэлнүүдые өөртөө хүүлэхын тула тиихэ юм.

¹³ Басагадыетнай тэрэ абажа, хоншуу үнэртэй түрхилгэ дом бэлдүүлхэ, эдеэ хоол шануулха, хилээмэ болгуулха.

¹⁴ Таанадай таряалан, үзэмэй болон олива модоной таряалангуудайтнай эгээл эрхимыень тэрэ абажа, өөрынгөө зарасанарта үгэхэ.

¹⁵ Таряанайтнай үрэһөө болон үзэмэй таряаланһаатнай арбанай нэгэ хубиие тэрэ абажа, түшэмэлнүүдтээ ба зарасанартаа үгэхэ.

¹⁶ Эрэ, эмэ богоолнуудыетнай, эгээл һайн, залууень, элжэгэнүүдыетнай тэрэ абажа, өөрынгөө ажал хэрэгүүдтэ хэрэглэхэ.

¹⁷ Жэжэ бодо малайтнай арбанай нэгэ хуби тэрэ абаха, таанад өөһэдөө тэрэнэй богоолнууд болохот.

¹⁸ Тиихэдээ таанад өөһэдтөө шэлэһэн хаанһаа боложо, хашхаран ёолон байхат. Теэд Эзэн таанадые дуулахагүй, – гэбэ.

¹⁹ Гэбэшье арад зон Самуилай үгэ дуулахаһаа татагалзан: – Үгы, маанадые зонхилхо хаан байха ёһотой.

²⁰ Бидэ бусад бүхы арадуудтал адли болохобди, манай хаан бидэниие зонхилхо, маанадай урда ябажа, байлдаануудтамнай маанадые ударидаха, – гэлдэбэ.

²¹ Самуил арад зоной бүхы үгэнүүдые шагнаад, тэдэниие Эзэндэ дабтан хэлэбэ.

²² Эзэн Самуилда айладан: – Тэдэнэй үгэ дуулажа, хааниие тэдээндэ томило, – гэбэ. Тиигээд Самуил Израилиин зондо: – Хүн бүхэн өөр өөрынгөө хото руу бусагты, – гэжэ хэлэбэ.