1 Хаан түрэнүүд 6 - Библи

Бурханай ханзые бусааба

¹ Эзэнэй ханзын пилиштүүдэй нютагта долоон һара байхадань,

² пилиштүүд санаартадые ба мэдэлшэдые дуудажа, иигэжэ асууба ха: – Эзэнэй ханзые яахабибди? Байһан газартань тэрэниие яажа бусаахые бидэндэ заажа үгыт.

³ Тэдэнь харюусаба: – Хэрбээ таанад Израилиин Бурханай ханзые бусааха гэбэл, хооһоор бү эльгээгты. Таанад гэм зэмээ сагааруулхын тула заабол бэлэг эльгээлсэгты. Тиигэбэл, эдэгэхэт, Тэрэ таанадые юундэ даража байнаб гэжэ мэдэхэт.

⁴ Тиихэдэнь улад зон асууба: – Гэм зэмэй түлөө ямар үргэл үргэхэбибди? Тэдэнь иигэжэ хэлэбэ: – Пилиштын ноёдой тоогоор табан алтан һэлхэн үбшэ, табан алтан хулгана дархалагты. Юуб гэхэдэ, таанад болон танай ноёд дээрэ нэгэл гай гасалан буугаа ха юм.

⁵ Һэлхэн үбшэнэй ба энэ газарые хооһоруулжа байгааша хулганануудай дүрсэнүүдые хээд, Израилиин Бурханда магтаал үргэгты. Тиигэбэлтнай, таанадые, бурхадыетнай ба газарыетнай дарахаяа Тэрэ болихо аалам.

⁶ Египетшүүдэй болон фараоной үсэрхэһэндэл, юундэ таанад үсэрхэхэбта даа? Бурханай тэдээндэ хүсэеэ элирхэйлхэдэл тэдэ Израилиин зониие табяа бэлэй.

⁷ Зай, мүнөө хөөмэгшэ үмдэхүүлээгүй, түрүүшынхиеэ тугаллаһан хоёр үнеэ болон нэгэ шэнэ тэргэ абажа бэлдэгты. Үнеэдые тэргэдэ хүллэжэ, тугалнуудыень һалгаажа, байрадань абаашагты.

⁸ Эзэнэй ханзые абажа, тэргэ дээрэ табигты. Гэм зэмэй түлөө бэлэг болгон алтан зүйлнүүдые хайрсаг соо хэжэ, ханзын хажууда табигты. Тиигээд эльгээн ябуулагты.

⁹ Тэрэ ханзын өөрынгөө нютаг руу ошоһон харгы замаар Бэт-Шээмэш руу ябахые харабал, Израилиин Бурхан бидэндэ энэ ехэ гай зоболон ушаруулба гэхэбди. Харин үгы һаань, Тэрэ бидэниие дайраа бэшэ, энэнь бидэнтэй миин өөрөө тохёолдоо гэжэ мэдэхэбди.

¹⁰ Иигэжэ тэдэ тон тиимээр хэрэг бүтээжэ, тугалтай хоёр үнеэ абаад, тэргэдэ хүллөөд, тугалнуудыень байрадань бариба.

¹¹ Эзэнэй ханзые болон алтан хулганануудтай, һэлхэн үбшэнэй дүрсэнүүдтэй хайрсаг тэргэ дээрэ табиба.

¹² Үнеэд Бэт-Шээмэш руу харгыгаар сэхэ ябажа, нэгэн замаар лэ мөөрэн саашалба, хажуу тээшээ годирбогүй. Пилиштын ноёд Бэт-Шээмэшэй хилэ хүрэтэр тэдэнэй хойноһоо ябаба.

¹³ Бэт-Шээмэшэй зон нюруу газарта шэниисэ хадажа байгаа. Тэдэ шэртэжэ, ханзые обёороод, хараһандаа ехэ баярлаба.

¹⁴ Тэргэ Бэт-Шээмэшэй Ёшуһаа гэдэг хүнэй таряаланда ерэжэ, томо шулуунай хажууда тогтобо. Тэдэ зон тэргын модо хахалан, үнеэнүүдые Эзэндэ түгэс шатаалта үргэл болгон үргэбэ.

¹⁵ Левидүүд Эзэнэй ханза болон тэрээнтэй хамта байһан алтан зүйлнүүдтэй хайрсаг абажа, тэрэ мантан шулуун дээрэ табиба. Бэт-Шээмэшэй зон тэрэ үдэр Эзэндэ түгэс шатаалта үргэл болон бусад үргэлнүүдые хэбэ.

¹⁶ Пилиштын табан ноёд энээниие хараад, тэрэ үдэртөө Экроон руу бусаба.

¹⁷ Пилиштүүдэй гэм зэмээ сагааруулхын тула Эзэндэ үргэл болгон эльгээһэн һэлхэн үбшэнэй алтан дүрсэнүүд гэбэл, нэгэнь Ашдоодой түлөө, нэгэнь Гаазай түлөө, нэгэнь Ашхэлооной түлөө, нэгэнь Гаадай түлөө, нэгэнь Экрооной түлөө байгаа.

¹⁸ Алтан хулгананууд хадаа Пилиштын табан ноёдой зонхилдог хотонуудай – бүхэлэгдэһэн хотонуудай ба хэрэм ханагүй һууринуудай тоогоор байгаа бэлэй. Эзэнэй ханзые табиһан тэрэ томо шулууе мүнөөшье болотор Бэт-Шээмэшэй Ёшуһаагай таряалан дээрэ ажаглажа болохо.

¹⁹ Бэт-Шээмэшэй далан хүниие ханза нээжэ хараһанайнь тула Эзэн хюдан усадхаба. Арад зониие угаа ехээр хюдаһандань зон гашуудан уйлалдаа һэн.

Бурханай ханза Кирьяат-Еариимдэ

²⁰ – Эзэнэй, энэ арюун Бурханай урда хэн зогсожо шадахаб? Тэрэ бидэнһээ хэн руу ошохоб? – гэжэ Бэт-Шээмэшэй зон хөөрэлдэбэ.

²¹ Тиимэһээ тэдэ Кирьяат-Еариимэй ажаһуугшадта элшэнэрые эльгээжэ, иигэжэ хэлэхынь захиба: – Пилиштүүд Эзэнэй ханзые бусаагаа. Таанад ерэжэ, тэрэниие өөртөө абаашагты.